1 Timutiyu 4 - Hanunuu

Manga Pudilun pag Manugtudlu

¹ Malinaw ti pagsabihun Ispiritu magkun, sa uryan panahun tayakan manga iba kanda pagsarig. Sundun ngap nida ti manga manugpatalang ag ti manga tudlu ginan sa manga labang.

² May manga pudilun manugtudlu aban, kanda naisipan pinadluman ni Satanas, udyi sida magkilala sa daut sa mayad. Sa kanda magdaya,

³ kanda pag-irangan ti tawu nu magkaibug mag-asawa. Una manga karan-unun kay binwat Diyus hampay kan-un manga tawu magsarig may pasalamat ag magkilala sa katutuuhanan, kanda diman pag-irangan.

⁴ Ti tanan bagay linalang Diyus unman may hintay ag unman kailangan may manga tun-anun nu pagtanggapun nita may pasalamat,

⁵ dahil tunda tanan linumpiyu yi Bagaw Diyus hanggan sa darangin.

Ti Mayad pag Suruguun ni Kiristu Hisus

⁶ Kawu ti mayad pag suruguun ni Kiristu Hisus nu itudlu nimu sa manga patar-ari inda pag manga bilin. Intindiha nimu ti Bagaw Diyus imaw ti makapakaun sarig sa kanmu tagipusuun ag imaw ti marinu pag tudlu kanmu diman waydi pagsundun.

⁷ Danga pag-uyanga ti udas sa manga suyut angay lang sa kalibutan unman may kabuluhan. Bagkus ngap pangungud kawu kanmu bilug hanggan tagipusuun sa kanmu turunu marapasakup sa Diyus.

⁸ May pakinabang diman nu magpaantigu ti bilug. Dapat lalu waya may pakinabang nu mangungud kita kanta bilug hanggan tagipusuun sa kanta turunu marapasakup sa Diyus. Dahil nu katida kita pag mag-ugali, may patabgan di kita kaayadan balaw lang sa kainda pag buhi, lalu waya sa ikadwa pag buhi.

⁹ Balaw pudil inda ti pagsabihun ag kailangan lubus paniwalaan.

¹⁰ Nakan kita magpakasipag sa buruwatun una makuri, dahil mag-asa kita sa Diyus buhi, sa Manugribri tanan tawu, lalu sa manga magsarig sa kanya.

¹¹ Paanyua nimu sida sa kanmu magtudlu sa kanda.

¹² Danga pasnuan nimu nu magpuya diman sida sa kanmu dahil anak waya kawu baliwa. Bagkus pagpakasipag kawu hampay kawu ti mustara sa manga magsarig sa kan Kiristu, sa kanmu pamagawan, sa kanmu ugali, sa kanmu pagmahal, sa kanmu pagsarig hanggan sa kanmu unman may huput daut una di.

¹³ Hanggan sa udwaya aku rumas-ug asan, kada may udas pagpirmi kawu pagbasa Banal Kasuratan sa madnugan manga iba. Pagtudlu kawu ag pagpaliwanag.

¹⁴ Danga paghamnua nimu ti ipinakaun Ispiritu Banal sa kanmu angay sa ipinurupita katpung sa nagkupa manga manug-asiwa iglisya kanda kamang sa kanmu.

¹⁵ Tupada gid nimu tunda, lubus ialistu nimu kanmu sadili sa inda pag buruwatun hampay makitan tanan tawu mag-amat kanmu kakang-udan.

¹⁶ Pagmadahan kawu sa kanmu ugali hanggan sa kanmu magtudlu. Pagparargu sa kanmu magtupad sa inda pag buruwatun hampay maribri kawu hanggan ti manga manugpatingi sa kanmu.