1 Tisalunika 3 - Hanunuu

¹ Pagka udyi kami makaagwanta, kanmi inisip mayad nu matayak yi aku usa-usa sa Atinas,

² ag nu suguun tag sa kanyu kanta patar-ari si Timutiyu. Parihu diman ga kanmi siya pinili waydi Diyus hampay manugtudlu Mayad pag Barita tungkul sa kan Kiristu. Sinugu nimi siya hampay parig-unun niya kamu ag hampay pabisugun kamu sa kanyu pagsarig sa Panginuun,

³ agud unman may manlubay sa kanyu dahil sa pag-unuunu. Alam diman niyu ti manga pag-unuunu angay sa kagustuhan Diyus sa kanta.

⁴ Dahil pagka kami asan waya, ipinaalam yi nimi daan sa kanyu pihu kita may malakawan kakurian, ag nangyari ngap ngani kainda.

⁵ Nakan ngani pagka udyi aku makaagwanta, sinugu niku si Timutiyu hampay makaalam barita tungkul sa kahamtangan taynguna niyu pagsarig sa Panginuun. Nag-isip aku barang natuksu kamu diyablu. Nu abi katida ti nangyari, nabul-an yi lang halaga kanmi nagpangabudlay.

⁶ Taynguna nakaras-ug yi maan si Timutiyu asan ginan. May dara siya marinu pag barita tungkul sa kanyu pagsarig hanggan kanyu pagmahal. Itinultul diman niya sa kanmi pirmi kami kanyu pag-isipun, magtagakakiti kamu sa kanmi parihu sa kanmi gustu makakit sa kanyu.

⁷ Ginan sa kanyu pagsarig sa kan Kiristu, manga patar-ari, nagmasulung kanmi naisipan, madi kami sa karaw-an kaaburiduhan hanggan kakurian.

⁸ Kanyu unman magkaanggihut ginan sa marig-un pag sarig sa Panginuun imaw ti pinmasulung sa kanmi tagipusuun.

⁹ Kabitay nguna pag kumang-ud kanmi pasalamat sa Diyus tungkul sa kanyu ag tungkul sa kabayaan kanmi tinanggap dahil sa kanyu sa atubangan nita Diyus.

¹⁰ Magpangungud kami sa darangin sirang yabi hampay makitan maan nimi kamu ag hampay maawatan kamu sa ikakang-ud niyu pagsarig.

¹¹ Magdarangin kami hampay ti Diyus Ama hanggan kanta Panginuun Hisus pumakaun waya rugar sa kanmi makaasan sa kanyu.

¹² Kailangan padakaun ag paimbungun waya Panginuun kanyu pagmahal sa usa kag sa usa hanggan sa tanan manga tawu, parihu diman sa kanmi pagmahal sa kanyu.

¹³ Nu katida ti mangyari, pabisugun niya kanyu tagipusuun hampay lubus yi kamu sakup sa Diyus Ama ag unman may kasalanan sa kay pagras-ug nita Panginuun Hisus kaibahan ti tanan manga napasakup sa kanya.