1 Samwil 7 - Hanunuu

¹ Nakan bin-ul manga taga Kiryat Harim ti Kaban Panginuun ag dinara sa balay ni Abinadab sa may tagudtud. Pinili nida si Iliyasar, anak ni Abinadab hampay manugbantay siyun.

Ti Pagpangulu ni Samwil sa Israil

² Siyun yi ngap sa Kiryat Harim pag nadugay ti Kaban Panginuun sa sulud manga duwapulu ka timpu. Ti buu nasyun Israil nagruku ag nagdangup sa Panginuun hampay awatan.

³ Binmagaw si Samwil sa manga Israilita magkun, “Nu ilubus gid waydi niyu kanyu tagipusuun sa Panginuun, yamtan yi niyu kanyu manga pagsarigan pag manga diyus-diyusan hanggan si Astarut. Ipasakup niyu lubus kanyu sadili sa Panginuun, sa kanya lang kamu pagsumirbi. Bag-u iribri niya kamu ginan sa kamang manga Pilistiyu.”

⁴ Pagka nadnugan manga Israilita kay binagaw ni Samwil, kanda yi ngani iyinmut ti Baal hanggan Astarut pag diyus-diyusan. Siyun ginan ti Panginuun lang gid kanda sinirbihan.

⁵ Sinabi ni Samwil sa manga Israilita, “Tipuna niyu ti buu nasyun Israil ati sa Mispa, hampay kang idarangin kamu sa Panginuun.”

⁶ Pagka sida nagtipun yi ngani sa Mispa, nanaas sida danum bag-u kanda ibinuhus sa atubangan Panginuun. Balaw sida naghandum karan-unun ati katpung pag sirang, inaku nida kanda kasalanan magkun, “Kami nagkasala laban sa Panginuun.” Pinanguluhan ni Samwil ti manga Israilita ati sa Mispa.

⁷ Pagka naalaman manga Pilistiyu nagtipun yi maaw ti manga Israilita ati sa Mispa, nag-alistu yi ngani ti manga hari Pilistiyu hanggan kanda manga sundalu hampay girahun ti manga Israilita. Pagka nabaritaan inda manga Israilita, nagkaradala sida.

⁸ Sinabi nida sa kan Samwil magkun, “Danga duy kawu mag-apas sa darangin sa Panginuun nita Diyus hampay iribri niya kita sa manga Pilistiyu.”

⁹ Bag-u nagbuul si Samwil usa ka anak karanidu ag kay sinunug bilugan bilang handug pagsunugun para sa Panginuun. Nagdangup siya sa Panginuun hampay awatan ti manga Israilita. Dinungug Panginuun kay darangin.

¹⁰ Maghandug di waya si Samwil handug pagsunugun, nagras-ug yi ti manga Pilistiyu hampay labanan yi ti manga Israilita. Dapat tunda ngap katpung ti Panginuun nagpadara linti matnug gid nakan nangras ti manga Pilistiyu, ag natalu sida manga Israilita.

¹¹ Linagas sida manga Israilita ginan sa Mispa tugka sa may arani Bit Kar ag pinanmatay.

¹² Bag-u nam-ul si Samwil usa ka batu, ibinugtang niya sa tab-anan duwa ka banwa, Mispa ag Sin. Bag-u iningarnan niya tunda pag batu Ibinisir dahil magkun siya, “Taynguna tugka pag-awatan kami Panginuun.”

¹³ Nakan natalu ti manga Pilistiyu ag balaw yi gid sida inmuman naglaban sa manga Israilita habang buhi waya si Samwil, dahil Panginuun gid ti naglaban sa manga Pilistiyu.

¹⁴ Ti manga banwa sa karaw-an Ikrun hanggan Gat naagaw manga Pilistiyu nabawi di Israil. Inmapas diman ti girahan manga Israilita hanggan Amuriyu.

¹⁵ Pinanguluhan ni Samwil ti manga Israilita habang buhi waya siya.

¹⁶ Timpu-timpu magpalibut siya sa manga rugar ginan sa Bitil atabug sa Gilgal ag Mispa hampay tupadun niya kay buruwatun bilang pangulu sa inda pag manga rugar.

¹⁷ Dapat binmalik di siya sa Rama nu naan siya pag mag-uli ag nagpangulu diman siya ati sa manga tawu. Nagbuwat siya ati sa Rama usa ka surunugan manga handug sa Panginuun.