1 Samwil 25 - Hanunuu

Sida ni Dabid, ni Nabal ag ni Abigil

¹ Ati katpung, namatay si Samwil. Nagtipun ti buu Israil ag nanhimanglaw sida sa kay pagkamatay. Ilinbung siya sa kay ulian sa Rama. Pagka natapus tunda, nighit si Dabid atabug sa pangawakawaan Maun.

² Ati sa Maun, may usa ka tawu mayaman gid ag may daga sa Karmilu. May imaw siya 1,000 kambing hanggan 3,000 karanidu kay pag uguyan ati sa Karmilu.

³ Kay ngaran inda pag tawu si Nabal ginan sa lahi ni Kalib. Kay asawa niya si Abigil. Madunung ag marinu si Abigil dapat si Nabal maisug ag daut kay ugali.

⁴ Mintaras ati sa pangawakawaan si Dabid, nabaritaan niya pagpauguyan ni Nabal kay manga karanidu.

^5-6 Nakan namadara siya sampulu ka tawuhan ati sa Karmilu dara inda pag tultulanun para sa kan Nabal, “Papaladan mana kawu malawig pag buhi. Mana ti papalad pag sa kanmu buu magtal-anakan hanggan sa tanan nimu kasiyunan.

⁷ Nabaritaan niku kuntay mag-uguy kawu kanmu karanidu. Katpung nakaibahan nimi kanmu manga manugbantay karanidu ati sa Karmilu, unman nimi sida inunu ag unman may nu hintay ti nadura sa kanda.

⁸ Paingan-a nimu sida ag sabihun nida kay tutuu. Taynguna, magpakihampang aku pakakitan nimu kaayadan kang manga tawuhan, dahil pista taynguna. Pag ga kanmu anak aku ag kang manga panawuhun pag ga kanmu diman panawuhun; pakan-an sa kanmi una hintay kanmu gustu ipakaun sa kanmi.”

⁹ Pagka rinmas-ug ti manga tawuhan ni Dabid sa kan Nabal, ipinadakit nida kay sinabi ni Dabid, ag inmalagad.

¹⁰ Dapat unman pinansin ni Nabal kay bilin ni Dabid. “Si unu lugud inda pag Dabid kay anak ni Isai? Taynguna pag panahun, mayamu panawuhun maglayas ginan sa kanda amu.

¹¹ Hayga waydi ipakaun niku sa kanyu ti tinapay, danum, hanggan ti taguban para sa manga manug-uguy niku manga karanidu, usa diman unman niku alam nu naan ginan kamu pag rugar?”

¹² Napabalik maan duy kay manga tawuhan ni Dabid ag itinultul nida sa kanya ti tanan sinabi ni Nabal.

¹³ Pagka nasaydan niya inda tanan, magkun siya sa kay manga tawuhan, “Sukbitan niyu kanyu manga baladaw!” Nakan isinukbit manga tawuhan niya kanda manga baladaw, katunda diman kay binwat ni Dabid. Manga 400 tawu ti kinmuyug sa kan Dabid ag 200 ti napatayak hampay mantanud sa kanda kagamitan.

¹⁴ Usa sa manga suruguun ni Nabal ti magsabi sa kan Abigil, imaw kay asawa ni Nabal, magkun siya, “Si Dabid duy namadara manugbarita ag maayad nanpakihampang sa kanmu asawa, dapat inisugan sida nimu asawa.

¹⁵ Mabuut tunda pag tawu sa kanmi, balaw nida kami binwatan daut. Sa buu udas nimi ati sa pasturan arani sa kanda, unman gid may una hintay ti nadura sa kanmi.

¹⁶ Binantayan nida kami yabi ag sirang mintaras magbantay kami karanidu.

¹⁷ Isipa duy nimu kaayad ti marinu nimu buwatun dahil midamhak kanmu asawa hanggan kay buu magtal-anakan. Daut gid subra siya pag tawu nakan unman may nu hintay ti magkaibug manhampang sa kanya.”

¹⁸ Balaw gid nagpadugay si Abigil. Nagpab-ul siya 200 tinapay, 2 ka paknul punu irinmun, lima ka iniyaw karanidu, usa ka saku sinanglay butir, 100 ka akup pinauga ubas, ag 200 akup pinauga igus. Bag-u kay ikinarga inda sa manga asnu,

¹⁹ ag magkun sa kay manga suruguun, “Pag-una kamu, dumasun lang aku.” Dapat unman niya inda ipinaalam sa kay asawa sa kan Nabal.

²⁰ Mintaras masakyan si Abigil sa kay asnu ag paliku yi sa saruy bantud, nakitan niya magras-ug si Dabid hanggan kay manga tawuhan.

²¹ Sa kay pangagalit waydi ni Dabid sa kan Nabal, magkun siya, “Unman may pulus kanta pagbantay sa kay kasiyunan ni Nabal sa pangawakawaan hampay balaw madura inda. Daut waya kay ibinalus niya sa manga mayad nita pag binwat.

²² Parusahan mana aku Diyus nu may sinawadan waya aku buhi lalaki tugka surip sa kanda magtal-anakan.”

²³ Pagka nakitan ni Abigil si Dabid, madaldali siya dinmugsun sa kay asnu ag linmuhud sa kay atubangan ni Dabid.

²⁴ Magkun siya, “Magpakisuyu duy aku, patingihi niyu aku. Pag-akuun duy niku ti salan niku asawa.

²⁵ Danga yi duy nimu paglabuta si Nabal. Daut gid siya pag tawu. Angay lang sa kanya kay ngaran Nabal, kay ibug sabihun ‘buang.’ Patawada gid dahil unman niku nakitan kanmu ipinadara manugbarita atabug sa kan Nabal.

²⁶ “Taynguna duy, ipinahintulut Panginuun balaw mitarus kanmu pag ganti hanggan pagmatay. Pag-isumpa niku sa Panginuun buhi hanggan sa kanmu, mana kanmu manga kalaban hanggan ti tanan magkaibug bumalus sa kanmu bumaliw parihu sa nadangatan ni Nabal.

²⁷ Nakan nu mahimu, tanggapa inda pag manga pamakaun kang dinara para sa kanyu hanggan sa manga tawuhan nimu.

²⁸ Patawada duy mana nimu kang manga kakurangan. Pagpihuun gid niku piliun kawu Panginuun bilang hari ag pumarargu sa tanan nimu lahi ti kaharian niyu, dahil kanmu pagbuwatun para sa kanya. Unman may makatalu kadautan sa kanmu mintaras buhi kawu.

²⁹ Una may manlagas sa kanmu hampay matyun kawu, alagaan di kawu Panginuun nimu Diyus, parihu sa tawu mag-alaga kay mahalaga pag bagay. Dapat kanmu manga kalaban ilabyug lang parihu sa paglabyug usa ka tawu sa batu.

³⁰ Nu natupad yi ti tanan itinaratu Panginuun pag kaayadan sa kanmu ag humari yi kawu sa Israil,

³¹ balaw kawu kunsinsiyahun dahil unman kawu nagbalus ngatay nagmatay. Ag nu papaladan yi kawu Panginuun, magpakihampang aku danga nimu aku pagkalimti kanmu suruguun.”

³² Magkun si Dabid sa kan Abigil, “Dayawun ti Panginuun, ti Diyus Israil, ti nagpadara sa kanmu taynguna pag sirang hampay pumasampak sa kangku.

³³ Salamat sa Diyus sa kanmu mayad pag kaisipan ag pag-ampara sa kangku sa pagbalus ag pagmatay sa kainda pag sirang.

³⁴ Nu unman kawu nagdaldali sa kanmu pagsampak sa kangku, unman gid mana may nasawad buhi sa manga tawuhan ni Nabal kinaaldawan. Isinumpa niku tunda sa Panginuun buhi, ti Diyus Israil, siya ti nag-ampara sa kangku sa pagbuwat daut sa kanyu.”

³⁵ Tinanggap ni Dabid ti manga pakaun ni Abigil ag magkun, “Pag-uli yi kawu, danga yi magkaarimputu. Buwatun niku kanmu manga pag-ipakihampang.”

³⁶ Pagka rinmas-ug si Abigil sa kay balay, magkasayahan sida ni Nabal ga pista yi sa kaharian. Masyadu gid masulung si Nabal ag langu yi gid siya, nakan unman yi niya itinultul tugka sa surip sa kan Nabal kay pagpasampak sa kan Dabid.

³⁷ Igu surip, pagka udyi langu siya, tinultulan siya ni Abigil sa nangyari. Pagka nasaydan tunda ni Nabal, inataki siya sa pusu ag nan-ganit lang.

³⁸ Pagkalawuy sampulu ka sirang, pinaamat waya gid Panginuun kay mag-asaydan ag namatay siya.

³⁹ Pagka nabaritaan ni Dabid kuntay namatay yi si Nabal, magkun siya, “Dayawun ti Panginuun! Siya ti nagbalus sa kan Nabal dahil sa kay pagpuya sa kangku. Balaw niya pinahintulutan aku waya ti makabuwat sa kanya tunda. Pinarusahan niya si Nabal sa daut niya pag binwat sa kangku.” Pagkatapus, nagpadara tultulanun si Dabid sa kan Abigil tabug kay paghilingun asawahun niya inda.

⁴⁰ Pagras-ug manga manugbarita ni Dabid sa Karmilu, magkun sida sa kan Abigil, “Pinaataytag kami ni Dabid sa kanmu hampay bul-un kawu ag kay asawan-un.”

⁴¹ Linmuhud si Abigil ag magkun, “Magpasnu aku. Alistu aku sa pagsirbi sa kanya hanggan sa kay manga suruguun.”

⁴² Madaldali sinmakay si Abigil sa asnu kinmuyug sa manga manugbarita ni Dabid. Kaibahan niya kay lima ka suruguun babayi ag inasawa siya ni Dabid.

⁴³ Inasawa diman ni Dabid si Ahinuam taga Hisriil, ag sida duwa kay asawa ni Dabid.

⁴⁴ Kay un-an asawa ni Dabid si Mikul ipinakaun ni Saul sa kan Paltiil kay anak ni Lais taga Galim.