2 Hari 18 - Hanunuu

Kay Maghari ni Isikyas sa Huda

¹ Naghari sa Huda si Isikyas kay anak ni Akas sa ikatlu pag timpu kay maghari ni Husyas, kay anak ni Ila, sa Israil.

² Si Isikyas 25 ka timpu kay idad pagka naghari siya. Sa Hirusalim siya nangulian, ag naghari siya sa sulud 29 ka timpu. Kay ina si Abya kay anak ni Sakaryas.

³ Mayad kay binuwat ni Isikyas sa magbantay Panginuun, parihu sa binuwat niya ginurang ni Dabid.

⁴ Ipinadaut niya ti manga simbahan sa abwat pag manga rugar, ipinarunut ti manga aramirawan pag batu, ag ipinaplud ti tulduk tanda diyusa si Asira. Ipinarunut diman niya ti galang pag ulay kay binuwat ni Muysis, dahil ati ginan kaybi sa kan Muysis nagtuub kamangyan sinamba yi tunda manga taga Israil. Tunda pag galang ulay iningarnan Nihustan.

⁵ Nagsarig si Isikyas sa Panginuun, ti Diyus Israil. Unman gid may pumarihu sa kanya pag hari sa Huda, una ti manga un-an sa kanya hanggan ti manga dumasun waya sa kanya.

⁶ Matinupadun gid siya sa Panginuun, ag unman gid nag-apas sa pagsunud sa kanya. Ag sinunud niya ti ipinakaun Panginuun sa kan Muysis pag manga sugu.

⁷ Pag-ibahan siya Panginuun, ag magpanalu siya sa tanan niya pagbuwatun. Naglaban siya sa hari Asirya ag unman nagsirbi sa kanya.

⁸ Ginan sa dariit pag manga baryu tugka sa daraka pag manga banwa may alad batu, tinalu niya ti manga Pilistiyu tugka sa Gasa hanggan ti sakup siyun pag rugar.

⁹ Pagka sa ikap-at pag timpu kay maghari ni Isikyas, imaw ti ika-7 pag timpu kay maghari ni Husyas sa Israil, nan-gira si Hari Salmanisir taga Asirya sa Samarya ag pinalibutan inda.

¹⁰ Pagkalawuy tulu ka timpu, pagka sa ikan-um pag timpu kay maghari ni Isikyas ag pagka sa ikasiyam pag timpu kay maghari ni Husyas, nasakup taga Asirya ti Samarya.

¹¹ Dinara hari Asirya ti manga taga Israil sa Asirya bilang manga bihag, ag ipinatahan sida sa banwa Hala, sa manga rugar arani sa Sapa Habur sa Gusan, hanggan sa manga banwa manga Midyanita.

¹² Nangyari inda sa manga taga Israil dahil unman sida nagsunud sa Panginuun nida Diyus. Linabag nida ti kasunduan Panginuun sa kanda — ti tanan pag sugu ipinakaun Panginuun sa panab-anan ni Muysis kay manugsirbi. Unman sida nagpatingi ngatay nagsunud sa tunda pag kasunduan.

Ginira Asirya ti Huda

¹³ Pagka ika-14 pag timpu kay maghari ni Isikyas, ginira ni Hari Sinakirib taga Asirya ti tanan may alad batu pag manga banwa sa Huda ag nasakup niya inda.

¹⁴ Nakan si Hari Isikyas nagpadara barita tabug sa hari Asirya sa Lakis: “Nagkasala aku sa kang naglaban sa kanmu. Dapat ipakaun niku ti una hintay kanmu hagadun, basta umighit lang kamu sa kanmi.” Nakan nanhagad ti hari Asirya sa kan Hari Isikyas manga sampulu ka tunilada pilak ag usa ka tunilada gintu.

¹⁵ Ipinakaun ni Isikyas sa kanya ti tanan pilak sa Balay Diyus Panginuun hanggan sa haramnuan balay hari.

¹⁶ Pinanbuul ni Isikyas hanggan ti manga gintu kay ipinahuput sa manga sabian Balay Diyus Panginuun ag sa manga bakalan inda, ag ipinakaun inda sa hari taga Asirya.

¹⁷ Dapat habang ati si Sinakirib sa Lakis, sinugu niya ti takinan niya manga kumandir, ti takinan manga may kangaranan, hanggan ti kumandir sundalu, kuntay pag-ati sa Hirusalim pagpasampak sa kan Hari Isikyas. Pagka ati yi sida sa luwas Hirusalim, nagpat-ung sida sa may arani bululusan danum sa babaw may pagtipunan danum, ati baliwa sa dalan atag sa may piripian.

¹⁸ Ipinatawag nida si Hari Isikyas, dapat ti pinaati sa hari si Ilyakim kay anak ni Hilkiyas, ti manugpamahala sa balay hari, si Sibna ti manugsurat, ag si Huwa kay anak ni Asap, ti manug-asikasu manga kasuratan kaharian.

¹⁹ Magkun sa kanda ti kumandir sundalu, “Sabihan niyu si Isikyas, inda ti pagsabihun makapangyarihan pag hari Asirya: “ ‘Hintay kanmu pagsarigan?

²⁰ Mag-isip aw lugud kawu manalu sa labanan sa panab-anan lang bagaw ag balaw sa kakayahan hanggan kabisugan nimu manga sundalu? Si unu lugud kanmu pagsarigan nakan naglaban kawu sa kangku?

²¹ Ti Ihiptu aw? Inda pag nasyun hanggan kay hari parihu lang sa bari pag sugkud nu gamitun nimu pansugkud magbiyag sa kanmu kamang.

²² Dapat barang sumabi kamu sa kangku magsarig kamu sa Panginuun niyu Diyus. Dapat unman aw kawu diman, Isikyas, ti nagpadaut manga simbahan sa abwat pag manga rugar hanggan ti manga harandugan, ag sinabihan nimu ti manga taga Huda hanggan taga Hirusalim kailangan magsamba sida sa usa lang ka harandugan ati sa Hirusalim?’

²³ “Taynguna may itanyag sa kanmu kang amu, ti hari Asirya. Pakan-an kawu nimi 2,000 ka kabayu, tunda nu may 2,000 diman kawu ka manugkabayu!

²⁴ Unman gid kawu manalu una sa pinakaababa pag may kangaranan niku amu. Magsarig lang kawu sa Ihiptu magpakaun sa kanmu manga kalisa ag manga manugkabayu.

²⁵ Mag-isip aw kawu barang balaw aku sinugu Panginuun ataytabug agud rurisun inda pag nasyun? Ti Panginuun gid ngap ti nagsugu sa kangku sa paggira ag pagruris sa inda pag nasyun.”

²⁶ Magkun sida ni Ilyakim, ni Sibna, ag ni Huwa tabug sa kumandir, “Mahimu aw bumagaw kawu sa kanmi pamagaw Aramiku, dahil magkasalman nimi inda. Danga kawu magbagaw Hibriyu dahil masaydan kawu manga tawu asan sa manga alad batu banwa.”

²⁷ Dapat nagsagut ti kumandir, “Sinugu aku niku amu kuntay ipaalam inda pag manga bagay sa tanan nasakupan Hirusalim, balaw lang sa kanyu ag sa kanyu hari. Kamu tanan lun-usun ag uwawun sa udas girahun nimi kamu. Nakan kan-un niyu kanyu ugat ag inmun niyu kanyu ihi.”

²⁸ Bag-u tinmindug ti kumandir ag namagrit sa bagaw Hibriyu, “Patingihi niyu ti barita makapangyarihan pag hari Asirya!

²⁹ Inda kay pagsabihun: Danga kamu magpaluku sa kan Isikyas. Balaw niya kamu iribri ginan sa kang kamang!

³⁰ Danga kamu magpaniwala sa kanya una sabihun sa kanyu kuntay, ‘Pihu gid iribri kamu Panginuun; inda pag banwa balaw masakup hari Asirya.’

³¹ “Danga kamu magpatingi sa kan Isikyas! Inda ti pagsabihun hari Asirya: ‘Danga kamu maglaban sa kangku; pagsuku yi lang kamu! Bag-u pahintulutan niku kamu makakaun burak niyu ubas hanggan igus, ag makainum sa kanyu manga sukadan danum,

³² tugka sa bumalik aku ag darahun niku kamu sa daga parihu sa kanyu daga — ti daga may manga taranuman manga ubas makapakaun sa kanyu irinmun ubas ag may manga butir mabuwat niyu manga tinapay, ag may imaw diman manga kayu ulibu hanggan manga daykut. Tupada niyu kang pagsabihun hampay mabuhi kamu ag balaw mamatay. Danga kamu magpatingi sa kan Isikyas dahil pagpatalangun lang niya kamu sa kay pagsabihun iribri kamu Panginuun.

³³ May manga diyus aw lugud una naan pag nasyun ti nairibri kanda nasyun sa kamang hari Asirya?

³⁴ May nabwat aw ti manga diyus Hamat, Arpad, Siparbaim, Hina, ag Iba? Nairibri aw manga diyus Samarya kanda daga sa kang manga kamang?

³⁵ Si unu sa manga diyus sa inda pag manga nasyun ti nakaribri sa kanda nasyun sa kangku ginan? Nakan kabitay mairibri Panginuun ti Hirusalim sa kang manga kamang?’ ”

³⁶ Dapat unman nagsagut ti manga tawu dahil nagsugu si Hari Isikyas danga sida magsagut.

³⁷ Bag-u ginisi nida ni Ilyakim, ni Sibna, ag ni Huwa kanda manga rutay dahil sa karukuan, ag nag-atag sida sa kan Isikyas ag sinabi nida ti manga pagsabihun kumandir.