2 Hari 19 - Hanunuu

Nanhagad Paanyu si Hari Isikyas sa kan Isayas

¹ Pagka nadnugan ni Hari Isikyas ti ibinarita sa kanya, ginisi niya kay rutay ag nagsulung saku, bag-u nag-atag siya sa Balay Diyus Panginuun.

² Ipinaatag niya sa kan Isayas, anak ni Amus, sida ni Ilyakim ti manugpamahala sa balay hari, si Sibna ti manugsurat, hanggan ti manga takinan manga manughandug. Sida tanan may sulung saku.

³ Magkun sida sa kan Isayas, “Inda ti pagsabihun ni Isikyas: ‘Mag-agwanta kita taynguna pag udas; pagparusahan ag pagpakay-ahun kita. Parihu kita sa magpanganak unman yi may kusug ilusad kay anak.

⁴ Sinugu hari Asirya kay kumandir hampay puyaan ti buhi pag Diyus. Barang nasaydan Panginuun, nimu Diyus, ti pagsabihun kumandir ag parusahan siya sa kay manga binagaw. Nakan idarangin nimu ti manga nasawad sa kanta.’ ”

⁵ Pagka natapus kay magbagaw ti ipinadara ni Hari Isikyas pag manga may kangaranan,

⁶ magkun si Isayas sa kanda, “Sabihi niyu kanyu amu si Hari Isikyas inda ti pagsabihun Panginuun: ‘Danga kawu magkadala sa kanmu nadnugan pagpuya sa kangku manga tawuhan hari Asirya.

⁷ Patingihi! Patalangun niku ti hari Asirya. Makadnug siya barita imaw ti pumabalik sa kanya sa kay nasyun. Ag ati ipamatay niku siya sa panab-anan baladaw.’ ”

Magtima Maan ti Asirya

⁸ Taynguna pagka nadnugan kumandir manga sundalu Asirya kuntay nighit yi sa Lakis kanda hari ag nan-gira sa Libna, nag-ati waydi siya.

⁹ Nabaritaan ni Hari Sinakirib kuntay si Hari Tirhaka taga Itiyupya magras-ug agud man-gira sa kanya. Pagka nadnugan niya inda, nagpadara siya manga manugbarita sa kan Isikyas kaindaay kay sinabi:

¹⁰ “Danga kawu magpaluku sa pagsarigan nimu pag diyus nu sumabi siya, ‘Ti Hirusalim balaw ipakaun sa kamang hari Asirya.’

¹¹ Pagpatingi! Kawu gid ngap ti nakadnug nu hintay ti binuwat manga hari Asirya sa harus tanan pag nasyun. Rinuris sida tanan. Ag kawu, mag-isip aw makaribri kawu?

¹² Pinanruris niku manga ginurang ti manga banwa Gusan, Haran, Risip, hanggan ti nasakupan Idin asan sa Tilasar. Nairibri aw sida nida manga diyus?

¹³ May nabwat aw ti hari Hamat, Arpad, Siparbaim, Hina, ag Iba?”

Kay Darangin ni Isikyas

¹⁴ Pagka natapus nabasa ni Isikyas ti surat ipinakaun manga manugbarita sa kanya, nag-atag siya sa Balay Diyus Panginuun ag binuklad ti surat sa atubangan Panginuun.

¹⁵ Bag-u nandarangin siya, “Panginuun, Diyus Israil matukawan sa tukawan hari sa karaw-an manga kirubin, kawu lang ti Diyus sa tanan kaharian sitay sa kalibutan. Linalang nimu ti kalangitan hanggan ti kalibutan.

¹⁶ Panginuun, patingihi ag bantayi ti magpangyari. Patingihi ti tanan sinabi ni Sinakirib, magpuya sa kanmu, buhi pag Diyus.

¹⁷ Tutuu, Panginuun, pinanruris manga hari Asirya ti mayamu pag nasyun

¹⁸ hanggan kanda manga diyus-diyusan sa panab-anan pagyamut sa apuy. Dahil balaw inda tutuu pag manga diyus nu unman manga batu lang ag manga kayu binuwat tawu.

¹⁹ Nakan taynguna, Panginuun kanmi Diyus, ribrihan kami sa kamang Asirya, hampay ti tanan pag kaharian sitay sa kalibutan makaalam kawu lang, Panginuun, ti Diyus.”

Ti Pagruris sa kan Hari Sinakirib Taga Asirya

²⁰ Bag-u nagpadara si Isayas kay anak ni Amus inda pag barita sa kan Isikyas, “Inda ti pagsabihun Panginuun, ti Diyus Israil: Nadnugan niku kanmu darangin tungkul sa kan Hari Sinakirib taga Asirya.

²¹ Ag inda ti pagsabihun niku laban sa kanya: ‘Pagkasarin-an ag pagpuyaan kawu manga nasakupan Siun, ti banwa Hirusalim. Mag-il-ilung sida magpuya sa kanmu habang magpalagiw kawu.

²² Si unu nguna kanmu pagsurugun ag pagbagaw-bagawan? Si unu ti pagpaabwatan nimu kanmu busis ag pagpadayawan? Unman aw aku, ti Banal pag Diyus Israil?

²³ Pagpuyaan nimu aku sa panab-anan nimu manga suruguun. Magsabi waya kawu, “Sa panab-anan niku mayamu pag kalisa nadayik niku ti abwat pag manga bantud, ti katayungtungan manga bantud Libanun. Pinamukan niku ti pinakaabwat pag sidru hanggan ti pinakamayad pag sipris. Nakaaput aku sa katayungtungan inda sa may maraybung pag kakayuhan.

²⁴ Namakutkut aku manga bubun sa iba pag manga rugar, ag nanginum ginan sa inda pag manga bubun. Sa kang linmawuy, namara ti manga sapa sa Ihiptu.”

²⁵ Tutuu pinandaut nimu ti inaladan batu pag manga banwa. Dapat unman aw lugud nimu alam dugay yi niku inda itinagka? Dugay niku inda ginayak mangyari, taynguna pagtupadun yi niku inda.

²⁶ Ti manga nasakupan manga banwa kanmu pinandaut naduraan bisug; nadala sida ag nangay-a. Parihu sida sa manga ilamnun sa karatagan madali lang magkalayung ngatay sa manga ilamnun magtubu sa atup balay, pagka inmusbul nalayung rargu.

²⁷ Dapat alam niku ti tanan tungkul sa kanmu, nu naan kawu mag-uli, ngatay naan ginan kawu ngatay nu naan tabug kawu, ag nu kabitay kanmu pangagalit sa kangku.

²⁸ Dahil nadnugan niku kanmu pangagalit sa kangku hanggan kanmu magpayabang, kaw-itun niku kanmu irung ag rindahan niku kanmu bibig, ag guyudun pabalik sa kanmu gininanan, sa dalan kanmu linakawan.’ ”

²⁹ Magkun waya si Isayas sa kan Isikyas, “Inda kay tanda pag-alagaan Panginuun ti Hirusalim sa manga taga Asirya: Taynguna pag timpu kanyu kan-un ti manga burak manga tanum buluntad tinmubu lang, ag sa dasun pag timpu ti manga burak manga tanum tinmubu sa tinubuan sitay. Dapat sa ikatlu pag timpu tumanum yi kamu uyas ag mangani. Tumanum diman kamu manga ubas ag kumaun kay burak.

³⁰ Ti manga nasawad manga buhi sa Huda umalwan parihu sa tanum magpan-gamut abasad ag magburak.

³¹ Dahil may manga masawad buhi magkarawayak ginan sa Hirusalim, sa Bantud Siun. Siguraduhun gid Panginuun Makamaskihan matupad inda.

³² “Inda ti pagsabihun Panginuun tungkul sa hari Asirya: ‘Unman siya sumulud sa banwa Hirusalim ngatay makapana. Unman siya makapakarani may panangga ngatay makapalibut sa manga alad batu banwa agud man-gira.

³³ Bumalik siya sa kay gininanan, sa dalan kay linakawan. Aku, ti Panginuun, magsabi unman gid siya sumulud sa inda pag banwa.

³⁴ Alagaan ag iribri niku inda pag banwa para sa kang kadayawan ag dahil sa kang taratu sa kan Dabid kang manugsirbi.’ ”

³⁵ Pagka yabi, nag-atag ti anghil Panginuun sa kampu manga taga Asirya ag minatay niya ti 185,000 ka sundalu. Pagkasurip, igu nipulaw ti manga nasawad buhi, nakitan nida ti mayamu pag manga bangkay.

³⁶ Dahil siyun, nuli si Sinakirib sa Ninibi ag ati pag nangulian.

³⁷ Usa ka sirang, habang magsamba si Sinakirib sa simbahan niya diyus si Nisruk, minatay siya niya duwa ka anak lalaki sida ni Adramilik ni Sarisir sa panab-anan baladaw, ag rargu nalagiw sida sa Ararat. Kay usa niya ka anak si Isarhadun imaw ti nag-ublus sa kanya sa kay pagka hari.