1 Timutiyu 3 - Hanunuu

Ti manga Magpangasiwa sa Iglisya

¹ Tutuu ti pagsabihun magkun, “Nu may tawu magkaibug magpangasiwa sa iglisya, magkailangan siya sa mayad pag buruwatun.”

² Ti manug-asiwa sa iglisya kailangan unman may masabi sa kanya, usa lang kay asawa, madahan, madunung waydi magtiis sa kay sadili, maginalangun, marapasaka sa bag-u ras-ug ag mayad siya magtudlu.

³ Kailangan unman maraibgun siya sa irinmun makalangu, balaw diman arisgadu, kailangan pag maalumanay ngap siya, maraibgun sa kahusayan, danga maraibgun sa kuwarta.

⁴ Kailangan mahusay siya magpamahala sa kay kasunu balay. Kailangan siya galangun ag paniwalaan niya manga anak.

⁵ Dayu waydi makapangasiwa ti tawu sa iglisya Diyus, nu unman kaya niya pamahalaan kay kasunu balay.

⁶ Kailangan diman waydi siya dugay yi kay magsarig sa Panginuun, barang siya magpalabaw-labaw bag-u rargu siya masintinsiyahan parihu sa diyablu.

⁷ Kailangan diman siya galangun manga tawu bukun kakampi sa iglisya hampay balaw siya mapuyaan ag dayu siya makasulun sa dit-ag ni Satanas.

Ti manga Magsirbi sa Iglisya

⁸ Tungkul maan sa manga magsirbi sa iglisya, kailangan sida mabuut pag manga tawu, danga pudilun, balaw marainum sa makalangu, balaw maraibgun sa kayamanan.

⁹ Dayu mahimu sida matinupadun sa madalum pag katutuuhanan tungkul sa kanta pagsarig nu may pag-alalahanun waya sida kasalanan sa kanda tagipusuun.

¹⁰ Kailangan bantayan diman dapu sida. Nu makitan sida unman may ikasabi bag-u mahimu sida buwatun manugsirbi sa iglisya.

¹¹ Kailangan hanggan kanda manga asawa mabuut, danga sida magkutsu-kutsu. Kailangan sida manga mayad gid, matinupadun sa tanan bagay.

¹² Kailangan usa lang kay asawa ti manugsirbi sa iglisya, kailangan madunung siya magpamahala sa kay kasunu balay, kailangan kaayad magpaanyu sa kay manga anak.

¹³ Una si unu pag manugsirbi sa iglisya nu matinupadun siya sa kay katungkulan, galangun siya tanan tawu ag may karampatan magbagaw, balaw makinay-ahun siya tungkul sa kanta pagsarig sa kan Kiristu Hisus.

Ti Madalum pag Katutuuhanan Nita Surundanun

¹⁴ Daka ti pag-asa niku udyi dugay kita magkarabtaan. Dapat ay isinurat diman niku inda pag manga bilin,

¹⁵ hampay una aku unman makaras-ug madali, maalaman diman nimu ti mayad pag ugali kailangan buwatun sa magtal-anakan Diyus, sa iglisya Diyus buhi, imaw yi ngani ti pinagkatulduk hanggan binungsudan katutuuhanan.

¹⁶ Tutuu gid madalum ag makadululaw pag katutuuhanan nita surundanun magkun, “Napakilala siya Diyus sa kay nabilug tawu, pinatutuuhanan siya Ispiritu Banal, nakitan siya manga anghil, itinudlu siya sa manga nasyun tawu, una naan pag rugar may nagpaniwala sa kanya, tinanggap siya ati sa langit may kadayawan.”