1 Samwil 6 - Hanunuu

Inuli maan ti Kaban Kasunduan

¹ Nadugay siyun sa daga manga Pilistiya ti Kaban Panginuun sa sulud pitu ka bulan. Tunda katpung,

² ipinasugu manga Pilistiyu kanda manga manughandug hanggan manugsalumangka, bag-u kanda sinabi magkun, “Hintay ti dapat nimi buwatun tungkul sa Kaban Panginuun? Tultulan sa kanmi nu kabitay nimi inda maibalik sa kay sadili ulian.”

³ Sinmagut sida, “Nu iuli niyu ti Kaban Diyus Israil, kailangan paibahan niyu inda manga handug bayad sa kasalanan. Sa panab-anan inda, umayad kamu ag maalaman niyu nu hayga kamu pinarusahan.”

^4-5 Nagpaingana ti manga Pilistiyu, “Unu kanmi ipadara bilang handug bayad sa kasalanan?” Sinmagut ti manga manughandug hanggan manugsalumangka, “Pagbuwat kamu lima ka gintu kay histuda ga manga bukul ag lima ka gintu histuda angbu, inda angay sa kayamuun manga takinan nita, dahil rinmas-ug sa kanta hanggan sa manga takinan nita ti sarut manga bukul hanggan angbu imaw ti naminsala sa kanta daga. Ihandug niyu inda bilang pagdayaw sa Diyus Israil, barang ngani kay apasan ti pagpakuri sa kanta, sa manga diyus nita, hanggan sa kanta daga.

⁶ Danga yi niyu pagpaganita kanyu manga tagipusuun parihu sa binwat manga Ihipsiyu hanggan nida hari. Pinasnuan lang nida makalakaw ti manga Israilita pagka masyadu yi ti pagpakuri Diyus sa kanda.

⁷ Nakan taynguna, pagbuwat kamu bag-u pag karusa ag pagbuul duwa ka ina baka kay balaw waya nasingkawan. Itakud niyu inda sa manga baka, dapat kailangan niyu tayakan kay anak ag ipauli sa tudiran.

⁸ Bag-u bul-a niyu ti Kaban Panginuun ag paulian sa karusa. Paulian diman niyu sa kay arani ti usa ka kaban may sukad gintu manga bukul ag angbu kanyu ipadara bilang handug bayad sa kasalanan. Palakawa niyu ti manga baka sa unman may maggiya ag pabay-ani sida una naan tag.

⁹ Dapat bantayi niyu nu naan sida pag umatag. Nu tumukad sida sa Bit Simis, usa sa manga banwa manga Israilita, maalaman nita ti Panginuun imaw ti nagpadara inda pag masyadu sarut sa kanta. Dapat nu unman sida atabug sa Bit Simis, maalaman nita balaw ti Panginuun ti nagpakuri sa kanta. Nu unman nitaun lang inda.”

¹⁰ Nakan sinunud ngani nida inda. Nagbuul sida duwa ka ina baka ag itinakud sa karusa. Ag ipinirisu waydi ngani sa tudiran kay manga anak.

¹¹ Ipinasakay nida ti Kaban Panginuun sa karusa hanggan ti kaban may sukad gintu kay histuda ga bukul ag angbu.

¹² Bag-u linmakaw ti manga baka atabug sa Bit Simis unman gid tinmalang una di habang mag-inga. Magdasun sa kanda ti manga takinan Pilistiyu tugka sa katugkaan Bit Simis.

¹³ Tunda katpung, mag-ani tirigu ti manga taga Bit Simis sa karatagan. Pagka nakitan nida ti Kaban Kasunduan, magbaya gid sida.

^14-15 Rinmas-ug ti karusa sa tanman ni Huswi taga Bit Simis, ag pinmat-ung sa arani usa ka daka pag batu. Bin-ul manga Libita ti Kaban Panginuun hanggan ti kaban may sukad gintu kay histuda ga bukul ag angbu, bag-u itinungbaw sa daka pag batu. Pagkatapus, binis-ak nida ti karusa ag ihinandug ti manga baka sa Panginuun bilang handug pagsunugun, ag naghandug diman sida tuhay pag manga handug.

¹⁶ Nakitan lima ka takinan manga Pilistiyu inda tanan, bag-u nuli sida sa Ikrun sa tunda diman pag sirang.

¹⁷ Ti lima ka histuda gintu pag bukul ginan sa lima ka banwa manga Pilistiyu: Asdud, Gasa, Askalun, Gat ag Ikrun. Ipinadara nida inda para sa Panginuun bilang handug bayad sa kasalanan,

¹⁸ kaibahan sa lima ka gintu histuda angbu, angay sa kayamuun tunda pag lima ka may alad batu pag manga banwa Pilistiyu. Inda pag manga banwa hanggan ti manga baryu siyun sa kay sangput sakup di sa tunda pag lima ka takinan. Ti daka pag batu sa tanman ni Huswi taga Bit Simis, ti tinungbawan nida Kaban Panginuun ati di tugka kainda alaala sa nangyari ati.

¹⁹ Dapat may minatay ti Diyus, 70 ka tawu taga Bit Simis dahil binantayan nida kay sukad Kaban Panginuun. Nanruku ti manga tawu dahil sa masyadu pag sarut Panginuun sa kanda.

²⁰ Nagpaingana sida, “Si unu lugud ti makaatubang sa kadayawan Panginuun, ti banal pag Diyus? Naan nguna nita pag ipadara ti Kaban Panginuun hampay maipakarayu sa kanta?”

²¹ Nakan nagpasugu sida manga manugbarita sa manga taga Kiryat Harim ag sinabi ati magkun, “Inuli manga Pilistiyu ti Kaban Panginuun. Pag-ataytag kamu ag daraha niyu inda sa kanyu rugar.”