1 Tisalunika 1 - Hanunuu

¹ Inda ti may surat kami ni Pablu, ni Silas, ni Timutiyu, tabug sa iglisya sa Tisalunika, sa manga magpakiusa sa Diyus Ama ag sa Panginuun Hisu-Kiristu. Pagsa kanyu ti papalad hanggan ti kahusayan.

Ti Ugali hanggan Pagsarig manga Taga Tisalunika

² Pirmi magpasalamat kami sa Diyus dahil sa kanyu tanan. Kada kami magdarangin kanmi diman pag-idarangin kamu.

³ Pag-alalahanun nimi sa atubangan nita Diyus Ama kanyu mayad pag buruwatun imaw ti puruyba niyu pagsarig, hanggan kanyu magpangabudlay dahil pag-udyukan kamu niyu pagmahal. Pag-alalahanun diman nimi kanyu ugali naisipan matiniisun dahil sa kanyu pag-asa sa kanta Panginuun Hisu-Kiristu.

⁴ Naalaman nimi, manga patar-ari, kamu pagmahalun gid Diyus. Siya diman ti may pili sa kanyu.

⁵ Dahil kanmi ipinadakit ti Mayad pag Barita sa kanyu balaw tugka lang sa bagaw. Kay makamaskihan pag manga buwat Ispiritu Banal ti nagpuruyba sa kanyu tungkul sa katutuuhanan Mayad pag Barita. Nakitan waydi niyu nu kabitay kami sa kanyu atubangan sa kanyu ikaayad.

⁶ Nag-ugali kamu naghuwad sa kanmi hanggan sa Panginuun. Tinanggap niyu ti Mayad pag Barita may kabayaan kay ipinakaun Ispiritu Banal sa kanyu, madi nakalakaw diman waydi kamu madala pag kakurian.

⁷ Nakan kamu yi ti mustara sa manga patar-ari ati sa daga Masidunya hanggan Akaya.

⁸ Dahil balaw lang bagaw Panginuun ti nalantag sa Masidunya ag sa Akaya ginan sa kanyu, hanggan ngap ti barita tungkul sa kanyu pagsarig sa Diyus nibantug diman sa tanan rugar. Udyi kailangan tultulun waya nimi tunda sa manga tawu.

⁹ Sida yi ngani ti mamarita nu kabitay kami kanyu tinanggap. Sida diman tigsabi pinatlikudan niyu ti pagsamba sa diyus-diyusan hampay magsirbi kamu sa tutuu Diyus buhi,

¹⁰ ag hampay alagdun niyu kay Anak si Hisus ginan sa langit. Binuhi uman Diyus si Hisus ginan sa kamatayan. Siya diman ti rumibri sa kanta sa kay kaudasan sintinsiya Diyus aban.