1 Timutiyu 1 - Hanunuu

¹ Inda ti may surat si Pablu, kay apustul ni Kiristu Hisus angay sa kay sugu Diyus imaw ti Manugribri nita, ag ni Kiristu Hisus imaw kanta pag-asahan.

² Inda pag surat tabug sa kanmu, Timutiyu, kawu kang pinagkaanak sa pagsarig sa kan Kiristu. Pagsa kanyu ti papalad, ti pangaawa hanggan ti kahusayan ginan sa kanta Diyus Ama hanggan ginan sa kanta Panginuun Hisu-Kiristu.

Paanyu Laban sa Salan pag Tudlu

³ Ga kang diman sinabi sa kanmu kang di waya atag sa Masidunya, kang gustu duy kawu asan lang sa Ipisu, dahil may manga tawu magtudlu patalang. Bilini nimu sida danga yi sida magtudlu patalang.

⁴ Danga yi sida maggaraw tunda pag manga suyut hanggan sa manga tultulanun aba ag listahan nida manga kaapu-apuhan. Siti ginan ti bulul-an arawayan, unman diman waydi sa ikatupad sa turunu Diyus. Tunda pag turunu matupad lang tawu nu siya may pagsarig.

⁵ Kailangan katida kanmu bilinan sida hampay may pagmahal sida ginan sa kanda malumpiyu pag tagipusuun ag ginan sa naisipan nu udyi may pag-alalahanun kasalanan, hanggan ginan sa kanda pagsarig balaw magpabalhinguun.

⁶ May manga nagsimray ginan sa inda pag turunu kaayadan, nagtalang yi sida atag sa harampangan unman may kabuluhan.

⁷ Sida mana may gustu manudlu Kasuguan Diyus. Dapat ay unman magkasalman nida kanda pagsabihun, madi nu sa kanda lang hantup tutuu ngap ti kanda pag-itudlu.

⁸ Dapat alam nita marinu gid ti Kasuguan nu paggamitun tawu sa mayad.

⁹ Alam diman waydi nita ti Kasuguan bukun binwat para sa tawu matadlung nu unman para sa manga tawu unman magbati sa batas ag sa manga manlahug, sa manga tawu daut ag sa manga makasalanan, sa manga unman magsarig sa Diyus ag sa manga maglapastangan, sa manga magmatay sa ina sa ama, ag sa manga maglibun sa tawu,

¹⁰ sa manga mag-uragin, sa manga magkaibug sa kaparihu lalaki, sa manga manugdagit sa tawu, sa manga pudilun, sa manga magsumpa sa kapudilan ag nu may imaw waya tuhay pag buwat balaw angay sa marinu pag tudlu.

¹¹ Tunda ngani pag tudlu ti angay sa Mayad pag Barita inintirga sa kangku. Tunda yi pag Barita tungkul sa kanta pagdayawun pag kamaskihan Diyus.

Pagkilala sa kay Pangaawa Diyus

¹² Magpasalamat aku sa kanta Panginuun Kiristu Hisus, dahil siya tigpabisug sa kangku hampay mabuwat niku inda pag buruwatun ag kinilala niya aku kuntay aku matinupadun, nakan pinili niya aku hampay magsirbi sa inda pag katungkulan.

¹³ Madi kaybi waya kang linapastangan, inunu-unu ag unman diman waydi pinahalgaan niku siya. Dapat kinaawaan di gid aku Diyus dahil tunda kang binwat kaybi kang udwaya nakaalam ag udwaya may pagsarig sa kanya.

¹⁴ Ungud mayad kay nabubut-un nita Panginuun sa kangku, nakan may natanggap di gid aku ginan sa kanya pagsarig hanggan pagmahal, kay ngani pag-ipakaun sa kanta dahil sa kanta pakiusa sa kan Kiristu Hisus.

¹⁵ Tutuu ti pagsabihun ag kailangan paniwalaan tanan tawu magkun, “Nakan nagsitay si Kiristu Hisus sa kalibutan hampay iribri ti manga makasalanan.” Ag aku ngap ti takinan manga makasalanan.

¹⁶ Dapat ay kinaawaan niya aku hampay mipakilala ni Hisu-Kiristu kay lubus matugway naisipan niya sa kangku, sa takinan manga makasalanan, bilang ga mustara sa tanan manga sumarig waydi sa kanya hampay may buhi waydi sida unman may katapusan.

¹⁷ Taynguna ti kadayawan hanggan kapangyarihan pagsa kanya, sa usa-usa ka Diyus, sa Hari ud may pinag-umpisahan, unman may katapusan, unman may kamatayan ag unman mag-akitan sa mata. Amin.

¹⁸ Inda pag bilin kang pag-ipabahala duy Timutiyu sa kanmu angay sa manga ipinurupita kaybi tungkul sa kanmu, imaw ngani tigpabisug sa kanmu maglaban sa kadautan.

¹⁹ Pangungud yi lang gid kawu sa kanmu pagsarig ag danga may pag-alalahanun kasalanan sa kanmu tagipusuun. Dahil may manga tawu unman pagpahalagaan nida kanda malumpiyu tagipusuun, nakan rinangga yi kanda pagsarig.

²⁰ Katunda diman sida ni Himiniyu ni Alihanduru. Ipinabahala niku sida sa kan Satanas hampay sida magkariga yi danga yi maglapastangan sa Diyus.