1 Samwil 30 - Hanunuu

Ginira ni Dabid ti manga Amalikita

¹ Pagka sa ikatlu pag sirang, nakaras-ug si Dabid hanggan kay manga tawuhan sa Siklag. Pagka ati naalaman nida ginira manga Amalikita ti Nigib, kaibahan yi ti Siklag. Sinunug nida ti Siklag

² ag pinanbihag ti manga babayi hanggan manga anak sa tunda pag banwa. Unman sida may minatay nu unman pinanbihag lang nida sa kanda pag uli.

³ Pagka nakaras-ug si Dabid hanggan kay manga tawuhan sa Siklag, nakitan nida nairub yi kanda rugar, ag kanda manga asawa hanggan manga anak binihag yi.

⁴ Nakan si Dabid hanggan kay manga tawuhan nanlulumian tugka sa nanlumuy sida.

⁵ Kaibahan sa manga binihag kay duwa ka asawa ni Dabid sida ni Ahinuam taga Hisriil ag si Abigil taga Karmilu imaw kay balu ni Nabal.

⁶ Nag-amat di gid ti kakurian ni Dabid dahil magkadaut sa kanya kay manga tawuhan dahil sa pagkabihag nida manga anak, ag naggayak sida bumintuk sa kanya. Dapat pinabaskug siya Panginuun niya Diyus.

⁷ Nakan magkun si Dabid sa manughandug sa kan Abyatar, kay anak ni Ahimilik, “Daraha sa kangku ti ipud manughandug.” Dinara ngani inda ni Abyatar sa kanya.

⁸ Nagpaingana si Dabid sa Panginuun, “Lagsun aw niku ti manga nansalakay sa kanmi? Matalu aw niku sida?” Sinmagut ti Panginuun, “Hu, lagsa nimu sida. Pihu matalu nimu sida ag mairibri di nimu ti manga bihag.”

⁹ Nakan linmakaw si Dabid kaibahan kay 600 tawuhan tugka sa nakaras-ug sida sa luung Bisur. Napatayak ati

¹⁰ kay 200 niya tawuhan dahil magkagasa yi gid sida mandipay sa sapa. Dapat si Dabid naparargu di gid sa kay maglagas kaibahan kay 400 ka tawuhan.

¹¹ Pagka ati may nakitan ti manga tawuhan ni Dabid usa ka Ihipsiyu sa may tanman. Dinara nida inda sa kan Dabid, ag pinakan-an nida danum hanggan tinapay.

¹² Pinakan-an diman nida siya usa ka akup uga igus ag duwa ka akup pinauga ubas, dahil unman gid siya may kinaun ngatay ininum sa sulud tulu ka sirang. Igu nakakaun siya, binmalik maan kay kabisugan bilug.

¹³ Pinaingana siya ni Dabid, “Si unu kanmu amu? Taga naan kawu?” Sinmagut siya, “Usa duy aku ka Ihipsiyu, ag suruguun usa ka Amalikita. Pinabay-anan duy aku niku amu, dahil may sakit aku katpung manga nakalawuy tulu ka sirang.

¹⁴ Ginira duy nimi ti bahagi Nigib pag-ulianan manga Kiritiyu, sa sakup Huda, hanggan diman ti bahagi Nigib pag-ulian manga lahi ni Kalib, bag-u inirub nimi ti Siklag.”

¹⁵ Nagpaingana si Dabid sa kanya, “Mahimu aw nimu kami maibahan atag sa manga tawu nagbihag sa kanmi magtal-anakan?” Sinmagut siya, “Pagsumpa dapu kawu sa kangku sa atubangan Diyus balaw nimu aku matyun ngatay ipakaun sa kang amu, ibahan di kawu niku.”

¹⁶ Nakan nagsumpa ngani si Dabid, ag inibahan sida Ihipsiyu atag sa kinampuhan manga nansalakay. Bag-u ati nakitan nida ti manga Amalikita mawayakan magkaun, ag mag-irinuman bag-u magbarayaan, dahil mayamu kanda naagaw sa manga Pilistiyu hanggan sa daga Huda.

¹⁷ Ginira ni Dabid hanggan niya manga tawuhan sida, ginan sa mag-isalup init tugka waya sa sunud pag yabi. Unman nakapalagiw ti manga Amalikita, purya sa 400 kalay-awan lalaki sinmakay sa kamilyu ag nalagiw.

¹⁸ Nabawi di ni Dabid ti tanan inaghas sa kanda manga Amalikita hanggan kay duwa ka asawa.

¹⁹ Unman may nadura, anak man ngatay gurangun, lalaki man ngatay babayi, ngatay una hintay sa manga naaghas manga Amalikita. Nabawi di tanan inda ni Dabid.

²⁰ Ag inaghas diman ni Dabid ti tanan karanidu hanggan manga baka. Ipinatabug niya inda sa kay manga tawuhan sa kanda mag-uli. Magkun sida, “Inda ngani ti manga naaghas ni Dabid.”

²¹ Pagka rinmas-ug sida ni Dabid sa may sapa Bisur, sinulang sida niya 200 ka tawuhan balaw nagkuyug dahil sa masyadu magkagasa. Pinmakarani sida ni Dabid sa kanda ag kay kinamusta.

²² Dapat may manga daut ag unman may pulus pag manga tawuhan magkun, “Balaw sida mahimu pakan-an huray ginan sa kanta manga nab-ul sa Amalikita, dahil unman sida nagkuyug sa kanta. Bul-a lang nida kanda manga asawa hanggan anak ag pag-ighit yi sida.”

²³ Sinmagut si Dabid, “Manga patar-ari, balaw hustu tunda. Danga pag-irangi ti papalad Panginuun sa kanta. Inalagaan niya kita ag inawatan pumanalu sa kanta manga kalaban.

²⁴ Sa kanyu isip si unu nguna ti mamatingi sa kanyu? Kailangan pakan-i ti tanan. Parihu lang ti huray manga napatayak hampay mamantay sa manga kagamitan nita hanggan ti manga kinmuyug sa labanan.”

²⁵ Inda pag surundanun binwat ni Dabid hampay sundun manga Israilita hanggan tugka kainda.

²⁶ Pagka rinmas-ug sida ni Dabid sa Siklag, ipinadara niya ti pira ka huray kanda naaghas tabug sa kay manga kakilala magpamahala sa Huda, kaibahan ti surat magkun, “Inda kang buluntad pag pakaun sa kanyu ginan sa manga naaghas nimi ginan sa manga kalaban Panginuun.”

²⁷ Inda pag manga rugar kay pinadarahan ni Dabid: Bitil, Ramut Nigib, Hatir,

²⁸ Aruwir, Sipmut, Istimwa,

²⁹ Rakal, sa manga banwa manga Hiramiilita hanggan manga Kiniyu,

³⁰ sa Hurma, Bur Asan, Atak,

³¹ Hibrun ag iba waya pag manga rugar nida naatihan.