1 Samwil 31 - Hanunuu

Ti Kamatayan ni Saul hanggan Niya Anak

¹ Taynguna, ti manga Pilistiyu nan-gira sa manga Israilita sa Bantud Gilbuwa. Mayamu ti namatay sa manga Israilita, ag ti iba sa kanda nagpinalalagiw.

² Pagbukadun gid manga Pilistiyu si Saul hanggan kay manga anak lalaki, ag minatay nida kay manga anak sida ni Hunatan, Abinadab, ag Malkisuwa.

³ Masyadu gid ti lalabanan nida ni Saul tag sa manga Pilistiyu. Natamaan si Saul pamana ag daka kay biyag.

⁴ Magkun si Saul sa kay tagadara armas, “Gabuta kanmu baladaw ag matya aku, dahil nu unman, sida pag manga unman magsarig sa Diyus imaw ti mumatay sa kangku, surugun nida aku ag pakurianan.” Dapat magkadala manmatay sa kanya kay tagadara armas, nakan bin-ul ni Saul kanya mismu pag baladaw, ag binunu kay sadili.

⁵ Pagka nakitan niya tagadara armas tigbak yi si Saul, binunu diman waydi niya baladaw kay sadili, ag namatay diman siya.

⁶ Nakan sa tunda pag sirang namatay si Saul hanggan kay tulu ka anak lalaki, hanggan ti tagadara niya armas, ag ti tanan niya tawuhan.

⁷ Kaybi pag udas may manga Israilita mag-uli sa karatagan Hisriil hanggan sa dipay Sapa Hurdan. Pagka nakitan nida nagpinalalagiw ti manga sundalu Israil ag namatay yi si Saul hanggan kay manga anak, tinayakan nida kanda manga banwa ag nanpalagiw waydi sida. Nakan sinulud manga Pilistiyu inda pag manga banwa ag inulianan.

⁸ Pagka sa sunud pag sirang, makalawuy kaguluhan, nag-atag ti manga Pilistiyu sa Bantud Gilbuwa manbuul manga kagamitan manga namatay. Nakitan nida ati ti bangkay ni Saul ag kay manga anak.

⁹ Bin-ul nida ti manga armas ni Saul ag pinlud kay ulu. Bag-u nagpadara sida manga manugbarita sa buu daga manga Pilistiyu hampay ibarita ati sa kanda balay manga diyus-diyusan hanggan sa kanda manga kasimanwa kuntay namatay yi si Saul.

¹⁰ Ipinauli nida ti manga armas ni Saul sa balay diyus-diyusan nida si Astarut, ag ipinaku kay bangkay ni Saul sa alad batu banwa Bit San.

¹¹ Nabaritaan manga taga Habis Gilyad ti tanan binwat manga Pilistiyu sa kan Saul.

¹² Nakan linmakaw ti tanan nida maisug pag manga tawu sa buu yabi tugka sa nakaras-ug sida sa Bit San. Bin-ul nida ti bangkay ni Saul hanggan niya manga anak ati sa may alad batu Bit San, dinara nida inda sa Habis ag sinunug ati.

¹³ Bag-u bin-ul nida kay manga but-ul, ilinbung nida inda sa sirung puun kayu tamarisku sa Habis, ag magpa-uray sida sa sulud pitu ka sirang.