1 Samwil 19 - Hanunuu

Paggayakun Matyun ni Saul si Dabid

¹ Taynguna, magkun si Saul sa kan Hunatan hanggan sa tanan niya manugsirbi kuntay matya si Dabid. Dapat mahal gid ni Hunatan si Dabid,

² nakan kay pinaandaman siya. Magkun siya, “Maghanap paraan kang ama hampay matyun kawu, nakan pag-aman kawu. Aldaw paghanap kawu paratag-an sa may tanman ag danga kawu mag-ighit ati ginan.

³ Darahun niku atabug kang ama ag hampangun niku siya tungkul sa kanmu. Bag-u sabihun niku sa kanmu kanmi hinampangan.”

⁴ Pagka surip, hinampang ngani ni Hunatan si Saul tungkul sa kan Dabid ati sa bantud ag dinayaw niya inda sa atubangan niya ama. Magkun siya, “Amang, danga duy niyu pag-unuha si Dabid kanyu suruguun dahil unman siya may pagbuwatun daut sa kanyu. Nakabwat waya ngani siya daka pag kaayadan sa kanmu.

⁵ Ipinaun niya kay sadili katpung sa kay pagmatay sa Pilistiyu sa kan Gulyat ag pinanalu Panginuun ti buu Israil. Nakitan nimu inda ag nakabaya kawu. Bati hayga nimu pagkaibgan matyun ti usa ka tawu ud may nabwat salan parihu kan Dabid sa unman may dahilan?”

⁶ Pinakidnugan ni Saul si Hunatan ag nanaratu siya sa ngaran Panginuun buhi balaw yi niya ipamatay si Dabid.

⁷ Pagka dugay, ipinatawag ni Hunatan si Dabid ag itinultul niya ti tanan hinampangan nida ni Saul. Dinara ni Hunatan si Dabid atabug sa kan Saul, sinirbihan maan ni Dabid si Saul ga sa kabag-u.

⁸ Nanlalabanan maan ti manga Pilistiyu hanggan ti manga Israilita, pinamunuan ni Dabid kay manga tawuhan sa paggira. Ginira nida ni Dabid sa buu kabisugan ti manga Pilistiyu, nakan namalalagiwan sida.

⁹ Pagka sa usa ka sirang, habang matukawan si Saul may bitbit kay bangkaw ati sa kay balay, sinuldan yi maan siya daut ispiritu ipinadara Panginuun. Habang magpatunug kay alpa si Dabid,

¹⁰ mag-isip si Saul kay ituhug si Dabid sa lingub sa panab-anan bangkaw, dapat nakaaman di siya. Igu yabi, linmayas yi siya.

¹¹ Namadara kay manga tawuhan si Saul hampay tiidan kay balay ni Dabid para matyun siya sa surip. Dapat pinaandaman si Dabid niya asawa si Mikul, “Nu unman kawu mighit sitay gin taynguna pag yabi, matyun kawu nida aldaw.”

¹² Nakan inawatan ni Mikul makadugsun si Dabid sa may gaha, ag nalagiw si Dabid.

¹³ Binmuul waydi si Mikul usa ka diyus-diyusan, bag-u kay ipinahuway sa kanda igyaan. Pinakumtan niya inda, bag-u sinaput sa bulbul kambing kay ulu.

¹⁴ Pagka rinmas-ug ti manga tawu ipinadara ni Saul hampay dakpun si Dabid, magkun si Mikul sa kanda, “May sakit duy siya, balaw makabangun sa kay igyaan.”

¹⁵ Pagka ibinarita nida inda sa kan Saul, pinabalik maan sida ni Saul hampay bantayan mismu nida si Dabid, ag kaindaay kay sabi, “Daraha niyu siya mahuwayan sa kay igyaan ataytag sa kangku hampay kang matyun siya.”

¹⁶ Dapat pagka sinmulud sida sa balay ni Dabid, naalaman nida ti mahuwayan usa maaw ka diyus-diyusan may bulbul kambing kay ulu.

¹⁷ Magkun si Saul sa kan Mikul, “Hayga pinaumang nimu aku, ag ipalayas kang kalaban?” Sinmagut si Mikul, “Magkun bay siya sa kangku nu balaw niku siya awatan makalayas matyun kunu niya aku.”

¹⁸ Pagka nakalayas si Dabid, inmati siya sa kan Samwil sa Rama ag itinultul niya ti tanan binwat ni Saul sa kanya. Siyun ginan, nag-atag sida ni Samwil sa Nayut ag ati pag nangulian.

¹⁹ May nagbarita sa kan Saul kuntay si Dabid ati sa Nayut sa Rama.

²⁰ Nakan namadara siya manga tawuhan hampay dakpun si Dabid. Dapat igu ati, nakitan nida ti manga purupita magtultul Bagaw Diyus pagpangunahan ni Samwil. Bag-u sinuldan diman Ispiritu Diyus ti manga tawuhan ni Saul ag sida hanggan nagtultul diman tultulanun ginan sa Diyus.

²¹ Pagka nasaydan ni Saul ti nangyari, namadara maan gid siya manga tawuhan hampay dakpun si Dabid. Dapat igu ati sida, katida diman hanggan kanda binwat, nagtultul diman sida Bagaw Diyus. Namadara maan gid si Saul kay manga tawuhan sa ikatlu bisis dapat katida diman gid ti nangyari sa kanda.

²² Pagka sa uryan, si Saul yi mismu ti nag-atag sa Rama. Pagka rinmas-ug siya ati sa may daka tiripunan danum sa Siku, namaingana siya nu naan sida ni Samwil ni Dabid. Sinabi sa kanya kuntay ati sida sa Nayut.

²³ Nakan inmati si Saul sa Nayut. Dapat igu sa dalan di waya siya, sinuldan waydi siya Ispiritu Diyus ag nagtultul waydi siya Bagaw Diyus tugka sa rinmas-ug siya sa Nayut.

²⁴ Pagka ati yi siya, inuba niya kay rutay ag nagtultul Bagaw Diyus sa atubangan ni Samwil. Napahuway siya uba-uba sa buu sirang hanggan yabi. Inda kay dahilan nu hayga magpaingana ti manga tawu magkun, “Purupita yi aw waydi si Saul?”