2 Hari 21 - Hanunuu

Kay Maghari ni Manasis sa Huda

¹ Si Manasis 12 ka timpu kay idad pagka naghari siya. Sa Hirusalim siya nangulian, ag naghari sa sulud 55 ka timpu. Kay ina si Hipsiba.

² Daut kay binuwat sa magbantay Panginuun. Nagsunud siya sa mayagting pag manga buruwatun manga nasyun ipinalayas Panginuun sa panab-anan manga Israilita.

³ Ipinatindug niya utru ti manga simbahan sa abwat pag manga rugar ti ipinadaut kaybi niya ama ni Isikyas. Nagpatindug diman siya manga harandugan para sa kan Baal ag nagpabuwat manga tulduk tanda diyusa si Asira, parihu sa binuwat ni Hari Akab taga Israil. Nagluhud siya ag nagsamba sa tanan pag bagay sa kalangitan.

⁴ Namabwat waya gid siya manga harandugan sa Balay Diyus Panginuun, angay sa Panginuun, ti Balay Diyus sa Hirusalim imaw ti rugar nu naan pag dayawun siya.

⁵ Ipinauli niya inda pag manga harandugan sa baliw-baliw sugkadan Balay Diyus Panginuun agud sambahun ti tanan bagay sa kalangitan.

⁶ Isinagda niya kay sadili pag anak sa apuy. Binwat diman niya ti manga pagbuwatun manga panhirian hanggan manga manugpintu, ag nagpaingana siya sa manga pandaniwan maghampang sa karadwa manga namatay. Subra gid kay kasalanan sa Panginuun, pag-ikagalit inda Panginuun.

⁷ Ipinauli niya sa Balay Diyus kay ipinabwat pag tulduk tanda diyusa si Asira. Nu tungkul sa inda pag Balay Diyus magsabi ti Panginuun sa kan Dabid hanggan sa kay anak si Sulumun, “Dayawun aku hanggan aban sa inda pag Balay Diyus hanggan sa Hirusalim, ti rugar kang pinili sa tanan pag linahi Israil.

⁸ Nu tupadun lang nasakupan Israil ti tanan niku kasuguan ti ipinakaun sa kanda niku manugsirbi ni Muysis, unman niku pahintulutan paighitun sida sa inda pag daga kang ipinakaun sa kanda manga ginurang.”

⁹ Dapat unman namatingi ti manga tawu. Pinatalang sida ni Manasis sa pagbuwat daut, kanda binuwat mas daut waya sa binuwat manga nasyun ipinaruris Panginuun sa manga taga Israil.

¹⁰ Magkun ti Panginuun sa panab-anan niya manga manugsirbi pag manga purupita:

¹¹ “Nagbuwat si Hari Manasis taga Huda inda pag mayagting pag manga buruwatun, mas daut waya sa binuwat manga Amuriyu nangulian sa inda pag daga bag-u rinmas-ug ti manga taga Israil. Pagpasundan niya ti manga taga Huda sa kasalanan sa panab-anan pagsamba sa kanda manga diyus-diyusan.

¹² Nakan aku, ti Panginuun Diyus Israil, mamadara kadamhakan sa Hirusalim ag Huda, ti kada makadnug inda dalaun gid.

¹³ Sintinsiyahan niku ti Hirusalim parihu sa pagsintinsiya niku sa Samarya ag sa magtal-anakan ni Hari Akab. Lumpiyuhun niku ti Hirusalim parihu sa pinggan pagpayidan ag pag-ipaslukub.

¹⁴ Ipablag niku una waya ti nasawad sa kang nasakupan, ipakaun niku sida sa kanda manga kalaban ag bul-un kanda manga kasiyunan.

¹⁵ Mangyari inda sa kanda dahil daut kanda binuwat sa kang magbantay ag paggalitun nida aku, ginan waya sa pagpalwas sa kanda manga ginurang sa Ihiptu hanggan taynguna.”

¹⁶ Mayamu gid pag tawu unman may nabwat salan ti pinanmatay ni Manasis tugka sa nagbulus ti dugu sa manga karsada Hirusalim. Bukud waya sa binwat niya kasalanan imaw ti pinun-an kasalanan manga taga Huda sa magbantay Panginuun.

¹⁷ Ti iba waya ka tultulanun tungkul sa maghari ni Manasis, ag ti tanan niya binuwat, hanggan ti manga kasalanan kay nabwat, nisurat sa Ribru Tultulanun manga Hari Huda.

¹⁸ Pagka namatay si Manasis, ilinbung siya sa gardin niya balay hari, ti gardin pag-ingarnan Usa. Ag si Amun kay anak imaw ti nag-ublus sa kanya sa kay pagka hari.

Kay Maghari ni Amun sa Huda

¹⁹ Si Amun 22 ka timpu kay idad pagka naghari siya sa Huda. Sa Hirusalim siya nangulian, ag naghari siya sa sulud duwa ka timpu. Kay ina si Misulimit kay anak ni Harus taga Hutba.

²⁰ Daut kay binuwat ni Amun sa magbantay Panginuun, parihu sa binuwat niya ama ni Manasis.

²¹ Sinunud niya ti pag-ugaliun niya ama. Sinamba niya ti manga diyus-diyusan ti pagsambahun niya ama,

²² ipinurya niya ti Panginuun, ti Diyus niya manga ginurang. Unman siya nagsunud sa palakaw Panginuun.

²³ Taynguna, naggayak daut ti manga may kangaranan ni Amun laban sa kanya, ag minatay nida siya sa kay balay hari.

²⁴ Dapat pinanmatay manga nasakupan Huda ti tanan nagmatay sa kan Hari Amun. Ag iinilis nida si Husyas kay anak ni Amun bilang hari.

²⁵ Ti iba waya ka tultulanun tungkul sa maghari ni Amun, ag kay manga binuwat, nisurat sa Ribru Tultulanun manga Hari Huda.

²⁶ Ilinbung si Amun sa kay lulubngan ati sa gardin pag-ingarnan Usa. Ag si Husyas kay anak imaw ti nag-ublus sa kay pagka hari.