1 Samwil 21 - Hanunuu

Inmati si Dabid sa Nub

¹ Nag-atag si Dabid sa kan Ahimilik manughandug Balay Diyus sa Nub. Pagka nakitan ni Ahimilik si Dabid nangirkirug gid siya sa kadalaan. Nagpaingana si Ahimilik, “Hayga duy kawu usa-usa?”

² Sinmagut si Dabid, “May isinugu lang sa kangku ataytag ti hari, dapat sinabihan niya aku kuntay danga gid aku magtultul inda una sa kantapu. Nu tungkul sa kang manga tawuhan, sinabihan niku sida mansarampakan lang kami sa usa ka rugar.

³ Kawu duy may makaun aw asan? Mahimu aw nimu aku mapakan-an una lang lima ka bilug tinapay aw ngatay una lang hintay asan ti makaun.”

⁴ Sinmagut ti manughandug, “Unman aku may tinapay atay nu unman tunda lang pag tinapay ti ginan sa atubangan Panginuun. Ipakaun niku inda sa kanmu nu kawu hanggan kanmu manga tawuhan unman nangulid sa babayi taynguna pag sirang.”

⁵ Sinmagut si Dabid, “Unman kami mag-ulid sa babayi nu may lakaw kami. Una pankaraniwan lang kanmi lakaw kailangan pag malumpiyu di kami. Lalu waya gid ti mahalaga pag lakaw.”

⁶ Nakan dahil sa unman may pankaraniwan tinapay, pinakan-an lang manughandug siya tinapay ihinandug sa atubangan Diyus, ginan sa babaw lamisa ag kay di maan inilisan bag-u pag tinapay sa tunda diman pag sirang.

⁷ Sa tunda diman pag sirang, asan waydi kay suruguun ni Saul si Duig taga Idum. Siya ti takinan manga manug-alaga hayup ni Saul. Nagsiyun siya dahil may turupadun siya sa Panginuun.

⁸ Nagpaingana si Dabid sa kan Ahimilik, “May baladaw aw kawu atay ngatay bangkaw? Unman duy aku nakadara kang baladaw ngatay una hintay pag patarum dahil madali ti sugu hari.”

⁹ Sinmagut ti manughandug, “Indaay duy ti baladaw ni Gulyat taga Pilistiya kanmu minatay sa may ratag Ila. Masaputan inda sa rutay sa mag-aday-an ipud manga manughandug. Bul-a nimu nu kanmu pagkaibgan dahil unman yi may tuhay waya pag armas atay.” Magkun si Dabid, “Haytag lugud. Unman yi may parihu sitay pag baladaw.”

¹⁰ Nakan nalagiw si Dabid sa kan Saul, nag-ati siya sa kan Hari Akis taga Gat.

¹¹ Magkun ti manga manugpamahala ni Akis sa kanya, “Balaw aw si Dabid yi ngani tunda hari sa kanda rugar? Kabay si Dabid yi ngani ti pagbayaun manga kababayihan mintaras magsayaw sida ag magkanta, ‘Pira lang ka libu ti minatay ni Saul, dapat kan Dabid bay tig sampu-sampu ka libu’?”

¹² Inisip ni Dabid kanda sinabi, nadala gid siya sa mahimu buwatun sa kanya ni Hari Akis taga Gat.

¹³ Nakan nagpabalhinguun siya ga kurang-kurang; ginurisan niya ti puwirtahan banwa ag pinabulus kay laway sa kay bungut.

¹⁴ Magkun si Akis sa kay manga manugpamahala, “Bantayi niyu! Kurang-kurang tunda pag tawu! Hayga dinara niyu siya sa kangku?

¹⁵ Mayamu yi pag kurang-kurang atay. Hayga waya dinara niyu sa kang balay tunda pag tawu nu katunda lang waydi siya sa kang atubangan?”