2 Hari 1 - Hanunuu

Si Ilyas ag si Hari Ahasiyas

¹ Igu namatay si Akab, naglaban ti Muab sa Israil.

² Pagka sa usa ka sirang, nalagpak si Ahasiyas ginan sa gaha may alawat sa tungud pag sulud-sulud niya balay sa Samarya, ag nabalda siya. Nakan namasugu siya hampay mamaingana sa kan Baal Sibub ti diyus-diyusan taga Ikrun, nu ngatay mahulian waya siya.

³ Nakan magkun ti anghil Panginuun sa kan Ilyas taga Tisbi, “Sulanga nimu ti manga sinugu hari taga Samarya ag sabiha inda sa kanda: Hayga kamu mangatag mamaingana sa kan Baal Sibub, ti diyus-diyusan taga Ikrun? Unman yi aw lugud may Diyus sa Israil?

⁴ Nakan taynguna, sabihi niyu si Ahasiyas inda ngani ti pagsabihun Panginuun sa kanya, ‘Udyi gid kawu bumangun ginan sa kanmu igyaan. Pihu gid mamatay kawu!’ ” Siyun ginan, naglakaw yi si Ilyas.

⁵ Pagka sinabihan ni Ilyas ti manga sinugu, nagbalik sida sa hari. Nakan pinaingana sida hari, “Hayga kamu binmalik?”

⁶ Sinmagut sida, “May tawu duy nagsulang sa kanmi magkun siya pagbalik yi lang kami sa kanmu, bag-u sabihun sa kanmu inda ti pagsabihun Panginuun: Hayga namasugu kawu manga tawu hampay mamaingana sa kan Baal Sibub, ti diyus-diyusan taga Ikrun? Unman yi aw lugud may Diyus sa Israil? Nakan udyi gid kawu bumangun ginan sa kanmu igyaan. Pihu gid mamatay kawu!”

⁷ Nagpaingana ti hari sa kanda, “Kabitay kay histuda pag tawu ti nagsulang ag nagsabi sa kanyu?”

⁸ Magkun sida, “Bulbulin duy kay sulung rutay ag may huragkus paknul.” Nagsabi ti hari, “Si Ilyas duy tida taga Tisbi.”

⁹ Bag-u ipinaati hari ti usa ka takinan sundalu kaibahan ti 50 ka manga tawuhan hampay dakpun si Ilyas. Natakdan takinan sundalu si Ilyas matukawan sa babaw bungtud, magkun siya, “Suruguun Diyus, magbilin ti hari pag-ati kawu sa kanya.”

¹⁰ Magkun si Ilyas sa takinan sundalu, “Nu suruguun aku Diyus, umuran mana apuy ginan sa langit umirub sa kanmu hanggan sa 50 ka tawuhan nimu!” Nagras-ug ngani ti apuy ginan sa langit ag inirub ti takinan sundalu hanggan kay 50 ka tawuhan.

¹¹ Nagpadara maan ti hari usa ka takinan sundalu kaibahan ti 50 ka tawuhan hampay dakpun si Ilyas. Magkun ti takinan sundalu sa kan Ilyas, “Suruguun Diyus, magkun ti hari pag-ati kawu kadali sa kanya!”

¹² Nagsagut si Ilyas, “Nu suruguun aku Diyus, umuran mana apuy ginan sa langit umirub sa kanmu hanggan sa 50 ka tawuhan nimu!” Kadaka ngani nagras-ug ti apuy Diyus ginan sa langit ag inirub ti takinan sundalu hanggan kay 50 ka tawuhan.

¹³ Nagpadara maan ti hari kay ikatlu pag takinan sundalu kaibahan ti 50 ka tawuhan. Pagka nagras-ug tunda pag takinan sundalu sa kan Ilyas, nanikluhud siya bilang paggalang, ag magpaawa-awa magkun, “Suruguun Diyus, kaawai duy nimu aku hanggan kang manga tawuhan. Danga nimu kami pagmatya, kanmu manga suruguun.

¹⁴ Alam duy niku inirub apuy ginan sa langit ti duwa ka nag-una pag manga takinan sundalu hanggan ti tanan nida manga tawuhan. Dapat kaawai gid nimu kami!”

¹⁵ Nagbagaw ti anghil Panginuun sa kan Ilyas, “Pagkuyug kawu sa kanya, danga kawu magkadala.” Nakan nagkuyug ngani si Ilyas sa takinan sundalu atabug sa hari.

¹⁶ Pagka rinmas-ug si Ilyas sa hari magkun siya, “Inda ti pagsabihun Panginuun: ‘Hayga nagpadara kawu manga sugu hampay mamaingana sa kan Baal Sibub, ti diyus-diyusan taga Ikrun? Unman yi aw lugud may Diyus sa Israil kanmu mapaingan-an? Dahil sa kamu binwat, udyi gid kawu bumangun ginan sa kanmu igyaan. Pihu gid kawu mamatay.’ ”

¹⁷ Nakan namatay ti hari parihu sa sinabi Panginuun sa panab-anan ni Ilyas. Dahil sa unman may anak lalaki si Ahasiyas, si Huram kay patar-ari imaw ti nag-ublus sa kanya bilang hari. Naghari si Huram sa ikadwa pag timpu sa kay maghari ni Hihuram kay anak ni Hari Husapat taga Huda.

¹⁸ Ti iba waya ka tultulanun tungkul sa maghari ni Ahasiyas, hanggan kay manga binuwat, nisurat sa Ribru Tultulanun manga Hari Israil.