1 Tisalunika 4 - Hanunuu

Ti Mayad pag Ugali sa kay Magbantay Diyus

¹ Usa sa siyun, manga patar-ari, magpaalam waya mana kami kanmi paanyu sa kanyu dahil sa kanta pakiusa sa Panginuun Hisus. Kailangan kanyu ugali pag-angay sa kanyu nataw-an ginan sa kanmi hampay lalu waya sa ikabaya Diyus. Imaw yi kanyu ugali dapat paglalu waya gid sa ikabaya Diyus.

² Alam diman niyu ti manga itinudlu nimi sa kanyu ginan sa Panginuun Hisus.

³ Inda yi ngani ti kagustuhan Diyus, paglubus yi kamu pasakup sa Diyus ag pagpakarayu kamu sa kahalayan.

⁴ Kailangan pagmadunung una si unu pag tawu magdahan sa kanda buut mag-asawa, dagpadara sa sadili niya daut kagustuhan hampay mayad ti kahamtangan sa atubangan Panginuun ag sa tawu.

⁵ Danga kay sadili daut pag kagustuhan ti pagtupada, danga parihu sa ugali manga unman magsarig sa Diyus.

⁶ Danga kamu magbuwat daut ngatay magdaya sa kanyu kaparihu, parihu sa magpanguragin niya asawa. Kanmi yi sinabi ag ipinaalam inda sa kanyu kaybi di waya, dahil parusahan Diyus una si unu ti magbuwat katunda.

⁷ Kita kay pinili Diyus hampay balaw mag-ugali sa mahalay nu unman hampay lubus kita sakup sa Diyus.

⁸ Nakan nu may tawu magpasipala sa inda pag manga paanyu, balaw tawu kay pag-ipasipala nu unman ti Diyus, imaw ti namakaun kay Ispiritu Banal sa kanyu.

⁹ Unman yi kailangan tudluan waya nimi kamu tungkul sa pagmahal sa manga patar-ari sa Panginuun, dahil tinudluan yi waydi kamu Diyus, hampay kamu magmalahalan sa usa kag sa usa.

¹⁰ Inda ngani kanyu yi pagbuwatun sa tanan manga patar-ari kabuuhan daga sa Masidunya. Madi katida, kanmi waya pagsabihun sa kanyu padakaa waya gid niyu kanyu pagmahal.

¹¹ Pagsikapi niyu ti ugali mabuut. Sarangwun niyu kanyu sadili buwatun. Pagbudlay kamu sa kanyu pangabuhi parihu sa kanmi sinabi yi sa kanyu.

¹² Nu katunda, galangun kamu manga tawu udwaya magkilala sa Panginuun. Usa sa siti, danga niyu isarig sa iba kanyu pangabuhi.

Ti Pagras-ug Aban Panginuun

¹³ Manga patar-ari, gustu nimi pagmaalaman niyu kay tutuu tungkul sa manga namatay yi, hampay kamu dayu maaburidu parihu sa tawu unman may pag-asa.

¹⁴ Nagpaniwala kita si Hisus namatay bag-u nabuhi siya uman. Nakan ngani katunda diman kita magpaniwala tungkul sa tanan manga magsarig sa kan Kiristu, nu sida namatay yi, buhiun waydi sida Diyus hampay sida minsan yi sa kan Hisus.

¹⁵ Inda kay tudlu Panginuun kanmi pagsabihun sa kanyu magkun, nu sa kay pagras-ug aban Panginuun, kita ti manga buhi waya dayu gid umuna sa manga namatay yi.

¹⁶ Ati katpung pag udas aban, dumugsun ti Panginuun ginan sa langit may matnug pag sugu. Madnugan nita bumagaw ti pangulu anghil ag tumunug ti turumpita Diyus. Bag-u ti manga namatay nu nagsarig sa kan Kiristu imaw ti buhiun dapu.

¹⁷ Kita ti manga buhi waya tipunun niya sa manga rurum ipaminsan sa manga nabuhi uman hampay sulangun ti Panginuun sa panungaan langit. Bag-u kaibahan yi niya kita sa kay arani hanggan aban.

¹⁸ Nakan ngani pagpalasulungan kamu sa usa kag sa usa dahil sa inda pag manga tudlu.