1 Samwil 23 - Hanunuu

Irinibri ni Dabid ti Banwa Kiyla

¹ Pagka sa usa ka sirang, ibinarita sa kan Dabid kuntay sinalakay manga Pilistiyu ti Kila ag inaghas ti manga tirigu sa giriukan.

² Nagpaingana si Dabid sa Panginuun, “Girahun aw duy niku ti manga Pilistiyu?” Sinmagut ti Panginuun, “Hu, giraha nimu sida ag ribrihan nimu ti Kiyla.”

³ Dapat magkun kay manga tawuhan ni Dabid, “Atay di waya ngani sa Huda magkadala yi kami, lalu waya nu atag kami sa Kila hampay manlaban sa manga Pilistiyu.”

⁴ Nagpaingana maan si Dabid sa Panginuun, ag magkun ti Panginuun, “Pag-atag kawu sa Kila dahil papanaluhun kawu niku laban sa manga Pilistiyu.”

⁵ Nakan nag-atag ngani sa Kila si Dabid kaibahan kay manga tawuhan. Mayamu pag manga Pilistiyu ti pinanmatay nida; bin-ul nida ti manga hayup ag irinibri nida ti taga Kila.

⁶ (Katpung nalagiw si Abyatar atabug sa kan Dabid sa Kila, dinara niya ti ipud manughandug.)

Linagas ni Saul si Dabid

⁷ May nagtultul sa kan Saul kuntay si Dabid inmati sa Kila. Nakan magkun si Saul, “Ipinahintulut yi siya Diyus sa kangku, ga ikinulung niya kay sadili sa kay pagsulud sa banwa magkasangputan alad batu.”

⁸ Nakan ngani tinipun ni Saul ti tanan tawuhan niya hampay atabug sa Kila ag girahun si Dabid hanggan kay manga tawuhan.

⁹ Pagka naalaman ni Dabid kay gayak ni Saul, sinabihan niya ti manughandug si Abyatar kuntay bul-a ti ipud manughandug.

¹⁰ Nandarangin si Dabid, “Panginuun, Diyus Israil, nabaritaan duy nimu suruguun kuntay maggayak si Saul ataytabug sa Kila hampay dautun inda pag banwa dahil lang sa kangku.

¹¹ Ataytag gid aw lugud si Saul parihu sa kang nasaydan? Ipahintulut aw nguna aku manga nasakupan Kila sa kan Saul? Panginuun, Diyus Israil, saguta duy kanmu suruguun.” Nagsagut ngani ti Panginuun, “Hu, ataytabug ngani siya.”

¹² Nagpaingana maan si Dabid, “Aku hanggan kang manga tawuhan ipahintulut aw manga nasakupan Kila sa kamang ni Saul?” Sinmagut ti Panginuun, “Hu, ipahintulut nida kamu.”

¹³ Nakan nighit si Dabid ginan sa Kila kaibahan kay 600 ka tawuhan ag napahalin-halin sida rugar. Pagka nabaritaan ni Saul kuntay nalagiw yi si Dabid ginan sa Kila, balaw yi siya dinmiritsu atag.

¹⁴ Napatagu si Dabid sa manga paratag-an sa pangawakawaan hanggan sa kabantudan pangawakawaan Sip. Sirang-sirang paghanapun siya ni Saul, dapat unman siya pag-ipahintulut Diyus sa kan Saul.

¹⁵ Sa tunda katpung ati di waya si Dabid sa Huris sa pangawakawaan Sip, nabaritaan niya ataytag si Saul hampay matyun siya.

¹⁶ Inati siya ni Hunatan hampay pabisugun kay pagsarig sa Diyus.

¹⁷ Sinabi ni Hunatan, “Danga kawu magkadala. Balaw kawu labutun niku ama. Alam niku ama kawu ti humari sa Israil ag kay pangadwa lang aku sa kanmu.”

¹⁸ Nagbuwat kasunduan sida duwa sa atubangan Panginuun. Bag-u nuli yi si Hunatan dapat napatayak di si Dabid sa Huris.

¹⁹ Taynguna, may manga taga Sip nag-ati sa kan Saul sa Gibiya ag magkun, “Magpatagu duy si Dabid ati sa kanmi, ati sa manga paratag-an sa Huris, sa kabantudan Hakila, sa kanaway baliwa Hisimun.

²⁰ Nakan Mahal Hari, pag-ati duy kamu una hintay pag udas nu magkaibug kamu ag kami yi ti bahala, ipakaun nimi sa kanyu si Dabid.”

²¹ Sinmagut si Saul, “Papaladan mana kamu Panginuun sa kanyu pag-alaala sa kangku.

²² Paglakaw yi kamu ag pihua niyu nu naan siya pag umatag ag nu si unu ti nakakit sa kanya ati, dahil alam niku madunung gid siya.

²³ Alama niyu nu naan siya pag mahimu makapatagu ag pagbalik kamu sitay nu pihu yi kawu. Bag-u kumuyug aku sa kanyu nu ahan di waya siya, hanapun niku siya una naan katpung sa buu daga Huda.”

²⁴ Nakan inmuna sida sa kan Saul atabug sa Sip. Tunda katpung, sida waydi ni Dabid hanggan kay manga tawuhan ati sa pangawakawaan Maun sa Karatagan Hurdan, sa abagatnan Hisimun.

²⁵ Pagka rinmas-ug si Saul hanggan kay manga tawuhan sa Sip, hinanap nida si Dabid. Pagka naalaman inda ni Dabid, napatagu siya sa daka pag batu sa pangawakawaan Maun ag ati siya pag inmuli. Pagka nabaritaan inda ni Saul, inatag niya ti pangawakawaan Maun hampay hanapun si Dabid.

²⁶ Mintaras si Saul hanggan kay manga tawuhan ati sa baliw bantud, sida waydi ni Dabid ag kay manga tawuhan ati waydi sa baliw saruy bantud magdaldali makapakarayu sa kan Saul. Pagka arani yi sida matakdan ni Saul kaibahan kay manga tawuhan,

²⁷ rinmas-ug ti usa ka manugtultul magkun sa kan Saul, “Pagbalik dap duy kawu dahil ginira manga Pilistiyu kanta banwa.”

²⁸ Nakan inmapas si Saul sa kay maglagas sa kan Dabid ag binmalik hampay labanan ti manga Pilistiyu. Dahil siyun pag rugar sida nagbululagan ni Dabid ag ni Saul, iningarnan tunda pag rugar “Batu Pagbululagan.”

²⁹ Siyun ginan, naparargu si Dabid sa manga paratag-an sa In-Gidi ag ati pag nangulian.