1 Samwil 29 - Hanunuu

Binmalik si Dabid sa Siklag

¹ Tinipun manga Pilistiyu ti tanan sundalu nida sa Apik, ti manga Israilita waydi kinmampu sa may bulbugan Hisriil.

² Mintaras maglakaw atabug sa labanan ti manga takinan manga Pilistiyu kaibahan kanda manga sundalu tig 100 ag 1,000 sa kada gurupu, magdasun waydi sa kanda ni Hari Akis sida ni Dabid hanggan kay manga tawuhan.

³ Dapat nagpaingana ti manga kumandir manga Pilistiyu sa kan Akis, “Unu kay pagbuwatun tunda pag manga Hibriyu sitaay?” Sinmagut si Akis, “Tunda pag tawu si Dabid kay suruguun ni Saul, hari Israil. Subra yi usa ka timpu niku siya kaibahan, tunda ginan kay nalagiw sa kan Saul tugka taynguna, unman aku may nakitan daut sa kay binwat.”

⁴ Dapat nangisug sa kanya ti manga kumandir manga Pilistiyu. Magkun sida, “Paulia nimu siya sa ipinakaun nimu pag banwa sa kanya. Balaw kailangan siya kumuyug sa kanta maggira. Barang nu maggira yi kita, kita waya kay matyun hampay madura kay isug niya amu sa kanya.

⁵ Bilang kabay siya yi ngani ti pag-ipadayaw manga babayi Israil habang magsayaw sida ag magkanta magkun, ‘Pira lang ka libu ti minatay ni Saul, dapat kan Dabid bay tig sampu-sampu ka libu’?”

⁶ Nakan tinawag ni Akis si Dabid ag sinabihan, “Magsabi aku tutuu sa atubangan Panginuun buhi kuntay makatiwalaan gid kawu. Nu sa kangku lang, gustu niku kumuyug kawu sa paggira niku dahil ginan di waya sa sirang nimu nagkuyug sa kangku tugka taynguna unman aku may nakitan daut sa kanmu. Dapat unman may tiwala sa kanmu ti iba ka takinan.

⁷ Nakan pag-uli yi lang duy kawu ag danga magbuwat una hintay ti balaw maangayan nida. Pagsa kanmu ti kahusayan.”

⁸ Pinaingana siya ni Dabid, “Unu duy pag kasalanan kang nabwat ginan sa kang kinmuyug sa kanmu tugka taynguna, Mahal Hari? Hayga balaw aku mahimu kumuyug sa paggira niyu sa kanyu manga kalaban?”

⁹ Sinmagut si Akis, “Alam niku mabuut kawu pag tawu parihu sa usa ka anghil Diyus. Dapat kang manga kumandir balaw magkaibug magpakuyug sa kanmu tabug sa girahan.

¹⁰ Kaaga aldaw kawu pag-ipulaw, bag-u suminggit ti init pag-uli yi kawu kaibahan kanmu manga tawuhan.”

¹¹ Nakan maaga ngani binmangun sida ni Dabid hanggan kay manga tawuhan hampay bumalik sa daga manga Pilistiyu. Ag ti manga Pilistiyu nag-ati sa Hisriil.