2 Hari 14 - Hanunuu

Kay Maghari ni Amasiyas sa Huda

¹ Naghari sa Huda si Amasiyas kay anak ni Huas sa ikadwa pag timpu kay maghari ni Hihuas sa Israil, anak ni Hihuahas.

² Si Amasiyas 25 ka timpu kay idad pagka naghari siya. Sa Hirusalim siya pag nangulian ag naghari sa sulud 29 ka timpu. Kay ina si Hihuadin taga Hirusalim.

³ Mayad ti binuwat ni Amasiyas sa magbantay Panginuun, dapat unman gid parihu sa binuwat niya ginurang ni Dabid. Ag sinunud niya kay ama si Huas.

⁴ Unman diman niya ipinadaut ti manga simbahan sa abwat pag manga rugar, nakan parargu ati ti manga tawu maghandug manga handug hanggan magtuub manga kamangyan.

⁵ Pagka marig-un yi kay maghari ni Amasiyas, pinanmatay niya ti manga takinan manga nagmatay sa kay ama hari.

⁶ Dapat unman niya minatay kanda manga anak, dahil angay sa nisurat sa Ribru Kasuguan ni Muysis, magsabi ti Panginuun, “Balaw kailangan matyun ti gurang dahil sa kasalanan nida manga anak, ag ti manga anak unman diman kailangan matyun dahil sa kasalanan nida gurang. Matyun lang ti tawu dahil sa kay sadili pag kasalanan.”

⁷ Si Amasiyas imaw ti nakamatay 10,000 Idumita sa luung pag-ingarnan Asin. Naagaw diman niya sa girahan ti Sila, ag iningarnan niya inda Huktiil, tugka taynguna imaw di inda kay ngaran.

⁸ Usa ka sirang, nagpadara si Amasiyas manga manugbarita tabug sa hari Israil sa kan Hihuas kay anak ni Hihuahas laki ni Hihu. Ginarya niya si Hihuas kuntay manlalabanan sida.

⁹ Dapat sinmagut si Hari Hihuas, “Ati sa Libanun may dugihan pag tanum nagpadara inda pag tultulanun sa kayu sidru: ‘Ipaasawa nimu kanmu anak babayi sa kang anak lalaki.’ Dapat may linmakaw simarun hayup ag tinatatataan niya ti dugihan pag tanum.

¹⁰ Amasiyas, tutuu natalu nimu ti Idum ag pag-ipadayaw nimu tunda. Pagbaya yi lang kawu sa kanmu nanalu ag asan lang kawu sa kanmu ulian. Hayga pagkaibgan gid nimu ti gulu, mandara lang kadamhakan sa kanmu hanggan sa Huda?”

¹¹ Dapat unman nagpatingi si Amasiyas, nakan ginira siya ni Hari Hihuas hanggan niya manga sundalu. Naglaban sida sa Bit Simis sakup Huda.

¹² Tinalu Israil ti Huda, ag ti kada usa ka sundalu taga Huda nalagiw nag-ululi.

¹³ Nadakup ni Hari Hihuas si Hari Amasiyas ati sa Bit Simis. Bag-u nag-ati si Hihuas sa Hirusalim ag dinaut niya ti manga alad batu ginan sa Sabian banwa Ipraim atabug sa Suuk pag Sabian banwa, 400 luk-an siku kay aba.

¹⁴ Pinanbuul niya ti tanan gintu, pilak, hanggan kagamitan kay nakitan sa Balay Diyus Panginuun ag sa haramnuan balay hari. Nagdara diman siya manga bihag sa kay nagbalik sa Samarya.

¹⁵ Ti iba waya ka tultulanun tungkul sa maghari ni Hihuas, ag kay bantug pag manga binuwat hanggan ti iba waya niya binuwat, hanggan kay naglaban sa kan Hari Amasiyas taga Huda, nisurat sa Ribru Tultulanun manga Hari Israil.

¹⁶ Pagka namatay si Hihuas, ilinbung siya sa lulubngan manga hari taga Israil sa Samarya. Ag kay anak si Hirubuam II imaw ti nag-ublus sa kanya sa pagka hari.

¹⁷ Nabuhi waya si Hari Amasiyas taga Huda 15 ka timpu pagkatapus mamatay si Hari Hihuas taga Israil.

¹⁸ Ti iba waya ka tultulanun tungkul sa maghari ni Amasiyas, nisurat sa Ribru Tultulanun manga Hari Huda.

¹⁹ May manga tawu ati naggayak sa pagmatay sa kan Amasiyas sa Hirusalim, nakan nagpalagiw siya tag sa Lakis. Dapat ipinausig nida siya sa Lakis, ag minatay siya ati.

²⁰ Kay bangkay ikinarga sa kabayu ag dinara pabalik sa Hirusalim, ag ilinbung sa lulubngan niya manga ginurang sa Banwa ni Dabid.

²¹ Ti inublus manga nasakupan Huda sa kan Amasiyas sa kay pagka hari kay anak si Asariyas kay idad 16 ka timpu.

²² Siya ti nanbawi Ilat ag ipinatindug maan inda pagkatapus mamatay kay ama si Amasiyas.

Kay Maghari ni Hirubuam II sa Israil

²³ Naghari sa Israil si Hirubuam II kay anak ni Hihuas katpung 15 pag timpu kay maghari ni Amasiyas, kay anak ni Huas, sa Huda. Sa Samarya pag nangulian si Hirubuam II, naghari siya sa sulud 41 ka timpu.

²⁴ Daut kay binuwat sa magbantay Panginuun. Unman siya nagpatlikud sa manga kasalanan ni Hirubuam kay anak ni Nabat, imaw ti pinun-an kasalanan manga taga Israil.

²⁵ Siya ti nagbawi manga rugar magkaapu kaybi Israil, ginan sa Libu Hamat tugka sa Dagat Namatay. Inda ti itinaratu Panginuun, ti Diyus Israil, sa panab-anan niya suruguun purupita si Hunas, kay anak ni Amitay taga Gat Hipir.

²⁶ Ipinahintulut Panginuun mangyari inda dahil nakitan niya ti masyadu pag aragwantahun manga taga Israil, una panawuhun una bukun panawuhun. Unman gid may makaawat sa kanda.

²⁷ Ag dahil balaw sinabi Panginuun duraun niya ti Israil sa kalibutan, irinibri niya sida sa panab-anan ni Hirubuam II, kay anak ni Hihuas.

²⁸ Ti iba waya ka tultulanun tungkul sa maghari ni Hirubuam II, ag kay bantug pag manga binuwat hanggan ti iba waya niya pag binuwat, hanggan kay nagbawi sa Damasku ag Hamat sakup waya kaybi Huda, nisurat sa Ribru Tultulanun manga Hari Israil.

²⁹ Pagka namatay si Hirubuam II, ilinbung siya sa lulubngan manga hari taga Israil. Ag si Sakaryas kay anak imaw ti nag-ublus sa kanya sa kay pagka hari.