2 Hari 20 - Hanunuu

Nasakit si Isikyas

¹ Ati pag udas, nasakit si Isikyas ag ga mamatay yi siya. Nag-ati sa kanya si Purupita Isayas kay anak ni Amus ag magkun, “Sinabi Panginuun buwata yi ti kailangan nimu buwatun dahil unman yi kawu maayadan, mamatay yi kawu.”

² Pagka nadnugan inda ni Isikyas, napasrangu siya sa lingub ag nandarangin sa Panginuun magkun,

³ “Panginuun, alalahana duy nimu nu kabitay aku nangabuhi matinupadun sa kanmu ag nagsirbi buu tagipusuun, ag nu kabitay aku nagbuwat mayad sa kanmu magbantay.” Ag nanlumi siya matnug.

⁴ Unman waya nakaighit si Isayas sa karaw-an pag sakahan balay hari, magsabi ti Panginuun sa kanya,

⁵ “Pagbalik kawu sa kan Isikyas, ti takinan niku nasakupan, ag sabihan inda: ‘Inda ti pagsabihun Panginuun, ti Diyus nimu ginurang si Dabid: Nadnugan niku kanmu darangin ag nakitan niku kanmu manga luwa. Paayadun niku kawu. Sa ikatlu pag sirang taynguna ginan makabangun yi kawu, ag makaatag kawu sa Balay Diyus Panginuun.

⁶ Dugangan waya niku 15 ka timpu kanmu buhi. Iribri niku kawu hanggan inda pag banwa sa kamang hari Asirya. Alagaan niku inda pag banwa para sa kang kadayawan ag dahil sa kan Dabid kang manugsirbi.’ ”

⁷ Sinabihan ni Isayas ti manga suruguun ni Isikyas kuntay tampulan nida kay baga rinimis igus. Sinunud ngani nida inda, ag naayadan siya.

⁸ Katpung udwaya magkaayadan si Isikyas, nagpaingana siya sa kan Isayas, “Hintay nguna ti tanda makapatutuu umayad aku ag makaatag sa Balay Diyus Panginuun sa ikatlu pag sirang taynguna ginan?”

⁹ Sinmagut si Isayas, “Inda pag tanda ti ipakaun Panginuun pumatutuu kuntay tupadun niya inda kay taratu. Mamili kawu sa duwa: umisdug tag sa unahan sampulu ka tiklang ti hamuy init sa udasan ngatay pumabalik tag sa uryan sampulu ka tiklang?”

¹⁰ Sinmagut si Isikyas, “Malpus umisdug tag sa unahan sampulu ka tiklang ti hamuy init. Pabalikan yi lang inda tag sa uryan sampulu ka tiklang!”

¹¹ Nakan nandarangin si Purupita Isayas sa Panginuun, ag ipinabalik Panginuun tag sa uryan sampulu ka tiklang ti hamuy init sa udasan ipinabwat ni Akas.

Ti manga Manugbarita ginan sa Babilunya

¹² Pagka ati pag udas, ti hari Babilunya si Mirudak Baladan, kay anak ni Baladan, nakabarita kuntay nasakit si Isikyas. Nakan namadara siya manga surat ag pamakaun sa kan Isikyas sa panab-anan manga manugbarita.

¹³ Masulung tinanggap ni Isikyas ti manga manugbarita ag ipinakakit niya sa kanda ti tanan pag bagay sa kay haramnuan kayamanan — ti manga pilak, manga gintu, manga panlakay, manga marinu pag kalasi lana ulibu, kay manga armas ag iba waya pag manga kayamanan. Unman may una hintay ati sa kay balay hari ngatay kaharian ti unman niya ipinakakit sa kanda.

¹⁴ Taynguna, nag-atag si Purupita Isayas sa kan Hari Isikyas ag nagpaingana, “Naan nguna ginan inda pag manga tawu, ag unu kanda kailangan?” Sinmagut si Isikyas, “Ginan sida sa arayu pag rugar, sa Babilunya.”

¹⁵ Namaingana waya gid ti purupita, “Hintay kanda nakitan sa kanmu balay hari?” Sinmagut si Isikyas, “Nakitan nida ti tanan sa kang balay hari. Unman gid may itinagu aku kayamanan ti balaw niku ipinakakit sa kanda.”

¹⁶ Magsabi si Isayas sa kan Isikyas, “Patingihi inda ti pagsabihun Panginuun:

¹⁷ Rumas-ug gid ti udas daran-un sa Babilunya ti tanan kasiyunan sa kanmu balay hari, ti tanan natipun nimu manga ginurang asan di hanggan taynguna. Unman gid may masawad, magsabi ti Panginuun.

¹⁸ Ag ti iba nimu sunud pag manga linahi bihagun, ag buwatun sida panawuhun sa balay hari Babilunya.”

¹⁹ Nag-isip si Isikyas balaw inda mangyari sa kanya pag timpu nu unman bumaliw mahusay ag unman may dilikadu habang buhi waya siya. Nakan magsabi siya sa kan Isayas, “Mayad tunda ti sinabi Panginuun ti binagaw nimu sa kangku.”

Ti Katugkaan Paghari ni Isikyas

²⁰ Ti iba waya ka tultulanun tungkul sa maghari ni Isikyas, hanggan ti tanan niya bantug pag manga binuwat ag kay pagpabuwat tangki hanggan talisi atabug sa banwa, nisurat sa Ribru Tultulanun manga Hari Huda.

²¹ Pagka namatay si Isikyas, si Manasis kay anak imaw ti nag-ublus sa kanya sa kay pagka hari.