1 Tisalunika 5 - Hanunuu

Pagpirmi Alistu sa kay Pagras-ug Panginuun

¹ Udyi kailangan aku magsurat waya sa kanyu nu kapira pag mangyari inda pag manga bagay aban.

² Dahil alam yi waydi niyu ti pagras-ug kaudasan Panginuun parihu sa pagras-ug mananakaw sa yabi.

³ Nu pagkumnun manga tawu, “Kita may kahusayan unman may pagkadalaan!” tunda ngap bigla pag mangyari ti kadamhakan. Dayu gid sida umiwas dahil inda mangyari parihu sa udas nu magpanamdam ti babayi manganak.

⁴ Dapat kamu, manga patar-ari, balaw yi sa kadudulman, nakan kamu dayu mabiglaan sa udas ati nu rumas-ug parihu sa mananakaw.

⁵ Kamu tanan taga karayawan, baliwa sa sirang. Balaw kita taga kadudulman, balaw baliwa sa yabi.

⁶ Nakan ngani kailangan pirmi kita maimatahan, pirmi alistu, pagmapininsarun kanta pag-iisip. Balaw parihu sa iba.

⁷ Ugali tawu nu yabi magkaturug, ugali diman tawu nu yabi maglangu.

⁸ Unman kita kailangan maglangu, dahil kita baliwa sa sirang. Buwatun nita panangga kanta pagsarig hanggan kanta pagmahal. Buwatun nita ga kalu baul kanta pagsarig sa kay pakaun Diyus karibrihan sa kanta.

⁹ Binutung kita Diyus balaw hampay parusahan, bagkus ngap hampay kita kay iribri nita Panginuun Hisu-Kiristu.

¹⁰ Namatay siya para sa kanta hampay kita mabuhi kaibahan niya una kita buhi waya una kita namatay yi.

¹¹ Nakan parargu kamu sa magpaalalahanan hanggan sa magpararig-unan sa usa kag sa usa parihu sa pagbuwatun yi waydi niyu taynguna.

Pangatapusan pag manga Paanyu

¹² Kami mana magpaanyu waya sa kanyu, manga patar-ari, galanga niyu ti manga magpangabudlay dahil sa kanyu, ti manga pinili Diyus hampay sida ti manugpatigayun ag manugtudlu sa kanyu.

¹³ Ipakakit niyu sa kanda ti lubus paggalang hanggan pagmahal dahil sa kanda buruwatun. Mabuhi kamu sa may kahusayan sa usa kag sa usa.

¹⁴ May sabihun waya gid kami sa kanyu, manga patar-ari. Paalalahani gid niyu ti manga bugyahin, pabisuga niyu ti manga malumuy kay sarig, sagabaya niyu ti udyi kakaya, agwantahi niyu sida tanan.

¹⁵ Una si unu sa kanyu danga magbalus sa manga magbuwat daut sa kanyu, bagkus ngap parargu kamu sa pagbuwat mayad sa usa kag sa usa hanggan sa tanan tawu.

¹⁶ Pagbaya kamu pirmi.

¹⁷ Danga mag-ampu sa magdarangin.

¹⁸ Una hintay ti mangyari pagpasalamat kamu sa Diyus. Dahil katida kay gustu Diyus kanyu buwatun nu kamu magpakiusa sa kan Kiristu Hisus.

¹⁹ Danga niyu amparahun ti Ispiritu Banal.

²⁰ Danga pagpadamhakan niyu ti ipinurupita.

²¹ Suyasida niyu ti tanan manga bagay ag adia ti mayad.

²² Pagpakarayu kamu sa una hintay pag kalasi kadautan.

²³ Pag-idarangin niku kamu hampay kamu lubus pasakup sa Diyus. Siya yi ngani tigpakaun kahusayan. Pag-idarangin diman niku kamu hampay alagaan niya kanyu buu pagkatawu sa unman may kadautan una kanyu tagipusuun, una kanyu karadwa, una kanyu bilug hanggan sa ud rumas-ug kanta Panginuun Hisu-Kiristu.

²⁴ Masarigan ti nagpili sa kanyu. Pihu tupadun niya kay ginayak.

²⁵ Kami pagdaranginan waydi niyu, manga patar-ari.

²⁶ Pagparaingan-an kamu pag may pagmahal sa tanan manga patar-ari.

²⁷ Kanmi pagsabihun sa kanyu sa ngaran nita Panginuun, basaha niyu inda pag surat sa pagdungugun tanan patar-ari.

²⁸ Pagsa kanyu ti papalad nita Panginuun Hisu-Kiristu.