1 Samwil 27 - Hanunuu

Si Dabid Kaibahan ti manga Pilistiyu

¹ Magkun si Dabid sa kay sadili, “Rumas-ug ti sirang matyun aku ni Saul. Mayad waya lumayas yi lang aku atabug sa rugar manga Pilistiyu hampay umapas yi siya sa kay maghanap sa kangku sa Israil, ag makaribri yi aku sa kanya.”

² Nakan inmati ngani si Dabid kaibahan kay 600 ka tawuhan ati sa kan Hari Akis taga Gat, kay anak ni Mauk.

³ Ati sida pag nangulian sa Gat, kaibahan kanda kada magtal-anakan. Tinaban diman ni Dabid kay duwa niya ka asawa sida ni Ahinuam taga Hisriil ag si Abigil taga Karmilu, kay balu ni Nabal.

⁴ Pagka nabaritaan ni Saul nalagiw si Dabid ag inmatag sa Gat, balaw yi niya siya hinanap.

⁵ Pagka sa usa ka sirang, magkun si Dabid sa kan Akis, “Nu pagmayadun nimu aku, mahimu aw sa usa ka banwa sa iba pag rugar kami pag mangulian? Balaw kailangan mangulian kami sitay sa banwa nimu pag ulian bilang hari.”

⁶ Nakan sa tunda diman pag sirang ipinakaun ni Akis sa kanya ti Siklag. Tunda ginan tugka taynguna, ti Siklag imaw ti magkaapu manga hari Huda.

⁷ Nangulian si Dabid sa daga sakup manga Pilistiyu sa sulud usa ka timpu ag upat ka bulan.

⁸ Ati katpung ginira ni Dabid hanggan niya manga tawuhan ti manga Gisuriyu, Gisrita ag Amalikita. Ginan di waya kaybi inda pag manga tawu mag-ulian yi sa rugar arani sa may Sur atabug sa may Ihiptu.

⁹ Nu magsalakay sida ni Dabid, pagmatyun nida ti tanan lalaki hanggan babayi, ag pagbul-un nida ti manga karanidu, baka, asnu, kamilyu kaibahan yi ti manga rutay. Bag-u magbalik maan sida sa kan Akis.

¹⁰ Nu magpaingana si Akis kuntay naan sida pag nan-gira sa tunda pag sirang, kanda pagsabihun ginira nida ti Nigib sa Huda, ngatay ti bahagi Nigib pag-ulian manga Hiramiilita ngatay ti bahagi Nigib pag-ulian manga Kiniyu.

¹¹ Pagmatyun nida ni Dabid ti tanan lalaki hanggan babayi hampay unman may makabarita sa Gat nu hintay gid kay pagbuwatun nida ni Dabid. Pirmi katida kay pagbuwatun habang ati siya sa daga manga Pilistiyu.

¹² Magpaniwala gid si Akis sa kan Dabid nakan magkun siya sa kay sadili, “Pihu gid pagdayuun yi si Dabid niya manga kaparihu Israilita, nakan bumaliw siya suruguun niku hanggan aban.”