2 Hari 2 - Hanunuu

Dinara si Ilyas Atabug sa Langit

¹ Pagka udas yi bul-un Panginuun si Ilyas atabug sa langit sa panab-anan usa ka buhawi, maglakaw sida ni Ilyas ni Ilisyu ginan sa Gilgal.

² Magkun si Ilyas sa kan Ilisyu, “Sitay lang kawu, dahil pagpaatihun aku Panginuun sa Bitil.” Dapat magkun si Ilisyu, “Magsumpa aku sa buhi pag Panginuun hanggan sa kanmu, dayu gid duy aku bumulag sa kanmu.” Nakan nag-ati sida sa Bitil.

³ Taynguna, may usa ka gurupu manga purupita ati sa Bitil ti nag-ati sa kan Ilisyu ag nagpaingana, “Alam aw nimu bul-un yi Panginuun kanmu amu taynguna pag sirang?” Nagsagut si Ilisyu, “Hu, alam duy niku, dapat danga yi nita paghampangan inda.”

⁴ Bag-u magkun si Ilyas sa kan Ilisyu, “Sitay lang kawu, dahil pagpaatihun aku Panginuun sa Hiriku.” Nagsagut si Ilisyu, “Magsumpa aku sa buhi pag Panginuun hanggan sa kanmu, dayu gid aku bumulag sa kanmu.” Nakan naglakaw sida atag sa Hiriku.

⁵ Pagka ati yi, may usa maan ka gurupu manga purupita ati sa Hiriku ti nagpakarani sa kan Ilisyu ag nagpaingana, “Alam aw duy nimu bul-un yi Panginuun kanmu amu taynguna pag sirang?” Nagsagut si Ilisyu, “Hu, alam duy niku, dapat danga yi nita paghampangan inda.”

⁶ Bag-u magkun si Ilyas sa kan Ilisyu, “Sitay lang kawu, dahil pagpaatihun aku Panginuun sa Sapa Hurdan.” Nagsagut si Ilisyu, “Magsumpa aku sa buhi pag Panginuun hanggan sa kanmu, dayu gid duy aku bumulag sa kanmu.” Nakan nagparargu sida duwa sa paglakaw.

⁷ Taynguna, may 50 ka tawu kaibahan sa gurupu manga purupita matindugan sa may unahan, masranguhan sa rugar nu naan pag maharyan si Ilyas ag si Ilisyu sa may Sapa Hurdan.

⁸ Linukas ni Ilyas kay kulimpay ag linulun inda bag-u ihinampak sa danum. Natunga rargu ti danum, ag nagdipay sida duwa sa mamara pag daga.

⁹ Pagka nakadipay sida, magkun si Ilyas sa kan Ilisyu, “Hintay ti gustu nimu buwatun niku sa kanmu, nu aku bul-un yi ginan sa kanmu?” Nagsagut si Ilisyu, “Gustu niku ipamana nimu sa kangku ka dubli kanmu kapangyarihan.”

¹⁰ Magkun si Ilyas, “Makuri inda kanmu paghagadun. Dapat, matanggap nimu inda nu makitan nimu aku habang pagbul-un ginan sa kanmu atubangan. Nu unman aku makitan nimu, dayu inda matanggap nimu.”

¹¹ Habang magtulultulan sida maglakaw, kadaka lang may nagras-ug kalisa apuy pagguyudun manga kabayu apuy. Naglakaw inda sa kanda karaw-an ag imaw ti nagbulag sa kanda, bag-u dinara si Ilyas atabug sa langit sa panab-anan usa ka buhawi.

¹² Nakitan inda ni Ilisyu ag hinmuyaw siya, “Amang niku! Amang niku! Ti manga kalisa ag manga manugkalisa sa Israil!” Ag udyi niya nakitan si Ilyas. Bag-u ginisi niya kay rutay sa karukuan.

¹³ Bag-u pinunpun niya kay kulimpay ni Ilyas nalagpak, ag nagbalik maan siya sa saruy Sapa Hurdan ag nagtindug ati.

¹⁴ Ihinampak niya sa danum ti kulimpay ni Ilyas ag nagsabi, “Naan yi taynguna ti Panginuun, ti Diyus ni Ilyas?” Pagka binuwat niya tunda, natunga rargu ti danum ag nagdipay siya.

¹⁵ Pagka nakitan gurupu manga purupita ginan sa Hiriku ti nangyari, magkun sida, “Kay kapangyarihan ni Ilyas ati yi sa kan Ilisyu.” Nakan sinulang nida si Ilisyu ag nagluhud sida bilang paggalang sa kanya.

¹⁶ Magkun sida, “May kaibahan kami 50 ka marabaskug pag manga tawu. Nu kanmu gustu, ipahanap nita sa kanda kanmu amu. Barang dinara lang siya Ispiritu Panginuun sa usa ka bungtud ngatay sa usa ka luung.” Nagsagut si Ilisyu, “Danga yi sida pagpalakawa.”

¹⁷ Dapat magpilit gid sida hanggan di sa nangay-a yi lang siya. Nakan magkun siya, “Hu, palakawa niyu sida.” Nakan ipinalakaw nida ti 50 ka tawu, ag sa sulud tulu ka sirang hinanap nida si Ilyas dapat unman gid nida siya nakitan.

¹⁸ Pagka nagbalik sida sa kan Ilisyu, ati di waya sa Hiriku, magkun si Ilisyu sa kanda, “Ta, unman aw nagsabi yi aku sa kanyu danga kamu maglakaw?”

Ti manga Makadululaw pag Binwat ni Ilisyu

¹⁹ Ti manga tawu sa banwa Hiriku magkun sa kan Ilisyu, “Nakitan diman duy nimu mayad ti nahamnaan nimi banwa. Dapat bukun mayad kay danum, ag purya waya siti una manga tanum unman magtubu.”

²⁰ Magkun si Ilisyu, “Daran-i niyu aku bag-u pag ungut ag sukadi asin.” Nakan dinara ngani nida tunda sa kanya.

²¹ Naglakaw rargu siya atabug sa bulbugan ag iyinmut atag ti asin bag-u magkun, “Inda ti pagsabihun Panginuun: ‘Linumpiyu yi niku inda pag danum, nakan taynguna bukun yi inda makamatay ngatay bukun yi makapaapas sa magtubu manga tanum.’ ”

²² Pagka siyun ginan, malindag yi ti danum, parihu sa kay sinabi ni Ilisyu ti nangyari.

²³ Ginminan sa Hiriku si Ilisyu ag nag-ati sa Bitil. Sa kay maglakaw niya sa dalan, may manga kalay-awan lalaki ginan sa usa ka banwa naghangal-hangal sa kanya. Magkun sida, “Kalbu, kalbu, danga kawu sitay!”

²⁴ Nag-aliwliw si Ilisyu, tinurun niya ti manga kalay-awan ag sinaadan sa ngaran Panginuun. Bag-u may duwa ka babayi simarun idu nagluwang ginan sa kakayuhan ag ginutay-gutay ti 42 ka kalay-awan.

²⁵ Pagkatapus nag-ati si Ilisyu sa Bantud Karmilu, bag-u binmalik maan siya sa Samarya.