2 Hari 16 - Hanunuu

Kay Maghari ni Akas sa Huda

¹ Naghari sa Huda si Akas kay anak ni Hutam katpung ika-17 pag timpu kay maghari ni Pika, anak ni Rimalya, sa Israil.

² Si Akas 20 ka timpu kay idad kay naghari. Sa Hirusalim siya nangulian, naghari siya sa sulud 16 ka timpu. Daut kay binuwat sa magbantay Panginuun niya Diyus, balaw parihu sa binuwat niya ginurang ni Dabid.

³ Nagsunud siya sa pag-ugaliun manga hari Israil, ag una ngani kay anak ihinandug niya sa apuy. Hinuwad niya ti mayagting pag manga pagbuwatun manga nasyun ipinalayas Panginuun sa panab-anan manga Israilita.

⁴ Nagsagda siya manga handug ag nagsunug manga kamangyan sa manga simbahan sa abwat pag rugar, sa babaw manga bantud ag sa sirung kada maraybung pag kayu.

⁵ Pagka maghari si Akas sa Huda, nan-gira sa Hirusalim si Hari Risin taga Aram ag si Hari Pika taga Israil, kay anak ni Rimalya, ag pinalibutan nida inda. Dapat unman nida natalu si Akas.

⁶ Sa ati pag udas, nabawi ni Hari Risin taga Aram ti Ilat sa pagpaighit sa nasakupan Huda. Bag-u napahalin atabug sa Ilat ti iba manga Aramiyu, ati sida pag nangulian taynguna tugka.

⁷ Nagsugu si Akas manga manugbarita agud ibarita ti kaindaay pag tultulanun sa kan Hari Tiglat Pilisir taga Asirya: “Aku kanmu suruguun, ribrihan nimu aku sa kamang hari Aram ag sa hari Israil magpan-gira sa kangku.”

⁸ Bin-ul ni Akas ti pilak ag gintu sa Balay Diyus Panginuun hanggan sa haramnuan sa balay hari, bag-u ipinadara inda sa hari Asirya bilang pakaun.

⁹ Nagpasnu ti hari Asirya sa pakihampang ni Akas, nakan ginira niya ti Damasku ag nasakup inda. Dinara niya sa Kir kay manga nasakupan siyun bilang manga bihag, ag minatay niya si Risin.

¹⁰ Bag-u nag-atag si Hari Akas sa Damasku agud pasampak sa kan Hari Tiglat Pilisir taga Asirya. Pagka ati siya, may nakitan siya harandugan. Nakan pinadaran-an niya ti manughandug si Uryas huruwadan harandugan dara ti patigayun.

¹¹ Nagbuwat si Uryas harandugan angay sa ipinadara huruwadan sa kanya ni Akas, ag natapus niya ti harandugan unman waya nakabalik si Akas.

^12-13 Pagka rinmas-ug si Hari Akas ginan sa Damasku, nakitan niya ti harandugan. Nagpakarani siya sa harandugan ag nansagda handug pagsunugun ag handug pamakaun. Bag-u binuhusan niya ti harandugan handug irinmun ag winidwisikan dugu niya ihinandug pag hayup para sa mayad pag pakiusa.

¹⁴ Pagkatapus, ipinab-ul niya ti daan pag harandugan galang. Asan inda sa atubangan Panginuun ati sa karaw-an bag-u pag harandugan ag Balay Diyus Panginuun. Pagkatapus, ipinauli niya inda sa kanaway baliwa bag-u pag harandugan.

¹⁵ Nagsugu siya rargu sa kan Uryas ti manughandug, “Gamita ti bag-u pag harandugan sa pagsagda manga handug pagsunugun kada surip hanggan manga handug pamakaun kada yabi, hanggan diman ti manga handug irinmun. Inda pag manga handug ginan sa hari hanggan sa manga tawu. Widwisikan nimu sa bag-u pag harandugan ti dugu handug pagsunugun ag ti iba waya pag manga handug. Dapat ti galang pag harandugan buwatun niku sadili dararanginan.”

¹⁶ Ag binuwat ngani ni Uryas ti isinugu sa kanya ni Hari Akas.

¹⁷ Bag-u bin-ul ni Hari Akas ti manga lingub hanggan ti manga palanggana sa manga karusa paggamitun sa mag-akut danum sa Balay Diyus. Bin-ul diman niya ti daka pag kawa sukadan danum pag-ingarnan Dagat sa dayu manga tudu baka galang, ag ipinauli inda sa batu pag turungbawan.

¹⁸ Hampay makabaya ti hari Asirya, bin-ul ni Akas sa balay hari ti pamatakip paggamitun nu Sirang Pamahari ag tinalakpan ti lakawan manga hari Huda pasulud sa Balay Diyus.

¹⁹ Ti iba waya ka tultulanun tungkul sa maghari ni Akas, ag kay manga binuwat, nisurat sa Ribru Tultulanun manga Hari Huda.

²⁰ Pagka namatay si Akas, ilinbung siya sa lulubngan niya manga ginurang sa Banwa ni Dabid. Ag si Isikyas kay anak imaw maan ti nag-ublus sa kay pagka hari.