1 Samwil 28 - Hanunuu

Si Saul ag ti Manugdaniw sa Indur

¹ Ati katpung, tinipun manga Pilistiyu ti manga sundalu nida, nag-alistu sida sa paggira sa manga Israilita. Magkun si Akis sa kan Dabid, “Kailangan pagkuyug kawu hanggan kanmu manga tawuhan sa kanmi hampay manlaban.”

² Magkun si Dabid, “Mayad duy! Taynguna makitan nimu nu hintay kang mabwat, kanmu suruguun.” Sinmagut si Akis, “Mayad gid! Buwatun niku kawu kang alalay hanggan aban.”

³ Tunda katpung namatay yi si Samwil. Pagka namatay siya nanhimanglaw sa kanya ti buu Israil, ag ilinbung sa kay banwa ati sa Rama. Ati katpung pinaighit yi ni Saul ti manga pandaniwan hanggan manga manughula sa Israil.

⁴ Kinmampu ti manga Pilistiyu sa Sunim, ag si Saul waydi kaibahan ti kadamlan Israil ati sa Gilbuwa.

⁵ Pagka nakitan ni Saul ti manga sundalu manga Pilistiyu, dinurnan gid siya kadalaan.

⁶ Nagpaingana siya sa Panginuun nu unu ti angay niya buwatun. Dapat unman siya sinagut Panginuun una sa panab-anan tagin-up, ngatay Urim, una hanggan sa manga purupita.

⁷ Bag-u magkun si Saul sa kay manga suruguun, “Hanapi niyu aku babayi pandaniwan ti mahimu niku mapaingan-an.” Sinmagut kay manga suruguun, “May imaw duy ati sa Indur.”

⁸ Nakan nagpabalhinguun si Saul sa panab-anan pagsulung urdinaryu lang pag rutay. Pagka sa yabi, nag-ati siya sa babayi kaibahan kay duwa niya ka tawuhan. Igu rinmas-ug sida, magkun si Saul sa babayi, “Magkaibug aku manhampang sa karadwa usa ka tawu. Mahimu aw nimu tawagun ti sabihun niku pag tawu sa kanmu?”

⁹ Magkun ti babayi sa kanya, “Hintay duy, gustu aw nimu mamatay aku? Alam diman waydi siguru nimu nu hintay kay binwat ni Saul. Pinaighit niya ti manga pandaniwan hanggan ti manga manughula. Danga pagpaulian sa alangan kang buhi.”

¹⁰ Nagsumpa si Saul sa kanya sa ngaran Panginuun buhi kuntay balaw siya parusahan sa buwatun niya.

¹¹ Pagka sa uryan, magkun ti babayi, “Si unu pag karadwa kanmu gustu hampangun?” Sinabi ni Saul, “Tawaga nimu si Samwil.”

¹² Nakan tinawag ngani babayi si Samwil. Pagka nakitan babayi si Samwil, nagringgit siya mabaskug ag magkun siya sa kan Saul, “Pinaumang nimu aku! Kawu maaw duy si Saul!”

¹³ Magkun si Saul, “Danga duy kawu magkadala. Unu lugud duy kanmu nakitan?” Sinmagut ti babayi, “Nakitan duy niku ti usa ka karadwa magluwang ginan sa basad daga.”

¹⁴ Nagpaingana si Saul, “Kabitay lugud kay uyahun?” Sinmagut siya, “Usa duy ka gurangun lalaki may kulimpay.” Bag-u nasalman ni Saul si Samwil ngani ati, ag linmuhud siya bilang paggalang sa kanya.

¹⁵ Magkun si Samwil sa kan Saul, “Hayga nimu aku pagbalagun sa kang magpahari?” Sinmagut si Saul, “May imaw aku daka pag kakurian. Paglabanan aku manga Pilistiyu ag pinatlikudan yi aku Diyus. Unman yi siya magsagut una di sa tagin-up ngatay sa manga purupita. Nakan kang tinawag kawu hampay sabihun nimu sa kangku nu hintay ti mahimu niku buwatun.”

¹⁶ Sinabi ni Samwil, “Hayga aku kanmu pagpaingan-un? Balaw aw duy binugyahan yi ngap ngani kawu Panginuun ag nagbaliw kalaban nimu siya?

¹⁷ Tinupad Panginuun kay sinabi sa panab-anan niku. Bin-ul niya sa kanmu ti kaharian Israil ag ipinakaun sa kanmu kaparihu Israilita, sa kan Dabid.

¹⁸ Binwat inda Panginuun sa kanmu taynguna, dahil unman nimu sinunud kay sugu kuntay iparanas nimu sa manga Amalikita kay pangagalit.

¹⁹ Aldaw, kawu hanggan ti manga Israilita ipakaun Panginuun sa manga Pilistiyu, ag makaibahan kawu niku hanggan kanmu manga anak lalaki sa ulian manga namatay.”

²⁰ Pagka nadnugan inda ni Saul, naplid lang siya atag sa daga. Masyadu gid siya nadala sa sinabi ni Samwil. Magpanlubay yi gid siya sa lun-us dahil unman siya nangaun sa buu sirang ag yabi.

²¹ Pinakaranyan babayi si Saul. Pagka nakitan babayi masyadu magkadala si Saul, magkun siya, “Mahal Hari, tinupad yi duy niku kanmu pag-isugu sa kangku una alam niku sa alangan kang buhi.

²² Magpakihampang duy aku, patingihi duy aku kanmu suruguun. Pakan-an niku kawu karan-unun hampay bumalik kanmu kabisugan ag pumarargu kawu sa kanmu maglakaw.”

²³ Dapat magkun si Saul, “Balaw aku mangaun.” Inawatan manga tawuhan ni Saul ti babayi sa pagpilit kuntay pagkaun siya, ag pinmasnu yi waydi siya. Tinmindug siya bag-u tinmukaw sa parahuwayan.

²⁴ Iniyaw babayi kay pinatabul baka. Bag-u nagbuul siya arina kay binwat tinapay unman may pamadaka.

²⁵ Ihinayin niya inda sa kan Saul hanggan sa kay manga tawuhan, ag nangaun sida. Pagkatapus, nighit yi waydi sida sa tunda diman pag yabi.