1 Tisalunika 2 - Hanunuu

Kay Pagsirbi ni Pablu sa Tisalunika

¹ Kamu diman duy manga patar-ari, ti nakaalam balaw unman may kabuluhan kanmi nag-asan sa kanyu.

² Alam niyu pagka kami sa Pilipus, inunu-unu kami ag minuransa waya. Dapat una katida pinabisug di nita Diyus kanmi manga tagipusuun hampay una mayamu ti manga kakurian, ilinantag di nimi ti Mayad pag Barita Diyus sa kanyu.

³ Kanmi tudlu unman may turunu sa ikatalang, unman diman sa ikadaut una sa ikadaya.

⁴ Dahil pinili kami Diyus bag-u kay yi iinintirga sa kanmi ti Mayad pag Barita. Nakan ngani kami magpanudlu una abi balaw pagbayaun tawu basta kami pumakaun kabayaan sa Diyus, imaw tig-usisa sa kanta manga tagipusuun.

⁵ Alam diman waydi niyu sa kanmi pagtudlu kaybi balaw kami magpakakit-kakit lang sa atubangan manga tawu ag alam di Diyus sa kanmi pagtudlu kaybi unman diman waydi kami may pag-itagu ugali maramuun.

⁶ Unman nimi hiningbut kanyu pagdayaw una manga iba tawu pag pagdayaw.

⁷ Madi may karampatan mana kami bilang manga apustul ni Kiristu magpasag-sagan sa kanyu, bagkus ngap kami nagmadahan sa kanyu, parihu sa ina kay magdahan mag-alaga sa kay manga anak.

⁸ Sa daka gid nimi pagmahal sa kanyu ihinanda nimi kanmi sadili sa pagtudlu Mayad pag Barita Diyus sa kanyu. Balaw lang tida, una kanmi buhi unman nimi inirangan ipakaun di nimi sa kanyu nu kailangan. Lubus yi gid magkagamun kami sa kanyu.

⁹ Pihu udwaya nalimtan niyu, manga patar-ari, nu kabitay kami nagbudlay sa tarabahu sirang yabi hampay kami unman magpakuri sa una hintay sa kanyu, sa kanmi magtudlu Mayad pag Barita Diyus sa kanyu.

¹⁰ Alam niyu, alam diman waydi Diyus, kanmi ugali buhi matinupadun, mayad ag unman may ikasabi sa kanmi pakiusa sa kanyu sa manga magsarig yi sa kan Kiristu.

¹¹ Alam yi waydi niyu kami bilang ga kanyu yi ama sa kada usa sa kanyu.

¹² Pinabisug nimi kanyu nalub-anan, pinasulung ag binutung sa mag-ugali kang-ud sa kay magbantay Diyus, imaw ti nagpili sa kanyu hampay makatanggap kahuray sa kay kaharian hanggan kadayawan.

¹³ Inda waya ti pirmi pag-ipasalamat nimi sa Diyus, pagka itinudlu nimi sa kanyu kay Bagaw Diyus, tinanggap niyu tunda ga tutuu ngani Bagaw Diyus, bukun ga bagaw lang tawu. Kay kamaskihan Bagaw Diyus makitan diman gid waydi sa kanyu buhi dahil kamu manga magsarig.

¹⁴ Ti mangyari sa kanyu, manga patar-ari, parihu sa nangyari diman sa kay iglisya Diyus sa daga Hudiya, sa manga magsarig ati sa kan Kiristu Hisus. Pag-unuunuhun diman kamu niyu manga kasimanwa, parihu sa manga taga Hudiya inunu-unu diman nida kaparihu Hudiyu.

¹⁵ Tunda pag manga Hudiyu ti nagmatay sa Panginuun Hisus hanggan sa manga purupita. Sida diman waydi ti nag-unuunu sa kanmi. Maglaban sida sa kagustuhan Diyus, kalaban sida tanan tawu.

¹⁶ Nakan pilit gid kanda mana pag-amparahun kanmi pagtudlu Mayad pag Barita sa manga balaw Hudiyu sa ikaribri nida. Aput yi ngani sa katugkaan kanda buwat kadautan nakan sa katapusan nangyari ngani sa kanda ti pangagalit Diyus.

Magkaibug si Pablu Magsabang maan sa Kanda

¹⁷ Taynguna manga patar-ari, pagka kami niblag sa kanyu ngalay-ngalay, balaw sa pag-alaala pag niblag nu unman sa mata lang waydi, magkagamun gid kami sa kanyu. Nakan kami magkaibug yi gid magtagasampaki maan sa kanyu.

¹⁸ Balaw lang kas-a una kadwa aku ngani pag tawu si Pablu maggayak mana mansabang sa kanyu dapat pirmi kami pag-amparahun ni Satanas.

¹⁹ Udyi kami may paggagadun masulung pag naisipan nu ud dahil lang hanggan sa kanyu, kamu yi lang ti puun nimi kabayaan. Kamu yi ti pinagkapirimyu sa kanmi panalu, kanmi idayaw sa atubangan Panginuun Hisus sa kay pagbalik niya aban!

²⁰ Tutuu ngani ginan sa kanyu mayad buwat kami magtanggap kabayaan hanggan kadayawan.