1 Timutiyu 5 - Hanunuu

Manga Katungkulan sa Kaparihu Magsarig sa kan Kiristu

¹ Danga nimu pagkaransaha sa hampang ti manga lalaki gurangun man sa kanmu. Hampangun nimu sida may galang parihu sa kanmu maggalang sa kanmu ama. Isipa nimu pinagkapatar-ari ti manga kalay-awan lalaki.

² Galanga nimu ti manga gurangun pag babayi parihu sa kanmu ina. Pagpakiusa kawu sa manga kalay-awan babayi unman may lakay hangal-hangal ga kanmu diman manga patar-ari babayi.

³ Pagmagalang kawu sa manga buranday babayi. Awatan nimu sida nu udyi may mag-asikasu sa kanda.

⁴ Nu bay may manga anak di una manga idu, sida yi lang ti mangasikasu sa kanda gurang, bilang kanda pananagutan sa gurang, katida nakan ti pagbayaun Diyus.

⁵ Ti babayi buranday nu udyi may katawuhan, Diyus wadi kay pagsarigan, nakan ngani pirmi siya magdarangin sirang yabi maghagad kay pangailangan sa Panginuun.

⁶ Dapat ti buranday nu mag-ugali sa parabayain, isipa yi lang siya ga namatay.

⁷ Paanyui duy nimu sida kainda pag manga bagay sa balaw may ikasabi sa kanda.

⁸ Una si unu nu balaw mag-asikasu sa kay manga katawuhan, lalu sa kay manga kasunu balay, kay tinalikdan yi kay pagsarig sa kan Kiristu, balaw di ngap ga manga unman waya nagsarig sa kan Kiristu.

⁹ Kainda ti mayad ilista nimu sa listahan manga babayi buranday hampay sida ti awatan, kay idad balaw kurang sa unumpulu ka timpu, kas-a lang ginan nangasawa,

¹⁰ kailangan pagpatutuuhanan manga iba kuntay mayad kay buwat, mayad kay nagpadaka sa kay manga anak, mahusay kay nagtanggap sa manga nagsabang sa kay balay. Nagsirbi diman siya sa manga patar-ari sa Panginuun, nangawat sa manga may kakurian, ihinanda niya kay sadili sa tanan mayad pag buwat.

¹¹ Tubay yi lista ti manga babayi buranday udwaya masyadu dugay kay idad dahil nu magkaibug maan mangasawa pabay-anan maan nida kanda pagsirbi sa kan Kiristu.

¹² Nakan barang sida libakun nu unman nagtupad sa kanda un-an pag taratu sa kan Kiristu.

¹³ Maanad sida sa bugyahin, magkahilig yi gid sa magpanungbalay. Ti usa waya ka alangan sa kanda pagka dugay sida mapinasilabutun ag ragayrayan waya paman.

¹⁴ Nakan ngani nu sa kangku, mayad waya nu mangasawa maan ti manga buranday nu udwaya dugay kay idad hampay magkaanak bag-u nu alagaan nida kanda sadili magtal-anakan hampay unman may ikalibak ti manga maglaban sa kanta.

¹⁵ Kang pagsabihun inda dahil may manga babayi buranday natuksu ni Satanas.

¹⁶ Ti mayad nu manga babayi magsarig sa Panginuun tig-alaga sa kanda katawuhan buranday hampay balaw saragpunun iglisya tunda pag manga buranday. Nu katida, ti awat iglisya tabug lang sa manga buranday udyi may katawuhan magsagpun.

¹⁷ Pagkayamu nu magpakaun kamu sa manga manug-asiwa mayad kanda mag-asikasu, lalu sa manga manugbarita hanggan sa manga manugtudlu Bagaw Diyus.

¹⁸ Kainda ti pagsabihun Banal Kasuratan magkun, “Danga pagpungta kay bibig baka sa kay maggiuk.” Nisurat diman waydi magkun, “Ti manugtarabahu kailangan pakan-an diman kay kaupahan.”

¹⁹ Nu may magbintang sa manug-asiwa iglisya, danga nimu pasnuan nu unman may duwa manga tulu ka kastigus.

²⁰ Nu may tawu magbuwat kasalanan, bilini nimu sida sa mag-adnugan tanan manga patar-ari hampay ti manga iba magkadala maghuwad.

²¹ Sa atubangan Diyus ag ni Kiristu Hisus hanggan sa atubangan niya pinili pag manga anghil, kang pagsuguun kawu hampay tupadun nimu inda pag manga bilin sa unman may pagkampihan sa baliw-baliw, kailangan paghimasii kaayad.

²² Danga magkadaldali sa magkupa kamang una sa kantapu hampay pakan-an siya katungkulan sa iglisya. Pagdahan kawu sa dayu kawu maabay sa kasalanan manga iba. Pagpirmi kawu unman may huput kasalanan.

²³ Danga duy danum lang ti kanmu inmun. Pag-inum diman waydi kawu intus kadiit. May pakinabang tunda sa kam panunaw karan-unun, pirmi nakan kawu magkasakit.

²⁴ May manga tawu niburayhaw yi gid kanda kasalanan bag-u mag-aput sa sintinsiya. Dapat ti iba pagka dugay bag-u di sida naabut sa kanda buwat kasalanan.

²⁵ Katunda diman waydi may marinu pag manga buwat madali mag-akitan sa tawu. Una unman mag-akitan madali, balaw diman waydi mitagu tunda hanggan aban.