1 Timutiyu 6 - Hanunuu

¹ Ti mayad paggalang ti manga panawuhun sa kanda amu hampay unman may ikalibak sa ngaran Diyus una hanggan sa kanta surundanun.

² Balaw kailangan mag-alukayu ti manga panawuhun sa kanda amu dahil sida parihu magtar-ari sa pagsarig sa kan Kiristu. Lalu waya ngapu pagkaayad kanda pagsirbi dahil ti kanda pagsirbihan mirinsan sa pagsarig sa kan Kiristu hanggan sa pagmahal. Paanyui nimu ti manga tawu sa kainda pag manga bagay.

Tungkul sa Mag-aratwan hanggan sa Maraibgun sa Kuwarta

³ Una si unu ti magtudlu tuhay sa inda pag manga katutuuhanan ag unman angay sa mayad pag manga bilin nita Panginuun Hisu-Kiristu, una hanggan sa manga tudlu tungkul sa kanta surundanun,

⁴ tunda pag tawu magpadayaw-dayaw dapat unman may kadunungan. Naugalian yi waydi niya ti parairgu hanggan ti aratwan tungkul sa manga sanglitan, imaw ti pagpun-an durumtan, kagalitan, puruyaan hanggan magbarangdanan,

⁵ ag aratwan manga tawu alangan kay pag-iisip ag unman magkilala sa katutuuhanan, manga maghantup kuntay ti surundanun sa ikayaman lang nida.

⁶ Nu sa ungud, tutuu daka kanta pakinabang nu magpasakup sa Diyus ag nu naanadan nita ti magbaya una sa kaalwanan una sa kakurian.

⁷ Unman kita may dara una hintay sa kanta pagkalusad sitay sa babaw daga, unman diman waydi kita may madara sa kanta pag-ighit sitay ginan.

⁸ Nakan ngani kailangan kita magbaya nu kita may karan-unun hanggan rutay.

⁹ Dapat ti tawu nu maghingbut sa yumaman, madara siya sa tuksu ga nasduk sa mayamu pag kadautan ag sa unman may kabuluhan pag manga paghangadun, imaw ti magdara sa kanya tabug sa kadamhakan.

¹⁰ Dahil ti hangad sa kuwarta imaw ti gimpuunan tanan kadautan. Dahil may manga tawu maraibgun sa kuwarta nagsimray sa kanda pagsarig, nagpakaun sida kakurian sa kanda sadili buhi.

Manga Bilin sa kan Timutiyu

¹¹ Dapat kawu duy ti suruguun Diyus, pag-iwas kawu sa tunda pag manga bagay. Isipa gid nimu, pagkaayad kanmu ugali sa magpakatadlung, sa pagpasakup sa Diyus, sa pagsarig, sa pagmahal, sa pagtiis hanggan sa maalumanay.

¹² Buwata nimu tugka sa kanmu makaya hampay ingatan nimu ti katutuuhanan tungkul sa kanta pagsarig una may kalaban bag-u makarubtan nimu ti tutuu pag buhi unman may katapusan. Kabay imaw pag buhi kay turunu Diyus. Nakan kawu kay pinili Diyus, pagka ipinakilala nimu mayad-mayad kanmu pagsarig sa mag-adnugan kayamuan tawu.

¹³ Sa atubangan Diyus imaw ti gimpuunan tanan magkabuhi ag sa atubangan ni Kiristu Hisus imaw ti nagpatutuu mayad-mayad sa kay pagsarig sa pagdungugan ni Punsiyu Pilatu, kang pagsabihan duy kawu,

¹⁴ tupada nimu ti katungkulan iinintirga sa kanmu, pagmalumpiyu kam tagipusuun sa unman may ikasabi sa kanmu hanggan sa ud rumas-ug kanta Panginuun Hisu-Kiristu.

¹⁵ Aban sa kay taning pag kaudasan mipaburayhaw Diyus kay pagras-ug ni Hisu-Kiristu. Diyus gid ti marapapalad. Siya yi lang ti makamaskihan, siya ti Hari sa tanan manga hari, siya ti Panginuun sa tanan manga panginuun.

¹⁶ Siya lang ti ud may kamatayan, siya ti mangulian sa dayu masumpung pag karayawan. Unman may nakakit sa kanya ag unman may kumakit sa kanya una kainda. Sa kanya ti kadayawan hanggan ti unman may katapusan pag kamaskihan. Amin.

¹⁷ Sabihi nimu ti manga mayaman, danga magpalabaw-labaw. Danga sida magsarig sa kanda kayamanan dahil tunda magkadura di. Bagkus ngap pagsarig sida sa Diyus, imaw ti abunda pag manugpakaun tanan bagay sa ikabaya nita.

¹⁸ Sabihi nimu sida pagbuwat mayad, pagpakayaman sida sa mayad pag buwat. Pagmarapakaun, pagmaraawat sida sa kaparihu tawu.

¹⁹ Nu katida makatipun sida kayamanan sa pag-atubangun pag udas ag makatanggap sida tutuu pag buhi.

²⁰ Kawu duy Timutiyu, ingatan nimu ti iinintirga sa kanmu. Iwasan nimu ti manga harampangan unman ikabaya Diyus hanggan ti salalumpangan.

²¹ Dahil ti manga magpadunungun nagtalang ngap ginan sa kanda pagsarig sa kan Kiristu. Pagsa kanyu tanan ti papalad Diyus.