2 Hari 12 - Hanunuu

Kay Maghari ni Huas sa Huda

¹ Naghari sa Huda si Huas sa ikapitu pag timpu katpung maghari si Hihu sa Israil. Sa Hirusalim mag-uli si Huas, ag naghari siya sa sulud upatpulu ka timpu. Kay ina si Sibya taga Biirsiba.

² Matadlung kay binuwat sa magbantay Panginuun habang buhi siya, dahil tinudluan siya ni Hihuyada.

³ Dapat unman niya ipinadaut ti manga simbahan sa abwat pag manga rugar, nakan parargu ti manga tawu maghandug ati ag magtuub manga kamangyan.

⁴ Magkun si Huas sa manga manughandug, “Tipunun niyu ti tanan kuwarta dinara sa Balay Diyus Panginuun bilang handug: ti kuwarta linikum sa sinsus, ti kuwarta bayad sa taratu, ag ti kuwarta handug buluntad.

⁵ Gamita niyu tunda tanan sa pagpahiwat Balay Diyus.”

⁶ Dapat tugka sa ika-23 pag timpu kay maghari ni Huas, unman waya gid magkahiwat manga manughandug ti Balay Diyus.

⁷ Nakan ipinatawag ni Hari Huas si Hihuyada ag ti iba waya pag manga manughandug ag pinaingana, “Hayga unman waya niyu paghiwatun ti Balay Diyus? Kainda ginan danga yi niyu paggastusa ti kuwarta sa kanyu sadili pag manga kailangan. Kailangan gastusun inda tunda sa pagpahiwat Balay Diyus.”

⁸ Nagpasnu ti manga manughandug ag nagpasnu diman sida balaw yi sida mangulikta kuwarta ginan sa manga tawu ag balaw diman sida ti mamahiwat Balay Diyus.

⁹ Nam-ul si Hihuyada kahun ag tinuhuan niya kay taklub tunda. Bag-u ipinauli niya tunda sa saruy harandugan, sa sikun baliwa nu magsaka sa Balay Diyus Panginuun. Nu may magpakaun ngani kuwarta sa Balay Diyus, ti manga manughandug ti magtanud sa sabian imaw ti magsukad inda sa kahun.

¹⁰ Nu mayamu yi ti kuwarta sa kahun, mag-atag ti manugsurat hari hanggan ti pangulu manughandug bag-u pagbilangun nida inda, pagkatapus pag-isukad nida sa manga bay-ung.

^11-12 Rargu pag-ipakaun nida ti kuwarta sa manga manug-asikasu sa pagpahiwat Balay Diyus. Pag-ibayad nida inda sa manga manugtarabahu sa Balay Diyus Panginuun — sa manga manug-alistu manga kayu ag manga batu, ag sa manga maghiwat Balay Diyus ag sa manga alad batu inda. Kay iba pag kuwarta pag-ibili nida sa manga kayu ag manga batu tinapyas yi, manga pag kailanganun sa pagpahiwat Balay Diyus. Ag pagbayadan nida ti iba waya pag manga garastusan sa pagpahiwat.

¹³ Ti kuwarta ipinakaun sa Balay Diyus unman ginamit sa pagpabuwat pilak pag ungut, manga pamulud sa mitsa, manga malukung, manga budyung, ngatay una unu pag gamit manga gintu ngatay pilak para sa Balay Diyus Panginuun.

¹⁴ Nu unman pag-ibayad inda sa manga manugtarabahu sa Balay Diyus ag sa manga garamitun.

¹⁵ Unman yi hinanapan listahan manga nagastus ti manga manug-asikasu sa pagpahiwat dahil masarigan sida.

¹⁶ Ti kuwarta ipinakaun kaibahan ti manga handug bayad sa kasalanan ag handug sa paglumpiyu unman isinukad sa kahun ati sa Balay Diyus Panginuun, dahil para lang tida sa manga manughandug.

¹⁷ Ati pag udas, si Hari Hasail taga Aram nan-gira sa Gat ag naagaw niya inda. Bag-u nagbalak diman siya girahun ti Hirusalim.

¹⁸ Tinipun ni Hari Huas ti tanan manga bagay ihinandug niya manga ginurang sa Panginuun, hanggan diman kanya pag ihinandug. (Ti manga ginurang ni Huas ti naghandug tunda pag manga bagay sida ni Husapat, ni Hihuram, ag ni Ahasiyas, inda sida manga hari sa Huda.) Inda tanan ipinadara ni Huas kan Hasail, hanggan ti tanan manga gintu asan sa manga haramnuan Balay Diyus Panginuun ag sa balay hari. Nakan unman yi nan-gira si Hasail sa Hirusalim.

¹⁹ Ti iba waya ka tultulanun tungkul sa maghari ni Huas, ag ti tanan niya binuwat, nisurat sa Ribru Tultulanun manga Hari Huda.

²⁰ Pagka sa uryan, naglaban laban kan Hari Huas kay manga takinan, ag minatay nida siya sa Bit Millu, sa dalan atabug sa Sila.

²¹ Ti nagmatay sa kanya pag manga takinan sida ni Husakar kay anak ni Simiyat ag si Hihusabad kay anak ni Sumir. Ilinbung siya sa lulubngan niya manga ginurang sa Banwa ni Dabid. Ag si Amasiyas kay anak imaw ti nag-ublus sa kanya bilang hari.