2 Hari 13 - Hanunuu

Kay Maghari ni Hihuahas sa Israil

¹ Naghari sa Israil si Hihuahas kay anak ni Hihu katpung 23 pag timpu kay maghari ni Huas, kay anak ni Ahasiyas, sa Huda. Sa Samarya pag nangulian si Hihuahas, naghari siya sa sulud sampulu may pitu ka timpu.

² Daut kay binuwat sa magbantay Panginuun. Sinunud niya ti manga kasalanan ni Hirubuam kay anak ni Nabat, imaw ti pinun-an kasalanan manga taga Israil. Unman siya nagpatlikud sa inda pag kasalanan.

³ Nakan nangisug ti Panginuun sa Israil. Pagka dugay, ipinasakup sida sa kan Hari Hasail taga Aram ag sa kay anak sa kan Bin Hadad.

⁴ Nandarangin si Hihuahas sa Panginuun, ag pinatingihan siya Panginuun, dahil nakitan Panginuun ti masyadu pag unu-unu hari Aram sa Israil.

⁵ Pinakan-an sida Panginuun takinan ti nagribri sa kanda sa manga taga Aram. Nakan nangulian maan sa mahusay ti manga taga Israil parihu sa kaybi.

⁶ Dapat unman sida magpatlikud sa pagsunud sa manga kasalanan magtal-anakan ni Hirubuam, imaw ti dahilan nida pagsimray. Unman diman nida pagdautun ti tulduk tanda diyusa si Asira sa Samarya.

⁷ Pagka sa uryan, ti nasawad sa kan Hihuahas ti 50 wadi ka manugkabayu, 10 ka kalisa, 10,000 ka sundalu, dahil ti iba pinanmatay hari Aram, parihu sa galbuk tinatatataan sida.

⁸ Ti iba waya ka tultulanun tungkul sa maghari ni Hihuahas, ag kay bantug pag manga binwat hanggan ti tanan niya binuwat, nisurat sa Ribru Tultulanun manga Hari Israil.

⁹ Pagka namatay si Hihuahas, ilinbung siya sa linubngan niya manga ginurang sa Samarya. Ag si Hihuas kay anak imaw ti nag-ublus sa kay pagka hari.

Kay Maghari ni Hihuas sa Israil

¹⁰ Naghari sa Israil si Hihuas kay anak ni Hihuahas katpung 37 pag timpu kay maghari ni Huas sa Huda. Sa Samarya pag nangulian si Hihuas, naghari siya sa sulud 16 ka timpu.

¹¹ Daut kay binuwat sa magbantay Panginuun. Unman siya nagpatlikud sa manga kasalanan ni Hirubuam kay anak ni Nabat, ag siya ti pinun-an kasalanan manga taga Israil.

¹² Ti iba waya ka tultulanun tungkul sa maghari ni Hihuas, ag kay bantug pag manga binuwat hanggan ti tanan niya binuwat, hanggan kay maggira sa kan Hari Amasiyas taga Huda, nisurat sa Ribru Tultulanun manga Hari Israil.

¹³ Pagka namatay si Hihuas, ilinbung siya sa Samarya, ati sa lulubngan manga hari taga Israil. Ag kay anak si Hirubuam II imaw ti nag-ublus sa kanya bilang hari.

Namatay si Ilisyu

¹⁴ Katpung buhi waya si Hari Hihuas, nasakit si Ilisyu ag ga mamatay yi gid siya. Nag-ati si Hari Hihuas sa kanya ag nanlumi sa kanya. Magsabi si Hihuas, “Amang niku, Amang niku! Ti manga kalisa ag manga manugkabayu taga Israil!”

¹⁵ Magsabi si Ilisyu, “Pagbuul kawu pamana hanggan manga baslay.” Ag sinunud inda ni Hihuas.

¹⁶ Bag-u sinabihan siya ni Ilisyu, bitbita kay pamana. Pagka binitbit niya inda, hiniyaptan ni Ilisyu kay kamang

¹⁷ ag sinabihan siya, “Bukasi ti gaha sa butlakan baliwa.” Ag binukasan niya inda. Bag-u sinabihan siya ni Ilisyu pagpana siya. Pagka nagpana siya, magsabi si Ilisyu, “Tunda pag baslay tanda kuntay papanaluhun kawu Panginuun laban sa Aram. Rurisun nimu ti tanan manga Aramiyu sa Apik.”

¹⁸ Sinabihan maan ni Ilisyu si Hihuas kuntay pagbuul manga baslay. Pagka nakab-ul siya, magsabi si Ilisyu, “Panaan sa daga.” Ag pinana niya ti daga tulu ka bisis, bag-u nag-apas siya.

¹⁹ Nagalit si Ilisyu sa kanya ag magsabi, “Mana lima ngatay unum ka bisis nimu inda pinana hampay maruris nimu ti tanan Aramiyu. Dapat taynguna, matalu nimu sida tulu lang ka bisis.”

²⁰ Pagka sa uryan, namatay si Ilisyu ag ilinbung. Kada timpu may gurupu manga taga Muab magpan-gira sa Israil.

²¹ Kas-a ginan, may manga taga Israil manlubung mana namatay. Dapat pagka nakakit sida gurupu manga taga Muab magpan-gira, nagdaldali isinukad nida ti bangkay sa lukib naglubngan sa kan Ilisyu bag-u nalagiw. Pagka nid-ut ti bangkay sa manga but-ul ni Ilisyu, nabuhi ti namatay ag tinmindug.

²² Tinalu ni Hari Hasail taga Aram ti Israil sa tanan pag udas sa kay maghari ni Hihuahas.

²³ Dapat kinaawaan ag inalaala sida Panginuun dahil sa kanda kasunduan ni Abraham, ni Isaak, ag ni Hakub. Hanggan taynguna unman niya sida rinuris ngatay pinaighit sa kanda rugar pakarayu sa kay atubangan.

²⁴ Namatay si Hari Hasail taga Aram, ag si Bin Hadad kay anak imaw maan ti nag-ublus sa kay pagka hari.

²⁵ Natalu ni Hihuas ti Aram tulu ka bisis, nabawi niya sa kan Bin Hadad ti manga banwa inagaw ni Bin Hadad ama si Hasail katpung nanlaban kay ama si Hihuahas.