1 Samwil 26 - Hanunuu

Balaw yi maan Minatay ni Dabid si Saul

¹ Pagka sa usa ka sirang, may inmati manga taga Sip sa kan Saul sa Gibiya ag magkun, “Magpatagu duy si Dabid sa bantud Hakila, ati sa atubang Hisimun.”

² Nakan ginminan si Saul atabug sa pangawakawaan Sip kaibahan kay 3,000 ka tawuhan imaw kay pinili sa Israil hampay hanapun si Dabid.

³ Kinmampu sida sa puun dalan sa may bantud Hakila, ati sa atubang Hisimun. Si Dabid nagpirmaminti sa pangawakawaan. Pagka nabaritaan ni Dabid kuntay pagsundan siya ni Saul ati,

⁴ nagpadara siya manga manugtiid ag naalaman niya rinmas-ug ngani si Saul.

⁵ Bag-u nag-alistu si Dabid ag inmati sa kampu ni Saul. Nakitan niya maturugan si Saul hanggan si Abnir kay anak ni Nir, imaw ti kumandir manga sundalu. Magkasangputan si Saul niya manga sundalu maturugan diman waydi.

⁶ Pinaingana ni Dabid si Ahimilik, usa ka Hitiyu hanggan si Abisay kay anak ni Siruya kay patar-ari ni Huab magkun, “Si unu sa kanyu ti kumuyug sa kangku hampay sumulud sa kampu ni Saul?” Sinmagut si Abisay, “Aku duy, kumuyug aku sa kanmu.”

⁷ Nakan sinulud nida ni Dabid hanggan ni Abisay ti kampu ni Saul, ag natakdan nida inda maturugan, kay bangkaw mapatukan sa daga sa kay uluhan. Si Abnir hanggan kay manga sundalu maturugan diman sa kay sangput.

⁸ Magkun si Abisay sa kan Dabid, “Taynguna pag sirang, inintirga yi Diyus sa kanmu ti kapanaluhan laban sa kanmu kalaban. Pasnui yi nimu aku kang bun-un siya tunda pag bangkaw hampay mituhug siya sa daga. Usa lang siya ka pagbunu udyi may pakadwa.”

⁹ Dapat magkun si Dabid sa kan Abisay, “Danga nimu siya pag matya! Parusahan Panginuun una si unu ti manmatay sa kay pinili pag hari.

¹⁰ Pagpihuun niku sa kanmu, sa atubangan Panginuun buhi, ti Panginuun mismu ti mumatay sa kanya, ngatay mamatay siya sa girahan ngatay sa sakit.

¹¹ Dapat danga gid mana ipahintulut Panginuun aku ti makamatay sa kay pinili pag hari. Bul-un yi lang nita kay bangkaw hanggan kay sukadan danum sa kay may uluhan ag muli yi kita.”

¹² Nakan bin-ul ni Dabid ti bangkaw ag ti sukadan danum sa kay uluhan ni Saul ag nuli yi sida. Unman may nakakit ngatay nakaalam sa nangyari; unman may nipulaw sa kanda dahil pinahamuuk Panginuun kanda turug.

¹³ Bag-u nagtukad sida ni Dabid sa bantud sa dipay bag-u tinmindug sa babaw bantud arayu-rayu waya waydi diit sa kampu ni Saul.

¹⁴ Nagringgit si Dabid sa kan Abnir hanggan sa kay manga kaibahan sundalu magkun, “Abnir, mag-adnugan aw nimu aku?” Sinmagut si Abnir, “Si unu kawu? Unu kanmu kailangan sa hari?”

¹⁵ Sinmagut si Dabid, “Kabay kawu ti pinakamaisug pag lalaki sa buu Israil? Hayga unman nimu pagbantayan mayad ti hari kanmu amu? May nakasulud asan hampay matyun siya.

¹⁶ Balaw angay pabay-anan nimu ti hari! Pag-isumpa niku sa buhi pag Panginuun, kailangan kawu mamatay kaibahan kanmu manga tawuhan dahil unman niyu pagbantayan kaayad kanyu amu, ti pinili Panginuun pag hari. Bantayi nu makitan waya niyu ti bangkaw hari hanggan kay sukadan danum sa kay uluhan?”

¹⁷ Nasalman ni Saul kay busis ni Dabid, nakan magkun siya, “Dabid, anak, kawu aw tunda?” Sinmagut si Dabid, “Aku ngani duy, Mahal Hari.

¹⁸ Hayga paglagsun nimu aku kanmu suruguun? Hintay lugud kang binuwat daut?

¹⁹ Mahal Hari, patingihi nimu kang sabihun. Nu ti Panginuun ti nag-udyuk sa kanyu hampay matyun aku, tanggapun mana niya kang handug para sa kapatawadan. Dapat nu ginan lang inda sa tawu, saadan mana sida Panginuun. Dahil pinalayas nida aku sa magkaapu Panginuun pag daga ag sinabihan pagsamba sa iba ka diyus.

²⁰ Danga mana ipahintulut mamatay aku sa iba ka rugar, arayu sa Panginuun. Hayga nguna aku paghingbutun gid lagsun hari Israil, parihu lang aku sa kutu? Hayga nimu aku paglagsun parihu sa manuk sa kabantudan?”

²¹ Magkun si Saul, “Nagkasala aku. Pagbalik yi kawu Dabid, anak niku, ag balaw yi niku umanun saktan kawu dahil unman nimu aku minatay taynguna pag sirang. Nagbaliw aku usa ka buang dahil sa kang binwat. Daka gid kang kasalanan.”

²² Sinmagut si Dabid, “Indaay yi kanmu bangkaw, pab-ulan nimu sa kanmu tawuhan.

²³ May pirimyu ti Panginuun sa manga tawu matapat ag magbuwat matadlung. Ipinakaun kawu Panginuun sa kang manga kamang taynguna pag sirang, dapat unman niku kawu inunu dahil kawu ti pinili Panginuun pag hari.

²⁴ Pinahalgaan niku kanmu buhi taynguna ag mana pakan-an diman Panginuun halaga kang buhi ag iribri niya aku sa tanan kadautan.”

²⁵ Magsabi si Saul sa kan Dabid, “Anak niku, papaladan gid kawu Diyus. Mayamu waya pag marinu manga bagay kanmu mabuwat ag pihu manalu gid kawu.” Siyun ginan linmakaw yi si Dabid ag nuli yi waydi si Saul.