2 Hari 11 - Hanunuu

Si Atalya ag si Huas

¹ Pagka naalaman ni Atalya namatay yi kay anak si Hari Ahasiyas taga Huda, nagpasya siya panmatyun niya ti tanan kaibahan sa magtal-anakan hari Huda.

² Dapat irinibri ni Hihusiba kay anak ni Hari Ahasiyas si Huas pagka maratyun yi hanggan ti iba waya pag manga anak hari. Si Hihusiba patar-ari ni Ahasiyas anak babayi ni Hari Hihuram. Itinagu niya si Huas hanggan kay manug-alaga sa anak sa usa ka sulud-sulud sa Balay Diyus nakan unman siya namatay.

³ Sa sulud unum ka timpu, ati napatagu sa Balay Diyus Panginuun si Huas hanggan kay manug-alaga sa anak habang si Atalya ti magpamahala bilang rayna sa Huda.

⁴ Pagka ikapitu pag timpu, ipinatawag ni manughandug Hihuyada ti manga kumandir manga manugbantay sa hari ag guwardiya sa balay hari para paatagun sa Balay Diyus Panginuun. Nagbuwat siya kasunduan sa kanda ag pagpasumpaun niya sida ati sa Balay Diyus Panginuun. Pagkatapus ipinakakit niya sa kanda ti anak hari.

⁵ Magsabi siya sa kanda, “Kaindaay ti buwatun niyu: Tuluha ka gurupu kanyu gurupu. Ti usa ka gurupu, magbantay nu Sirang Pamahari, imaw ti mamantay sa balay hari.

⁶ Kay usa waya ka gurupu mamantay sa Puwirtahan banwa Sur. Ag ti usa waya gid ka gurupu mamantay sa puwirtahan balay hari mangawat sa iba waya manga guwardiya ati.

⁷ Ti duwa ka gurupu balaw magbantay nu Sirang Pamahari, imaw ti mamantay sa Balay Diyus Panginuun hampay maalagaan ti hari.

⁸ Kailangan bantayan niyu kaayad ti hari, ag alistu kanyu manga armas, dasuna niyu siya una naan tabug. Matya niyu una si unu ti pumakarani sa kanyu.”

⁹ Binwat manga kumandir ti isinugu ni Hihuyada ti manughandug. Tinipun nida kanda manga tawuhan magguwardiya nu Sirang Pamahari, hanggan diman ti balaw magguwardiya sa tunda pag sirang, ag dinara nida sa kan Hihuyada.

¹⁰ Ipinakaun ni Hihuyada sa manga kumandir ti manga bangkaw ag manga panangga kaybi ni Hari Dabid, itinagu ati sa Balay Diyus Panginuun.

¹¹ Nag-alistu ti manga armadu pag manga guwardiya sa sangput Balay Diyus hanggan sa harandugan, agud alagaan ti hari.

¹² Ipinalwang ni Hihuyada si Huas ti anak hari ag kinurunahan. Pinakan-an niya siya kupya hanggan manga surundanun tungkul sa pagdumara hari, ag ibinarita siya ti hari. Pinayidan siya lana ulibu bilang pagkilala siya ti hari. Pagkatapus nagpalakpakan ti manga tawu ag namaragritan, “Mabuhi ti hari!”

¹³ Pagka nasaydan ni Atalya ti iringayan manga guwardiya hanggan manga tawu, nag-atag siya sa kanda ati sa Balay Diyus Panginuun.

¹⁴ Ag nakitan niya ati ti bag-u pag hari matindugan arani sa tulduk, angay sa kinaugalian sa udas pag-ipakilala ti hari. Asan sa tupad hari ti manga kumandir ag ti manga manugbudyung, ag ti tanan pag tawu ati maghuruyawan, magpatunug manga budyung. Pagka nakitan inda tanan ni Atalya, ginisi niya kay rutay, ag namagrit, “Manga madaya! Manga madaya!”

¹⁵ Sinugu ni Hihuyada ti manga kumandir manga sundalu, “Daran-a niyu sa luwas si Atalya. Danga niyu siya pagmatya sitay sa sulud Balay Diyus Panginuun. Ag matya niyu una si unu ti magkaibug manribri sa kanya.”

¹⁶ Nakan dinakup nida siya ag dinara sa luwas puwirtahan pag lakawan manga kabayu mag-atag sa balay hari, ag ati pag minatay nida siya.

Ti Bag-u pag manga Binwat ni Hihuyada

¹⁷ Ipinabwat ni Hihuyada ti hari hanggan ti manga tawu kasunduan sa Panginuun, agud sida nasakupan Panginuun. Katunda diman ti kasunduan tabug sa hari hanggan sa manga tawu.

¹⁸ Nag-ati ti tanan tawu sa balay ni Baal ag dinaut nida inda. Winayak nida ti manga harandugan, ti manga diyus-diyusan nida, ag minatay nida si Matan ti manughandug ni Baal sa atubangan manga harandugan. Namauli si Hihuyada manga guwardiya sa Balay Diyus Panginuun.

¹⁹ Iniba niya ti manga kumandir manga sundalu, ti manga sadili bantay hari, ti guwardiya sa balay hari, ag ti tanan pag tawu. Kanda itinibu ti hari sa balay niya ginan sa Balay Diyus Panginuun. Ati sida pag linmakaw sa puwirtahan manga guwardiya. Bag-u tinmukaw ti hari sa kay tukawan.

²⁰ Nagbaya ti manga tawu, ag may kahusayan yi ti banwa igu namatay si Atalya sa balay hari.

²¹ Pitu ka timpu kay idad ni Huas kay naghari.