1 Samwil 24 - Hanunuu

Kinaawaan ni Dabid si Saul

¹ Pagka binmalik si Saul ginan sa paggira sa manga Pilistiyu, sinabihan siya kuntay ati sa pangawakawaan In-Gidi si Dabid.

² Nakan pinmili siya 3,000 tawu ginan sa buu Israil ag linmakaw sida hampay hanapun si Dabid, arani sa may mabatu pag rugar pag-ulianan manga maila pag manga kambing.

³ Nakaras-ug sida sa tudiran manga karanidu sa saruy dalan, nu naan may lukib ati. Sinmulud si Saul atag ag inmugat. Ati maaw sa kay sulud gid bahagi lukib pag mataguan si Dabid hanggan kay manga tawuhan.

⁴ Magkun kay manga tawuhan ni Dabid, “Inda yi ngani ti sinabi Panginuun pag udas kay ipakaun kanmu kalaban sa kanmu, ag kawu yi ti bahala nu hintay kanmu gustu buwatun sa kanya.” Malway-malway napakarani si Dabid sa kan Saul ag rinapas kay baliw laylayan rutay sa unman nakamatang.

⁵ Dapat igu tunda nabwat niya magkaalangan siya dahil kay rinapas ti laylayan rutay ni Saul.

⁶ Magkun siya sa kay manga tawuhan, “Danga mana ipahintulut Panginuun buwatan niku daut kang hari, ti pinili Panginuun.”

⁷ Sa tunda pag sinabi ni Dabid, binilinan niya kay manga tawuhan, ag balaw niya sida pinahintulutan salakayun si Saul. Nighit si Saul ginan sa lukib ag naparargu sa kay panlakawun.

⁸ Lagat-lagat linmuwang yi waydi si Dabid sa lukib ag tinawagan niya si Saul, “Mahal Hari!” Pagka inmaliwliw si Saul, linmuhud si Dabid ag napayuk-ub sa kay atubangan.

⁹ Bag-u magkun siya sa kan Saul, “Hayga kawu magpaniwala sa manga tawu magsabi kuntay maggayak aku matyun kawu?

¹⁰ Taynguna pag sirang, makitan nimu nu kabitay kawu ipinakaun Diyus sa kang manga kamang ati sa sulud lukib. Sinabi sa kangku niku iba manga tawuhan kuntay matya yi niku kawu dapat unman niku binwat. Sinabi niku sa kanda balaw niku unhun kang hari dahil pinili siya Panginuun.

¹¹ Amang, malu bantayi nimu kanmu baliw rutay bitbit niku, ginan inda sa laylayan nimu rutay. Rinapas niku inda dapat unman niku kawu minatay. Magpatutuu lang inda unman niku kawu buwatan kadautan ngatay balaw niku kawu kalabanun. Unman aku may kasalanan sa kanyu dapat aku kanyu pag bukadun hampay matyun.

¹² Ti Diyus mana imaw ti manhukum sa kanta duwa, ag mana parusahan kawu Diyus sa manga pagbuwatun nimu sa kangku. Dapat aku unman gid may buwatun daut sa kanmu,

¹³ imaw ngani ti pagkumnun sa sarabihun, ‘Ti daut lang pag tawu ti magbuwat daut.’ Nakan balaw niku kawu buwatan kadautan.

¹⁴ Si unu lugud aku nakan paglagsun Hari Israil? Parihu lang waydi aku sa namatay idu ngatay kutu.

¹⁵ Ti Panginuun mana ti humukum ag magpasya nu si unu ti may salan sa kanta duwa. Mana sagutun niya ag apinan aku, ag iribri ginan sa kanmu manga kamang.”

¹⁶ Pagka natapus kay magbagaw ni Dabid, magkun waydi si Saul, “Kawu aw tunda Dabid, anak?” Ag nanlumi matnug si Saul.

¹⁷ Magkun waya siya, “Mas matadlung kawu kaysa kangku. Daut kang magbantay sa kanmu dapat mayad kanmu pag-ibalus sa kangku.

¹⁸ Taynguna pag sirang, ipinakakit nimu kanmu kaayadan. Ipinahintulut aku Panginuun sa kanmu manga kamang hampay kanmu matyun dapat unman nimu inda binwat.

¹⁹ Ti iba nu makitan yi nida kanda kalaban, balaw yi nida inda pagpalpasan. Pirimyuhan mana kawu Panginuun dahil sa kanmu ipinakakit pag kaayadan sa kangku taynguna.

²⁰ Alam niku kawu humari gid, ag ti kaharian Israil rumig-un sa kanmu pagpanguna.

²¹ Taynguna, pagtaratu kawu sa kangku sa ngaran Panginuun kuntay balaw nimu matyun kang lahi hampay balaw madura kang ngaran magtal-anakan.”

²² Nakan nanaratu si Dabid sa kan Saul. Bag-u namululagan yi sida siyun ginan, si Saul nuli yi dapat si Dabid hanggan kay manga tawuhan binmalik sa kanda nagpatag-an.