2 Hari 10 - Hanunuu

Pinanmatay ti Magtal-anakan ni Akab

¹ May 70 ka linahi si Akab sa Samarya. Nakan namadara ati surat si Hihu sa manga may kangaranan sa banwa, hanggan sa manga takinan, ag sa manga manug-alaga sa kay manga linahi ni Akab. Kaindaay kay surat:

² “Kay manga linahi ni Hari Akab asan sa kanyu hanggan ti manga kalisa, ti manga kabayu, ti may alad batu pag banwa ag ti manga armas.

³ Nakan nu matanggap niyu inda pag surat, pagpili kamu mahimu buwatun hari ginan sa manga linahi ni Hari Akab, ag lumaban kamu sa kanmi agud baliwahan kay magtal-anakan.”

⁴ Dapat nadala gid sida ag magkun, “Nu ti duwa ngani ka hari unman nakatalu sa kanya, kita waya aw?”

⁵ Nakan ti manugpamahala sa balay hari, ti gubirnadur banwa, ti manga takinan, ti manga manug-alaga sa manga linahi ni Akab nanurat kan Hihu. Kaindaay kanda surat: “Manga suruguun nimu kami, ag buwatun nimi ti tanan nimu isugu. Balaw kami pumili tuhay pag hari; buwata ti mayad para sa kanmu.”

⁶ Sinagut ni Hihu kanda surat kaindaay: “Nu pabaliwa kamu sa kangku ag alistu sumunud sa kangku, pamuldi niyu liug ti manga linahi ni Akab ag daran-a niyu aldaw sa kangku kanda ulu sitay sa Hisriil, sa kainda diman pag udas.” Ti 70 ka linahi ni Hari Akab pag-alagaan manga kilala pag manga tawu sa banwa Samarya ginan sa anak waya sida.

⁷ Igu rinmas-ug ti surat ni Hihu, bin-ul nida ti 70 ka linahi hari ag minatay. Bag-u isinukad nida ti manga ulu sa manga baskit ag ipinadara sa kan Hihu sa Hisriil.

⁸ Pagka rinmas-ug ti nagdara, tinultulan niya si Hihu, “Ipinadara duy nida ti manga ulu manga linahi hari.” Nagsugu si Hihu, “Tumpuka tunda sa duwa ka tumpuk ati sa puwirtahan banwa, pabay-ani lang ati tugka sa surip.”

⁹ Pagka surip, linmuwas si Hihu bag-u tinmindug sa atubangan manga tawu ag magkun, “Unman kamu may kasalanan. Aku ti naggayak laban sa kang amu hanggan ti nagmatay sa kanya. Dapat si unu ti nagmatay inda sa kanda tanan?

¹⁰ Inda maisipan niyu ti tanan pagsabihun Panginuun laban sa magtal-anakan ni Akab matupad gid. Tinupad Panginuun kay pagsabihun sa panab-anan ni Ilyas kay suruguun.”

¹¹ Bag-u pinanmatay ni Hihu ti tanan katawuhan ni Akab sa Hisriil, hanggan kay manga takinan, manga ampud, ag kay manga manughandug. Unman gid may nasawad buhi sa kanda.

¹² Linmakaw si Hihu atabug sa Samarya. Habang maglakaw siya sa dalan, sa daga pag-ingarnan Tiripnan manga Manugbantay Karanidu,

¹³ nakitan niya ti manga katawuhan ni Hari Ahasiyas taga Huda. Namaingana siya, “Si unu kamu?” Sinmagut sida, “Manga katawuhan duy kami ni Ahasiyas, linmakaw kami hampay mangamusta sa manga linahi ni Hari Akab ag ni Rayna Hisibil.”

¹⁴ Sinugu ni Hihu kay manga tawuhan, “Daran-a sida buhi.” Nakan dinara ngani nida sida buhi sa usa ka bubun ati, ag pinanmatay nida sida — 42 sida tanan. Unman gid may sinawadan buhi si Hihu sa kanda.

¹⁵ Pag-ighit ni Hihu ati, nakitan niya si Hihunadab kay anak ni Rikab magras-ug sa pagsulang sa kanya. Kinamusta siya ni Hihu ag pinaingana, “Matinupadun aw kawu sa kangku parihu sa kang pagkamatinupadun sa kanmu?” Sinmagut si Hihunadab, “Hu duy.” Magkun si Hihu, “Nu katida, haytag kanmu kamang.” Itinunghul ni Hihunadab kay kamang ag ipinasaka siya ni Hihu sa kay kalisa.

¹⁶ Magkun si Hihu, “Pagkuyug kawu sa kangku hampay makitan nimu kang pagkamatinupadun sa Panginuun.” Nakan sinmakay si Hihunadab nagkuyug sa kanya.

¹⁷ Pagras-ug ni Hihu sa Samarya pinanmatay niya ti tanan nasawad sa magtal-anakan ni Akab, angay sa sinabi Panginuun sa panab-anan ni Ilyas.

Pinanmatay ti manga Magsirbi kan Baal

¹⁸ Tinipun ni Hihu ti tanan tawu ag sinabihan, “Unman masyadu matinupadun si Akab sa kay pagsirbi kan Baal. Dapat aku, ipakakit niku matinupadun gid aku sa pagsirbi sa kanya.

¹⁹ Nakan paataytaga niyu sitay sa kangku ti tanan purupita hanggan manughandug ni Baal, ag ti tanan magsirbi sa kanya. Kailangan atay gid sida tanan, dahil manhandug aku daka pag handug para kan Baal. Ti unman umataytag ipamatay niku.” Dapat magpabalhinguun lang si Hihu hampay ipamatay niya ti manga magsirbi sa kan Baal.

²⁰ Magsabi si Hihu, “Manhiwat kita bukud pag tiripun para sa kadayawan ni Baal.” Nakan ipinaalam inda sa manga tawu.

²¹ Ipinatawag ni Hihu sa buu Israil ti tanan magsirbi sa kan Baal, ag nag-ati gid ti kada usa sa kanda. Sinmulud sida tanan sa simbahan ni Baal, ag napunu ti simbahan.

²² Magkun si Hihu sa manug-asikasu manga rutay pansamba, “Pasulungan ti manga rutay sa tanan mansamba kan Baal.” Nakan sinunud niya inda.

²³ Rargu napaslud si Hihu ag si Hihunadab kay anak ni Rikab sa simbahan ni Baal. Magsabi si Hihu sa manga manugsirbi ni Baal, “Pihuun niyu unman may malakayan sa kanyu manga tawu magsirbi sa Panginuun. Kailangan kamu lang ti manugsirbi kan Baal ti sitay.”

²⁴ Ag ati sa sulud simbahan, nansagda sida manga handug pagsunugun ag tuhay waya pag manga handug. Pinaulian yi daan ni Hihu manga 80 ka tawu sa luwas simbahan ag sinabihan, “Ipinakaun niku sida sa kanyu hampay matyun niyu. Una si unu sa kanyu ti pumabaya ag makapalagiw ti una di usa sa kanda, matyun niku.”

²⁵ Pagka natapus kay maghandug ni Hihu manga handug pagsunugun, sinugu niya ti manga guwardiya hanggan ti manga takinan, “Pagsulud kamu ag panmatya niyu sida! Danga niyu pagpabay-ani may makapalagiw sa kanda!” Nakan pinanmatay ngani nida sida sa panab-anan baladaw ag ipinanyamut kanda manga bangkay sa luwas. Bag-u napaslud sida sa pinakasulud-sulud baliwa simbahan ni Baal

²⁶ ag bin-ul nida ati ti manga aramirawan pag batu ag dinara sa luwas, bag-u inirub.

²⁷ Pagka natapus nida nadaut ti aramirawan pag batu ni Baal, tinumpag nida ti simbahan ni Baal, ag binuwat inda manga tawu urugatan hanggan kainda.

²⁸ Sa inda pag palakaw, dinura ni Hihu ti pagsamba kan Baal sa Israil.

²⁹ Dapat sinunud diman niya ti manga kasalanan ni Hirubuam kay anak ni Nabat, ti pagsamba sa gintu pag manga baka-baka sa Bitil hanggan sa Dan, imaw ti pinun-an kasalanan manga taga Israil.

³⁰ Magsabi ti Panginuun sa kan Hihu, “Mayad kanmu binuwat sa kang magbantay; sinunud nimu kang gustu mangyari sa magtal-anakan ni Akab. Dahil sa kanmu binuwat, pahariun niku kanmu manga linahi tugka sa ikap-at pag sinulput.”

³¹ Dapat unman nagtupad si Hihu sa kasuguan Panginuun, ti Diyus Israil, sa buu niya tagipusuun. Ag kay sinunud ti manga kasalanan ni Hirubuam, imaw ti pinun-an kasalanan manga taga Israil.

³² Sa tunda pag udas, amat-amat yi pagpadiitun Panginuun ti daga sakup Israil. Nab-ul ni Hari Hasail ti manga daga taga Israil

³³ sa butlakan Sapa Hurdan: ti bilug daga Gilyad, ti Basan, ag ti manga daga sa kanaway banwa Aruwir arani sa Luung Arnun. Inda pag manga rugar imaw ti pag-ulian kaybi lahi ni Gad, ni Rubin, ag ni Manasis.

³⁴ Ti iba waya ka tultulanun tungkul sa maghari ni Hihu, ag kay bantug pag manga binuwat hanggan ti tanan niya binuwat, nisurat sa Ribru Tultulanun manga Hari Israil.

³⁵ Pagka namatay si Hihu, ilinbung siya sa Samarya. Ag si Hihuahas kay anak imaw ti nag-ublus sa kay pagka hari.

³⁶ Naghari si Hihu sa Israil ati sa Samarya sa sulud 28 ka timpu.