1 Samwil 5 - Hanunuu

Ti Kaban Kasunduan Diyus ati sa manga Pilistiyu

¹ Pagka naagaw manga Pilistiyu ti Kaban Diyus, dinara nida inda ginan sa Ibinisir atabug sa Asdud.

² Bag-u kanda ipinaslud sa balay nida diyus-diyusan Dagun ag ipinauli sa kay arani.

³ Surip-surip nakitan manga taga Asdud naplid maaw kanda diyus-diyusan si Dagun, masubsuban sa atubangan Kaban Panginuun. Binangun di maan nida si Dagun ag ipinatindug maan sa kay ulian.

⁴ Dapat pagka nasurip maan, nakitan nida naplid yi maan si Dagun, masubsuban sa atubangan Kaban Kasunduan Panginuun. Kay ulu hanggan duwa ka kamang naplud yi, mawayakan sa may arani sabian; kay bilug wadi ti nasawad buu.

⁵ Nakan ngani tugka taynguna ti manga manughandug ni Dagun hanggan ti manga magsaka sa balay diyus niya ati sa Asdud balaw magtata baliwa sa may arani sabian.

⁶ Pinarusahan Panginuun mahigpit ti manga taga Asdud hanggan ti manga rugar siyun sa kay palibut. Pinakan-an sida Panginuun manga bukul imaw ti pinagkaparusa sa kanda.

⁷ Pagka nakitan nida ti nangyari sa kanda, magkun sida, “Danga yi sitay sa kanta ti Kaban Diyus Israil, dahil pinarusahan niya kita hanggan si Dagun kanta diyus.”

⁸ Nakan nagpasugu sida hampay tawagun ti tanan takinan manga Pilistiyu ag pinaingana, “Hintay kanta buwatun tungkul sa Kaban Diyus Israil?” Nagsagut ti manga takinan, “Daraha atabug sa Gat.” Nakan kanda ngani dinara ti Kaban Diyus Israil atabug sa Gat.

⁹ Pagka dinara yi ngani nida ati, pinarusahan Panginuun ti manga taga Gat. Nagkalaguluhan yi lang gid ti manga tawu, dahil pinarusahan Panginuun ti manga gurangun una ti manga anak. Pinamukulan gid sida.

¹⁰ Nakan kanda maan ipinadara ti Kaban Diyus atabug sa Ikrun. Sa pagras-ug di waya Kaban Diyus sa Ikrun, nagriklamu gid ti manga taga Ikrun. Magkun sida, “Dinara nida ti Kaban Diyus Israil hampay kita tanan tabuhun diman matyun.”

¹¹ Nakan ipinatawag nida ti tanan takinan manga Pilistiyu. Pagka nagminsan yi ngani ti manga takinan, magkun ti manga taga Ikrun, “Padarahan duy niyu ti Kaban Diyus Israil. Ipauli yi niyu sa kay sadili ulian hampay balaw kita matyun, una hanggan kanta manga anak.” Sinabi nida inda dahil nag-umpisa yi ti masyadu pag parusa Diyus sa kanda banwa. Magkataranta sida dahil mayamu yi ti namatay.

¹² Tunda pag manga tawu ti balaw namatay pinamukulan diman, kanda maghagad awat sunggu sa langit.