1 Samwil 22 - Hanunuu

Inmati si Dabid sa Adulam ag Mispa

¹ Nighit si Dabid ginan sa Gat, bag-u nalagiw atabug sa lukib Adulam. Pagka nabaritaan inda manga patar-ari ag katawuhan ni Dabid, inatag nida siya hampay ibahan ati.

² Kinmuyug yi waydi sa kan Dabid ti manga tawu magkakuri, ti may manga utang, hanggan ti balaw magkasulung sa kanda buhi. Manga 400 kanda bilang tanan ag si Dabid kanda takinan.

³ Siyun ginan, inmatag si Dabid sa Mispa sakup Muab ag magkun sa hari Muab, “Pahintulutan aw duy nimu kang manga gurang sitaay dap pag mangulian tugka sa unman waya niku siguradu nu unu ti kagustuhan Diyus sa kangku?”

⁴ Pinmasnu ngani ti hari, nakan tinayakan niya kay manga gurang sa hari Muab habang ati siya sa matibay pag paratag-an.

⁵ Usa ka sirang, magkun si Purupita Gad sa kan Dabid, “Pag-ighit yi duy kawu sitay ginan sa kanmu pag patag-an ag pag-atag kawu sa Huda.” Nighit ngani si Dabid ag inmati sa kabantudan Hirit.

Ipinamatay ni Saul ti manga Manug-asiwa Nub

⁶ Nabaritaan ni Saul kuntay nakitan yi sida ni Dabid hanggan kay manga tawuhan. Tunda katpung matukawan si Saul sa sirung kayu tamarisku, ati sa bantud Gibiya. May hiyaput siya bangkaw ag masangputan sa kanya kay manga manugpamahala.

⁷ Magkun si Saul sa kanda, “Pagpatingi kamu, manga taga Binhamin! Tinaratuhan aw kamu ni Dabid kuntay ayawan niya kamu tanman hanggan ubasan? Nagtaratu aw lugud siya sa kanyu kuntay kamu tanan buwatun niya kumandir manga sundalu?

⁸ Tunda aw ngani kay dahilan nu hayga kamu napakampi sa kanya laban sa kangku? Unman gid una di usa sa kanyu ti nagsabi sa kangku kuntay nagbuwat kasunduan kang anak sa kan Dabid. Unman yi lang kamu magkataranta para sa kangku, dahil unman niyu sinabi sa kangku inudyukan niku anak kang suruguun si Dabid kuntay matyun aku parihu sa kay gayak taynguna.”

⁹ Usa sa manga matindugan kaibahan manga manugpamahala ni Saul si Duig taga Idum. Magkun siya sa kan Saul, “Katpung ati aku sa Nub, nakitan niku si Dabid inmati sa kan Ahimilik kay anak ni Ahitub.

¹⁰ Pinaingana ni Ahimilik ti Panginuun nu unu ti dapat buwatun ni Dabid, bag-u pinakan-an waya duy niya karan-unun ag ipinakaun diman duy ti baladaw ni Gulyat taga Pilistiya.”

¹¹ Ipinatawag ni Saul ti manughandug si Ahimilik, kay anak ni Ahitub, hanggan kay buu magtal-anakan manga manughandug sa Nub.

¹² Pagka rinmas-ug sida, magkun si Saul, “Pagpatingi kawu sa kangku, anak ni Ahitub.” “Magpatingi duy aku, Mahal Hari,” kay sagut ni Ahimilik.

¹³ Magkun si Saul sa kanya, “Hayga kawu nanpakampi sa kan Dabid laban sa kangku? Hayga pinakan-an waya nimu siya karan-unun ag baladaw? Hayga nagpaingana waya kawu sa Diyus para sa kanya? Unman aw lugud nimu alam maglaban siya sa kangku ag paggayakun niya aku matyun?”

¹⁴ Sinmagut si Ahimilik, “Balaw aw lugud kabay si Dabid kanmu manugang ag tapat gid nimu pag suruguun? Bukud waya siti, siya duy ti takinan manga guwardiya niyu ag paggalangun siya niyu magtal-anakan.

¹⁵ Hu, nagpaingana ngani aku sa Diyus para sa kanya, dapat ginan di waya kaybi pagbuwatun yi niku inda sa kanya. Magpakihampang duy aku, danga duy kawu magkagalit sa kangku hanggan sa kang magtal-anakan tungkul sa inda pag bagay, dahil unman aku may alam sa kay manga gayak laban sa kanmu.”

¹⁶ Dapat magkun ti hari, “Pihu gid mamatay kawu, Ahimilik, kaibahan kanmu buu magtal-anakan.”

¹⁷ Bag-u sinugu ni Saul ti manga guwardiya sa kay arani, “Matya niyu inda pag manga manughandug Panginuun dahil napakampi sida sa kan Dabid. Alam nida nalagiw si Dabid ginan sa kangku dapat unman nida sinabi sa kangku.” Dapat balaw inunu manga takinan hari ti manga manughandug Panginuun.

¹⁸ Nakan si Duig yi lang ti sinugu hari imaw ti manmatay sa manga manughandug, ag minatay waydi ngani sida ni Duig. Sa tunda pag sirang 85 ka lalaki nakasulung ipud manughandug ti minatay ni Duig.

¹⁹ Ipinamatay diman ni Saul ti tanan mag-ulian sa Nub, ti banwa manga manughandug: ti manga lalaki, manga babayi, manga kalay-awan, manga lapsag, manga baka, manga asnu, manga karanidu, hanggan ti manga kambing.

²⁰ Dapat nakapalagiw si Abyatar kay anak ni Ahimilik, ag kinmuyug siya sa kan Dabid.

²¹ Itinultul niya sa kan Dabid kuntay ipinamatay ni Saul ti manga manughandug Panginuun.

²² Magkun si Dabid sa kan Abyatar, “Pagka nakitan aku ni Duig katpung kang inmati sa kan Ahimilik, alam yi niku manultul siya sa kan Saul. Nakan saragtun niku ti pagkamatay nimu magtal-anakan.

²³ Pagkuyug yi lang kawu sa kangku, dahil usa lang ti magkaibug mumatay sa kanta duwa. Danga kawu magkadala. Balaw kawu maunu nu kaibahan nimu aku.”