1 Timutiyu 2 - Hanunuu

Manga Paanyu tungkul sa Darangin

¹ Un-an sa tanan, pag-ipakihampang niku idarangin niyu ti tanan tawu. Ipaaput niyu sa Diyus kanyu manga darangin para sa kanda may tapil pasalamat.

² Kailangan idarangin niyu ti manga hari hanggan ti tanan tawu may kangaranan hampay kita may kaayusan ag may kahusayan sa kanta magpasakup sa Diyus ag may mayad pag ugali.

³ Inda ti mayad ag makakaawa sa kay magbantay Diyus kanta Manugribri.

⁴ Siya may gustu sa tanan tawu hampay miribri sida ag hampay makatau sida sa katutuuhanan.

⁵ Dahil usa-usa lang ti Diyus. Ag usa lang tigpamahala tag sa Diyus tag sa manga tawu, si Kiristu Hisus yi ngani pag tawu.

⁶ Ipinakaun niya kay sadili bilug naglukat sa tanan tawu. Sa taning pag kaudasan pag ipinakilala niya kay ginayak Diyus pag karibrihan.

⁷ Nakan ngani pinili aku Diyus manugtudlu hanggan apustul hampay itudlu niku sa manga balaw Hudiyu ti tutuu pag sarig. Kang pagsabihun inda tutuu gid, balaw pudil.

⁸ Kang gustu ngani ti manga lalaki una naan pag rugar nu magdarangin kailangan ipaabwat nida kanda manga kamang tag sa Diyus, ipasakup nida lubus sa Diyus kanda naisipan, danga may galit hanggan magtalaluhan.

⁹ Katunda diman kang gustu ti manga babayi danga magsulung mayamu kalasi pag parinu, danga may padayaw-dayaw, danga masyadu malus-ay ti buhuk, danga magbisti mayamu bulawan masinglaw.

¹⁰ Kailangan kanda ngap pinagkabisti kay mayad buwat imaw ti dapat sa manga babayi manga magpasakup sa Diyus.

¹¹ Ti manga babayi kailangan danga mag-ingay sa katpung mag-adal ag kailangan lubus pasakup.

¹² Unman pasnuan niku ti babayi nu magtudlu sa manga lalaki. Dayu waydi makapamahala siya sa manga lalaki. Kailangan danga mag-ingay siya.

¹³ Isipa niyu si Adam ti un-an linalang bag-u di si Iba.

¹⁴ Bukun si Adam nu unman si Iba ti nadaya ag nagkasala.

¹⁵ Dapat ingatan di Panginuun ti manga babayi sa kanda katpung magpanganak, nu magpakumbaba sida kay ugali sa pagsarig, sa pagmahal ag sa lubus magpasakup sa Panginuun.