2 Hari 15 - Hanunuu

Kay Maghari ni Asariyas sa Huda

¹ Naghari sa Huda si Asariyas kay anak ni Amasiyas pagka ika-27 pag timpu kay naghari ni Hirubuam II sa Israil.

² Si Asariyas 16 ka timpu kay idad pagka naghari siya. Sa Hirusalim siya nangulian, ag naghari siya sa sulud 52 ka timpu. Kay ina si Hikulya taga Hirusalim.

³ Mayad kay binuwat ni Asariyas sa magbantay Panginuun, parihu sa binuwat niya ama ni Amasiyas.

⁴ Dapat unman niya ipinadaut ti manga simbahan sa abwat pag manga rugar, nakan parargu ati ti manga tawu sa maghandug manga handug ag magtuub manga kamangyan.

⁵ Pinakurianan Panginuun si Asariyas sa dilikadu pag sakit sa lukub tugka sa sirang namatay siya. Nangulian siya sa usa ka bukud pag balay. Si Hutam kay anak imaw ti nagdumara sa balay hari ag sa nasakupan Huda.

⁶ Ti iba waya ka tultulanun tungkul sa maghari ni Asariyas, ag ti tanan niya binuwat, nisurat sa Ribru Tultulanun manga Hari Huda.

⁷ Pagka namatay si Asariyas, ilinbung siya sa lulubngan niya manga ginurang sa Banwa ni Dabid. Ag si Hutam kay anak imaw ti nag-ublus sa kay pagka hari.

Kay Maghari ni Sakaryas sa Israil

⁸ Naghari sa Israil si Sakaryas kay anak ni Hirubuam II katpung 38 pag timpu kay maghari ni Asariyas sa Huda. Sa Samarya pag nangulian si Sakaryas, naghari siya sa sulud unum ka bulan.

⁹ Daut kay binuwat sa magbantay Panginuun, parihu sa binuwat niya manga ginurang. Unman siya nagpatlikud sa kasalanan ni Hirubuam kay anak ni Nabat, imaw ti pinun-an kasalanan manga taga Israil.

¹⁰ Taynguna, naggayak daut si Salum kay anak ni Habis laban sa kan Sakaryas. Minatay niya si Sakaryas sa atubangan manga tawu, ag inublusan niya sa pagka hari.

¹¹ Ti iba waya ka tultulanun tungkul sa maghari ni Sakaryas, nisurat sa Ribru Tultulanun manga Hari Israil.

¹² Nakan natupad ti pagsabihun Panginuun sa kan Hihu, “Kanmu manga linahi humari sa Israil tugka sa ikap-at pag sinulput.”

Kay Maghari ni Salum sa Israil

¹³ Naghari sa Israil si Salum kay anak ni Habis katpung 39 pag timpu kay maghari ni Usyas sa Huda. Sa Samarya pag nangulian si Salum, naghari siya sa sulud usa lang ka bulan.

¹⁴ Dahil rinmas-ug si Minahim kay anak ni Gadi sa Samarya ginan sa Tirsa, minatay niya si Salum. Bag-u siya ti nag-ublus sa pagka hari.

¹⁵ Ti iba waya ka tultulanun tungkul sa maghari ni Salum, hanggan kay gayak pagmatay sa kan Sakaryas, nisurat sa Ribru Tultulanun manga Hari Israil.

¹⁶ Ati katpung, ginira ni Minahim ti Tipsa hanggan ti manga rugar siyun sa kay sangput tugka sa Tirsa, dahil ti manga nasakupan nida dayu magpakumbaba sa kanya. Pinanmatay niya ti tanan pag nasakupan Tipsa, ag rinirian ti tiyan manga magbuduy pag manga babayi.

Kay Maghari ni Minahim sa Israil

¹⁷ Naghari sa Israil si Minahim kay anak ni Gadi katpung 39 pag timpu kay maghari ni Asariyas sa Huda. Sa Samarya pag nangulian si Minahim, naghari siya sa sulud 10 ka timpu.

¹⁸ Daut kay binuwat sa magbantay Panginuun. Sa buu niya maghari balaw siya nagpatlikud sa manga kasalanan ni Hirubuam kay anak ni Nabat, imaw ti pinun-an kasalanan manga taga Israil.

¹⁹ Taynguna, nag-atag si Hari Tiglat Pilisir taga Asirya sa Israil hampay man-gira. Pinakan-an ni Minahim si Tiglat Pilisir manga 35 ka tunilada pilak hampay awatan siya ni Tiglat Pilisir rumig-un waya gid kay maghari.

²⁰ Ti manga pilak bin-ul ni Minahim sa manga mayayaman. Pinilit niya ti kada usa sa kanda agud pumakaun tig 50 ka pulud pilak. Nakan nag-apas sa paggira ti hari Asirya ag nuli siya sa kay nasyun.

²¹ Ti iba waya ka tultulanun tungkul sa maghari ni Minahim, ag ti tanan niya binuwat, nisurat sa Ribru Tultulanun manga Hari Israil.

²² Pagka namatay si Minahim, si Pikaya kay anak imaw ti nag-ublus sa kay pagka hari.

Kay Maghari ni Pikaya sa Israil

²³ Naghari sa Israil si Pikaya kay anak ni Minahim katpung 50 pag timpu kay maghari ni Asariyas sa Huda. Sa Samarya pag nangulian si Pikaya, naghari siya sa sulud duwa ka timpu.

²⁴ Daut kay binuwat sa magbantay Panginuun. Unman siya nagpatlikud sa manga kasalanan ni Hirubuam kay anak ni Nabat, imaw ti pinun-an kasalanan manga taga Israil.

²⁵ Taynguna, naggayak daut si Pika kay anak ni Rimalya laban sa kan Pikaya. Tunda si Pika imaw ti kumandir manga sundalu ni Pikaya. Kaibahan sa 50 ka tawu sa Gilyad, minatay ni Pika si Pikaya hanggan si Argub ag si Aryi, ati sa may mapag-un pag bahagi balay hari sa Samarya. Ag inublusan ni Pika si Pikaya sa kay pagka hari.

²⁶ Ti iba waya ka tultulanun tungkul sa maghari ni Pikaya, ag ti tanan niya binuwat, nisurat sa Ribru Tultulanun manga Hari Israil.

Kay Maghari ni Pika sa Israil

²⁷ Naghari sa Israil si Pika kay anak ni Rimalya katpung 52 ka timpu kay maghari ni Asariyas sa Huda. Sa Samarya pag nangulian si Pika, naghari siya sa sulud duwapulu ka timpu.

²⁸ Daut kay binuwat sa magbantay Panginuun. Unman siya nagpatlikud sa kasalanan ni Hirubuam kay anak ni Nabat, imaw ti pinun-an kasalanan manga taga Israil.

²⁹ Pagka sa udas maghari si Pika, ginira ni Hari Tiglat Pilisir taga Asirya ti Israil, ag inagaw niya ti banwa Iyun, Abil Bit Maaka, Hanuwa, Kidis, ag Hasur. Naagaw diman niya ti Gilyad, Galiliya, ag ti tanan daga Niptali. Ag dinara niya kay manga nasakupan sa Asirya bilang bihag.

³⁰ Rargu naggayak daut si Husyas kay anak ni Ila laban sa kan Pika kay anak ni Rimalya. Minatay niya si Pika ag inublusan sa kay pagka hari. Nangyari inda pagka ika-20 pag timpu kay maghari ni Hutam, kay anak ni Usyas, sa Huda.

³¹ Ti iba waya ka tultulanun tungkul sa maghari ni Pika, ag ti tanan niya binuwat, nisurat sa Ribru Tultulanun manga Hari Israil.

Kay Maghari ni Hutam sa Huda

³² Naghari sa Huda si Hutam kay anak ni Asariyas sa ikadwa pag timpu kay maghari ni Pika, kay anak ni Rimalya, sa Israil.

³³ Si Hutam 25 ka timpu kay idad kay naghari. Sa Hirusalim siya nangulian, ag naghari siya sa sulud 16 ka timpu. Kay ina si Hirusa kay anak ni Saduk.

³⁴ Mayad ti binuwat ni Hutam sa magbantay Panginuun, parihu sa binuwat niya ama ni Asariyas.

³⁵ Dapat unman niya ipinadaut ti manga simbahan sa abwat pag manga rugar, nakan parargu ati ti manga tawu maghandug manga handug ag magtuub manga kamangyan. Si Hutam ti nagpatindug sa Kanaway pag Sabian Balay Diyus Panginuun.

³⁶ Ti iba waya ka tultulanun tungkul sa maghari ni Hutam, ag kay manga binuwat, nisurat sa Ribru Tultulanun manga Hari Huda.

³⁷ Pagka sa udas niya maghari, nag-umpisa ti Panginuun naggamit sa kan si Hari Risin taga Aram ag sa kan Pika kay anak ni Rimalya sa paggira sa Huda.

³⁸ Pagka namatay si Hutam, ilinbung siya sa lulubngan niya manga ginurang sa Banwa ni Dabid kay diman ginurang. Ag si Akas kay anak imaw ti nag-ublus sa kay pagka hari.