1 Samwil 9 - Hanunuu

Pinili ni Samwil si Saul hampay Humari

¹ May usa ka mayaman ag kilala pag tawu ginan sa lahi ni Binhamin. Kay ngaran si Kis, anak siya ni Abyil. Si Abyil kay anak ni Sirur, si Sirur kay anak ni Bikurat, si Bikurat kay anak ni Apya ginan sa lahi ni Binhamin.

² Si Kis may anak lalaki kay ngaran si Saul. Anak waya si Saul; marinu gid siya pag lalaki, unman may makaparihu sa kanya ti manga taga Israil. Abwat man siya sa tanan Israilita, ti iba tugka lang sa kay labay.

³ Pagka sa usa ka sirang, nadura kan Kis manga asnu, nakan magkun siya sa kay anak sa kan Saul, “Tabana duy nimu ti usa ka suruguun, paglakaw yi kamu, ligawa ti manga asnu.”

⁴ Nakan linmakaw si Saul kaibahan ti suruguun. Rinmas-ug sida sa kabantudan Ipraim hanggan sa rugar Salisa, dapat unman nida mag-akitan ti manga asnu. Nakan nagparargu sida sa rugar Salim tugka sa rugar manga Binhamin, dapat unman diman nida mag-akitan ati.

⁵ Pagka nakaaput sida sa rugar Sup, magkun si Saul sa kay suruguun, “Muli yi kita. Barang mag-isip yi ati sa kanta kang ama sa halip sa manga asnu.”

⁶ Dapat nagsagut ti suruguun, “Kalway dapu duy, may usa ka manugsirbi Diyus arani lang sitay. Paggalangun siya manga tawu ag tutuu ti tanan niya pagsabihun. Atabug duy kita sa kanya, barang sabihun niya sa kanta nu naan nita pag makitan ti manga asnu.”

⁷ Sinabi ni Saul sa kay suruguun, “Nu abi atabug kita, hintay kanta ipakaun sa kanya? Unman yi kita may sawad karan-unun. Unman yi kita may miayaw.”

⁸ Nagsagut ti suruguun, “May usa waya aku ka bilug pilak. Ipakaun duy niku inda sa manugsirbi Diyus hampay sabihun niya sa kanta nu naan nita pag makitan ti manga asnu.”

^9-10 Magkun si Saul sa kanya, “Mayad! Abala yi, atag yi kita sa manughula.” (Kaybi sa Israil nu may tawu magkaibug makatanggap bagaw ginan sa Diyus, kaindaay kay pagsabihun, “Abala yi, atag yi kita sa manughula,” dahil ti manga pag-ingarnan purupita taynguna pag-ingarnan manughula kaybi.) Inmati ngani si Saul hanggan ti suruguun sa banwa nu naan katpung ti manugsirbi Diyus.

¹¹ Katpung magtukad di waya sida sa bantud banwa, may nasulang sida manga daraga manaas danum. Nagpaingana sida sa manga daraga, “Atay aw nguna taynguna ti manughula?”

¹² Sinmagut sida, “Hu, asan di duy siya. Inmuna lang waydi ngalay sa kanyu. Bag-u lang siya ras-ug sitay sa kanmi banwa hampay pangunahan ti manga tawu manhandug ati sa simbahan sa abwat pag rugar. Apura kamu!

¹³ Takuda siya sa may tukadun atabug sa simbahan sa abwat pag rugar hampay ati pag mangaun. Balaw mahimu kumaun ti manga binan-awan pag tawu nu unman waya siya rinmas-ug ati, dahil kailangan niya daranginan dapu ti handug. Nakan pagtukad yi kamu dahil matakdan niyu siya habang sirang waya.”

¹⁴ Nakan tinmukad ngani sida sa banwa. Pagka magsulud sida, nakitan nida si Samwil magras-ug pakarani sa kanda atabug sa simbahan sa abwat pag rugar.

¹⁵ Sa usa di waya ka sirang bag-u di rumas-ug si Saul, sinabi yi Panginuun sa kan Samwil magkun,

¹⁶ “Aldaw sa kainda diman pag udas, paasantagun niku sa kanmu ti usa ka tawu ginan sa rugar Binhamin. Payidi nimu siya lana ulibu sa kay ulu bilang palatandaan siya yi ngani kang pinili pag takinan niku nasakupan Israilita. Iribri niya kang manga nasakupan ginan sa kamang manga Pilistiyu dahil nakitan niku kanda kakurian, nadnugan niku kanda magdangup sa kangku.”

¹⁷ Pagka nakitan ni Samwil si Saul, sinabi Panginuun sa kan Samwil magkun, “Tunda yi ngani pag tawu kang pagkumnun sa kanmu, siya yi ngani ti humari sa kang nasakupan.”

¹⁸ Pagka napakarani si Saul sa kan Samwil ati sa may puwirtahan banwa, namaingana siya magkun, “Mahimu aw duy nimu itudlu sa kangku nu naan atay ti balay manughula?”

¹⁹ Sinmagut si Samwil sa kan Saul magkun, “Aku yi ngapu ti manughula. Pag-una yi duy kawu atag sa simbahan sa abwat pag rugar, dahil taynguna pag sirang mangaun kamu kasaru niku. Aldaw yi surip niku pag-itultul sa kanmu ti tanan nimu pagkaibgan maalaman, bag-u balaw yi niku kawu tawidan.

²⁰ Nu bay tungkul waydi sa manga asnu nadura nakatlu waya pag sirang, danga yi nimu pag-alalahana, dahil nakitan yi tunda. Dapat taynguna, sabihun niku sa kanmu kawu duy hanggan kanmu ama buu magtal-anakan imaw gid ti pagsarigan manga Israilita.”

²¹ Sinmagut si Saul, “Dapat aku ginan lang sa kan Binhamin pag lahi, ti pira-pira pag linahi Israil, ag kanmi magtal-anakan imaw ti pinakaababa sa kanmi lahi. Hayga duy kawu magbagaw sa kangku katunda?”

²² Pagka rinmas-ug sida sa simbahan sa abwat pag rugar, dinara ni Samwil si Saul hanggan kay suruguun sa daka pag sulud-sulud nu naan pag matukawan ti 30 ka tawu kay binan-awan. Bag-u pinatukaw niya si Saul hanggan kay suruguun sa tukawan para sa kilala pag manga bisita.

²³ Magkun si Samwil sa kasuniru, “Daran-a ataytag ti taguban kang ipinabutang sa kanmu.”

²⁴ Nakan bin-ul kasuniru ti balangbang taguban ag ibinugtang sa kan Saul atubangan. Magkun si Samwil, “Ta, kan-a yi nimu, ipinasaman niku tunda para sa kanmu sa inda pag karan-an, kaibahan ti manga tawu kang binan-awan.” Nakan nangaun ngani si Saul kaibahan ni Samwil sa tunda pag sirang.

²⁵ Pagka sida naglus-ug yi ginan sa kanda simbahan sa abwat pag rugar atabug sa banwa, inalistu nida kan Saul igyaan sa babaw atup sa kan Samwil pag dayunan pag balay.

²⁶ Ati siya pag naturug. Pagka sa surip, pinulaw maan ni Samwil si Saul ati sa babaw atup niya balay magkun, “Pagbangun yi duy kawu. Kang waya duy kawu ipatugka sa dalan.” Nag-alistu yi ngani si Saul, bag-u napalwas sida duwa mirinsan ginan sa sulud balay.

²⁷ Pagka sida arani yi sa katugkaan banwa, sinabi ni Samwil sa kan Saul magkun, “Sabihi duy nimu kanmu suruguun, pag-una siya sa kanta.” Nakan inmuna ngani ti suruguun. Bag-u magkun si Samwil, “Danga dap kawu maglakaw, kang ipadnug sa kanmu ti pagsabihun Diyus.”