2 Hari 17 - Hanunuu

Kay Maghari ni Husyas sa Israil

¹ Naghari sa Israil si Husyas kay anak ni Ila katpung 12 pag timpu kay maghari ni Akas sa Huda. Sa Samarya pag nangulian si Husyas, naghari siya sa sulud siyam ka timpu.

² Daut kay binuwat sa magbantay Panginuun, dapat balaw gid parihu sa binuwat manga nauna sa kanya pag manga Hari Israil.

³ Ginira ni Hari Salmanisir taga Asirya si Husyas. Sinakup niya siya ag pinabayad buhis.

⁴ Pagka sa uryan, unman yi magbayad buhis si Husyas parihu sa kay pagbuwatun kada timpu, ag nanhagad siya awat sa kan Hari Su taga Ihiptu. Pagka naalaman ni Salmanisir kay nagdaya ni Husyas, dinakup niya siya ag pinirisu.

⁵ Bag-u ginira hari Asirya ti buu Israil, ag sa sulud tulu ka timpu pinalibutan niya ti Samarya.

⁶ Pagka sa ikasiyam pag timpu kay maghari ni Husyas, nasakup hari Asirya ti Samarya, ag dinara niya ti manga taga Israil sa Asirya bilang manga bihag. Ipinatahan niya sida sa banwa Hala, sa manga rugar arani sa Sapa Habur sa Gusan, hanggan sa manga banwa manga Midyanita.

⁷ Nangyari inda sa manga taga Israil dahil nagkasala sida sa Panginuun nida Diyus, ti nagpalwas sa kanda sa Ihiptu, ag nagribri sa kanda sa kamang hari Ihiptu. Nagsamba sida sa manga diyus-diyusan

⁸ ag nagsunud sa manga pag-ugaliun manga nasyun ipinalayas Panginuun sa panab-anan nida. Nagsunud diman sida sa manga pag-ugaliun itinudlu manga hari Israil.

⁹ Nagbuwat sida lihim pag manga bagay laban sa Panginuun nida Diyus. Nagbuwat diman sida manga simbahan sa abwat pag manga rugar una naan sa Israil, ginan sa dariit pag manga baryu tugka sa daraka pag manga banwa may alad batu.

¹⁰ Nagpatindug sida aramirawan pag manga batu hanggan manga tulduk tanda diyusa si Asira sa kada babaw tagudtud ag sa kada sirung maraybung pag puun kayu.

¹¹ Nagsunug sida manga kamangyan sa kada simbahan sa abwat pag manga rugar, parihu sa binuwat manga nasyun ipinalayas Panginuun sa panab-anan nida. Nagbuwat sida daut pag manga bagay pag-ikagalit Panginuun.

¹² Nagsamba sida sa manga diyus-diyusan una magsabi ti Panginuun, “Danga kamu magsamba sa manga diyus-diyusan.”

¹³ Pagpasandaman pirmi Panginuun ti Israil ag Huda sa panab-anan manga purupita ag manughula: “Pagpatlikud yi kamu sa kanyu daut pag manga ugali. Tupada niyu kang manga sugu hanggan ti manga surundanun sa tanan Kasuguan ti pag-ipatupad niku sa kanyu manga ginurang, ag ipinakaun niku sa kanyu sa panab-anan niku manga manugsirbi pag manga purupita.”

¹⁴ Dapat unman sida magtupad. Maganit kanda manga ulu parihu sa kanda manga ginurang unman magsarig sa Panginuun nida Diyus.

¹⁵ Ipinurya nida kay manga surundanun hanggan kasunduan kay binwat sa kanda manga ginurang, binaliwala nida ti manga pasandam sa kanda. Sinunud nida ti manga unman may pulus pag manga diyus-diyusan, ag sida nagbaliw diman unman may pulus. Sinunud nida ti manga nasyun sa kanda sangput una pagsabihan sida Panginuun danga magsunud. Binwat gid nida ti pag-irangan Panginuun pag manga bagay kanda buwatun.

¹⁶ Ipinurya nida ti tanan pag sugu Panginuun nida Diyus, ag naghistuda sida duwa ka tinday baka-baka para sa kanda sadili, hanggan tulduk tanda diyusa si Asira. Nagsamba sida sa tanan pag bagay sa langit hanggan sa kan Baal.

¹⁷ Isinagda nida kanda manga anak sa apuy; nagpaingana sida sa manga manugpintu hanggan sa manga pandaniwan, ag ipinahintulut nida kanda sadili sa pagbuwat daut sa magbantay Panginuun, ag ikinagalit inda Panginuun.

¹⁸ Nangisug gid ti Panginuun sa manga taga Israil ag pinaighit niya sida sa kanda rugar pakarayu sa atubangan niya. Ti lahi lang ni Huda ti nasawad,

¹⁹ ag una ngani ti Huda unman diman nagsunud sa manga sugu Panginuun nida Diyus. Sinunud nida ti manga ugali paturun sa kanda manga taga Israil.

²⁰ Nakan ipinurya Panginuun ti tanan nasakupan Israil. Pinarusahan niya sida, ipinakaun sida sa manga maggira sa kanda tugka sa pinaighit niya sida sa kanda rugar pakarayu sa atubangan niya.

²¹ Pagka ipinablag Panginuun ti Israil sa kaharian ni Dabid, binuwat hari manga taga Israil si Hirubuam kay anak ni Nabat. Ginarya ni Hirubuam ti manga taga Israil sa pagpatlikud sa Panginuun, ag itinukmud niya sida sa pagbuwat daka pag kasalanan.

²² Nagparargu sa pagsunud ti manga taga Israil sa manga kasalanan ni Hirubuam, ag unman gid sida napatlikud inda,

²³ tugka sa pinaighit sida Panginuun sa kay atubangan, angay sa kay ipinasandam sa kanda sa panab-anan niya manga manugsirbi pag manga purupita. Nakan binihag Asirya ti nasakupan Israil, ag ati sida pag nangulian tugka taynguna.

Nangulian ti manga Taga Asirya sa Israil

²⁴ Nagpadara ti hari Asirya manga tawu sa Samarya ginan sa Babilunya, Kut, Aba, Hamat, ag Siparbaim, ag ipinatahan niya sida sa manga banwa sa Samarya agud ilisan ti manga taga Israil. Nakan sinakup nida ti Samarya hanggan ti iba waya manga banwa sa Israil.

²⁵ Sa umpisa nida mag-uli ati, unman yi sida nagsamba sa Panginuun; nakan pinadaran-an sida Panginuun manga liyun ag pinanmatay ti iba sa kanda.

²⁶ Inda pag nangyari ibinarita sa hari Asirya: “Ti manga tawu kanmu ipinadara ag ipinatahan sa manga banwa Samarya unman may alam sa kasuguan diyus sa tunda pag rugar. Nakan pinadaran-an niya sida manga liyun ag pinanmatay ti iba sa kanda, dahil unman gid sida may alam sa kasuguan.”

²⁷ Nagsugu rargu ti hari Asirya, “Pabalikan sa Samarya ti usa sa manga manughandug kanta binihag. Ati siya pag mangulian hampay manudlu sa manga tawu nu hintay ti kasuguan diyus sa tunda pag rugar.”

²⁸ Nakan ti usa sa manga manughandug binihag binmalik sa Samarya ag ati pag nangulian sa Bitil, ag tinutudluan niya ti manga tawu nu kabitay magsamba sa Panginuun.

²⁹ Dapat tunda pag tuhay-tuhay manga gurupu tawu parargu nagbuwat kanda manga diyus-diyusan sa kada banwa nida pag-ulian. Ipinauli nida kanda manga diyus-diyusan sa manga simbahan sa abwat pag manga rugar buwat manga taga Samarya.

³⁰ Ti ginan sa Babilunya nagbuwat kanda diyus-diyusan si Sukut Binut. Ti ginan sa Kut nagsamba sa kanda diyus-diyusan si Nirgal. Ti ginan sa Hamat nagsamba sa kanda diyus-diyusan si Asima.

³¹ Ti ginan sa Abim nagsamba sa kanda diyus-diyusan si Nibas ag si Tartak. Ti ginan sa Siparbaim nagsamba sa kanda diyus-diyusan si Adramilik ag si Anamilik; sinunug waya nida kanda manga anak bilang sagda sa inda pag manga diyus-diyusan.

³² Nagsamba sida sa Panginuun, dapat pinili nida ti manga manughandug ginan sa kanda pag tawu hampay manhandug sa manga simbahan sa abwat pag manga rugar.

³³ Nagsamba sida sa Panginuun, dapat nagsamba diman sida sa kanda sadili manga diyus angay sa kinaugalian manga nasyun kanda gininanan.

³⁴ Hanggan taynguna pagbuwatun diman nida inda. Unman tutuu kanda magsamba sa Panginuun, ag unman sida magtupad sa manga sugu, manga surundanun, manga pag-itudlu, ag manga kasuguan ipinakaun Panginuun sa manga linahi ni Hakub, kay iningarnan Israil.

³⁵ Pagka nagbuwat ti Panginuun kasunduan sa manga taga Israil, nagsugu siya sa kanda: “Danga kamu magsamba ngatay magsirbi sa manga diyus-diyusan, ngatay maghandug sa kanda.

³⁶ Aku lang kanyu sambahun, ti Panginuun, ti nagpalwas sa kanyu sa Ihiptu sa panab-anan niku daka pag kamaskihan. Aku lang ti dapat niyu sambahun ag handugan.

³⁷ Kailangan tupadun niyu pirmi kang manga sugu, manga surundanun, manga pag-itudlu, ag manga kasuguan kang isinurat para sa kanyu. Danga gid kamu magsamba sa iba pag manga diyus.

³⁸ Danga niyu pagkalimti kang kasunduan sa kanyu, ag danga kamu magsamba sa iba pag manga diyus.

³⁹ Aku lang gid kanyu sambahun, ti Panginuun niyu Diyus, dahil aku ti manribri sa kanyu ginan sa tanan niyu manga kalaban.”

⁴⁰ Dapat tunda pag manga tawu unman namatingi sa Panginuun, nu unman naparargu di sida sa pagbuwat kanda daan manga kinaugalian.

⁴¹ Mintaras magsamba sida sa Panginuun, magsamba diman sida sa kanda manga diyus-diyusan. Ag hanggan taynguna imaw di inda ti pagbuwatun nida manga linahi.