1 Samwil 2 - Hanunuu

Ti Darangin ni Hana

¹ Nandarangin si Hana magkumun, “Magbaya aku sa Panginuun. Dahil sa kay binwat, nadura yi kang magkay-a. Pagkasarin-an niku taynguna kang manga kalaban. Magbaya aku sa kay pagribri sa kangku.

² Unman gid may iba banal nu unman ti Panginuun. Unman gid may pumarihu sa kanya. Unman gid may palalan-iban pag batu ti pumarihu sa kanta Diyus.

³ Unman may una si unu sa kanyu ti mahimu makapalabi-labi ngatay makapadayaw-dayaw dahil alam Panginuun Diyus ti tanan pag bagay, ag pagpihuun niya ti manga buwat tawu.

⁴ Pagrurisun niya ti manga may kapangyarihan, dapat pagpabisugun niya ti manga malumuy.

⁵ Ti manga abunda kaybi magtarabahu yi taynguna hampay lang may makaun. Dapat ti manga magkalun-us kaybi abunda yi ngap taynguna. Ti manga unman mag-anak kaybi, mayamu yi kay anak taynguna. Dapat ti manga mayamu kay anak kaybi maruku taynguna dahil udyi may anak.

⁶ Panginuun ti may kapangyarihan pumakaun ngatay bumawi sa arup tawu. Siya ti may kapangyarihan pumauli ngatay bum-ul sa kanda ati sa rugar manga namatay.

⁷ Siya diman ti magpapugri ngatay magpayaman sa tawu. Pag-ipaababa niya ti iba, ti iba kay pag-ipaabwat.

⁸ Pagbangunun niya ginan sa kakurian ti manga makuri. Pag-ipatukaw niya sida kaibahan manga kilala pag manga tawu bag-u pagdayawun. Siya ti may apu paratukawan kalibutan.

⁹ Paggiyahan niya kay manga masururundun pag manga nasakupan, dapat ti manga magbuwat daut kay rurisun. Unman may pumanalu sa panab-anan sadili kabisugan.

¹⁰ Rurisun niya ti manga maglapastangan sa kanya. Pakurarugun niya ti langit laban sa kanda. Ti Panginuun ti sumintinsiya sa buu kalibutan. Sa panab-anan niya, bumaliw makapangyarihan ag marapanalu kay pinili pag hari.”

¹¹ Siyun ginan, nuli si Ilkana hanggan kay magtal-anakan atabug sa Rama. Dapat si Samwil kay di tinayakan hampay mansirbi sa Panginuun sa karampatan ni Ili, imaw ti manughandug Balay Diyus.

Ti Kasalanan Duwa ka Anak Lalaki ni Ili

¹² Kan Ili duwa ka anak lalaki daut kay manga ugali. Unman gid sida magsunud sa Panginuun.

¹³ Unman nida sinunud ti manga surundanun tungkul sa kahuray manughandug ginan sa handug manga tawu. Inda kanda pagbuwatun nu may maghandug hayup: Habang pagtamaun waya ti manga pag-ihandug taguban, pag-ipakarani yi nida kanda suruguun may bitbit panubuk tulu kay tarum.

¹⁴ Bag-u pagtubkun suruguun ti manga taguban sa basad kawa ngatay anglit. Ti matubuk panubuk imaw yi ti kabahagi manughandug Balay Diyus. Katida kanda pagbuwatun kada manhandug ti manga Israilita ati sa Silu.

¹⁵ Bukud waya siti, bag-u di sunugun ti taba, ti suruguun manughandug magpakarani yi sa manughandug ag magkumun, “Pakan-i duy taguban ti manughandug hampay kay surugbahun. Unman siya magtanggap manga taguban nu tinama yi, kay pagkaibgan tunda di kay latuy.”

¹⁶ Nu sumabi ti manughandug kuntay alagda yi lang tugka sa masunug ti taba bag-u di mahimu bum-ul una kabitay kay kayamu kay kailangan, kumumun ti suruguun, “Balaw duy mahimu! Kailangan ipakaun gid nimu sa kangku kainda yi, dahil nu balaw nimu iayaw, agawun niku tunda.”

¹⁷ Tunda pag kasalanan manga anak ni Ili tutuu gid ungud daka sa kay magbantay Panginuun, dahil unman nida paggalangun ti handug para sa Panginuun.

¹⁸ Taynguna, si Samwil pag anak parargu magsirbi sa Panginuun. May sulung siya ipud human sa linu.

¹⁹ Timpu-timpu pagtahian ni Hana pamababaw pag rutay si Samwil, bag-u pagdarahun niya inda sa kan Samwil sa kada maghandug sida mag-asawa kanda tinimpu pag handug.

²⁰ Ati pagpapaladan ni Ili si Ilkana hanggan kay asawa. Magkun siya sa kan Ilkana, “Mana papaladan kawu Panginuun ag pakan-an di maan niya kawu manga anak sa inda pag babayi, kailis niya hinagad ag ihinandug sa Panginuun.” Bag-u nuli yi maan sida ni Ilkana sa kanda sadili ulian.

²¹ Kinaawaan ngap Panginuun si Hana. Nagkaimaw waya siya anak tulu ka lalaki ag duwa ka babayi. Dapat si Samwil parargu nagdaka magsirbi sa Panginuun.

Si Ili hanggan Kay manga Anak

²² Gurangun yi gid ati katpung si Ili. Naalaman di niya ti tanan pagbuwatun kadautan niya manga anak sa manga Israilita hanggan kanda mag-ulid sa manga babayi magsirbi ati sa may sabian Turda Taragbuan.

²³ Nakan magkun si Ili sa kay manga anak, “Hayga katida kanyu pagbuwatun? Naalaman niku ginan sa tanan tawu kanyu pagbuwatun daut.

²⁴ Apasi yi niyu tunda, manga anak, dahil balaw mayad pag barita kang nasaydan ginan sa nasakupan Panginuun.”

²⁵ Magkun waya gid si Ili, “Nu ti usa ka tawu magkasala laban sa kay kaparihu, mahimu ti Diyus di ti manab-anan sa kanda. Dapat nu ti usa ka tawu magbuwat kasalanan laban sa Panginuun, si unu waya ti manab-anan sa kanda?” Dapat madi katida kay tamyaw nida ama, unman diman naniwala sa kanya kay manga anak, dahil paggayakun yi Panginuun matyun sida.

²⁶ Si Samwil waydi mag-amat magdaka ag pagbayaun gid siya Panginuun hanggan manga tawu.

Ti Pasandam laban sa Magtal-anakan ni Ili

²⁷ Pagka dugay, may usa ka purupita nag-ati sa kan Ili, kay sabi magkun, “Inda kay sinabi Panginuun magkun, ‘Napakakit aku sa kanmu ginurang sa kan Aarun hanggan sa kay magtal-anakan katpung ati di waya sida sa Ihiptu panawuhun hari Ihiptu.

²⁸ Sa tanan linahi Israil pinili niku kanmu ginurang hampay siya hanggan kay linahi yi ti manughandug sa kang balay, hampay sida tig asikasu sa surunugan pag-ihandug sa kangku, sa magtuub kamangyan, sa pagsulung ipud manughandug sa kang atubangan. Pinakan-an diman niku sida kabahagi ginan sa manga handug Israilita sa panab-anan apuy.

²⁹ Taynguna, hayga kanyu waya pagpakialaman ti manga handug para sa kangku? Hayga paggalangun nimu kanmu manga anak subra man sa kangku? Pinasugtan nimu sida magpatabul sa kanda sadili sa magpakakaun pinakamarinu pag taguban handug manga Israilita para sa kangku?

³⁰ Aku, kanyu Panginuun, ti Diyus Israil, nantaratu kaybi kuntay kamu lang hanggan kanyu manga ginurang linahi ti makasirbi sa kangku bilang manughandug tugka aban. Dapat unman yi mahimu taynguna, dahil kilalan-un niku ti magkilala sa kangku, dapat kang dayuun ti magdayu sa kangku.

^31-32 Tandai niyu inda, rumas-ug ti sirang rurisun niku kanyu manga kalay-awan hanggan ti iba waya ka lahi niyu manga ginurang. Mangagwanta kamu ag balaw niyu malakawan ti ipakaun niku pag kaabundahan sa Israil. Bumaliw dag-ud kanyu buhi.

³³ Balaw niku paighitun ti iba sa kanyu sa kanda magsirbi sa kangku bilang manughandug, dapat makalakaw sida masyadu pag kakurian, ag unman sida mabuhi dugay.

³⁴ Ag bilang palatandaan para sa kanmu mangyari inda pag manga bagay, sabay mamatay kanmu anak duwa ka bilug sida ni Hupni ni Piniis, sa usa lang ka sirang.

³⁵ Manpili aku manughandug kay gid matinupadun sa kangku ag masurundun sa kang kagustuhan. Pakan-an niku siya manga lahi imaw ti sumirbi sa kang pinili pag hari sa unman may katapusan.

³⁶ Ti tanan masawad sa manga lahi nimu mamalimus kuwarta ngatay karan-unun sa inda pag manga manughandug. Manpaawa-awa sida kuntay buwata sida suruguun manga manughandug hampay may makaun sida.’ ”