1 Samwil 18 - Hanunuu

Ti Mag-arampudan ni Dabid ag ni Hunatan

¹ Pagka natapus ti harampangan nida ni Saul ni Dabid, daka gid kay magbaya ni Hunatan sa kay tagipusuun sa kan Dabid. Pagmahalun gid ni Hunatan si Dabid parihu sa kay sadili.

² Siyun ginan, balaw yi pinauli ni Saul si Dabid sa kanda balay.

³ Nagbuwat kasunduan si Hunatan sa kan Dabid kuntay mag-ampud sida hanggan aban dahil mahal niya si Dabid parihu sa kay pagmahal sa kay sadili.

⁴ Ag bilang patutuu niya taratu, inuba niya kay kulimpay ag ipinakaun sa kan Dabid, kaibahan kay balukas, baladaw, pamana hanggan hawud.

⁵ Nabwat ni Dabid ti tanan ipinabwat sa kanya ni Saul, nakan binwat siya takinan manga sundalu. Kinaibgan gid tunda tanan manga nasakupan hanggan diman manga manugpamahala ni Saul.

Magkagalit si Saul sa kan Dabid

⁶ Pagka nuli yi ti manga Israilita ginan sa kay nakamatay ni Dabid sa kan Gulyat, sinulang si Saul manga babayi ginan tanan banwa sa Israil. Magsayaw-sayaw sida magkanta may pamakaransing hanggan alpa.

⁷ Kaindaay kanda kanta: “Pira lang ka libu ti minatay ni Saul, kan Dabid bay tig sampu-sampu ka libu.”

⁸ Pagka nadnugan ni Saul kanda pagkantahun, magkagalit gid siya. Mag-isip siya, “Sinabi nida tig sampu-sampu ka libu ti minatay ni Dabid, dapat ti sa kangku libu-libu lang. Sa sunud siya yi ti kilalan-un hari.”

⁹ Nakan tunda di ginan, pagbantayan yi niya ka mayad si Dabid dahil mag-imun siya.

^10-11 Kinaaldawan, sinuldan si Saul daut ispiritu ipinadara Diyus, nagbaliw ga kurang-kurang siya sa sulud nida balay. Magpatunug si Dabid alpa para sa kan Saul parihu sa kay kinaantiguhan pagbuwatun. Magkumun si Saul sa kay sadili habang may hiyaput siya bangkaw, “Bangkawun niku si Dabid hampay mituhug siya sa lingub.” Bag-u binangkaw niya si Dabid kadwa ginan, dapat nakaaman di si Dabid.

¹² Magkadala si Saul sa kan Dabid dahil paggiyahan siya Panginuun, dapat siya bay pagpabay-anan yi Panginuun.

¹³ Nakan kay ipinakarayu si Dabid, ag binwat niya kumandir 1,000 sundalu. Pinangunahan ni Dabid ti manga sundalu sa girahan.

¹⁴ Magpanalu gid si Dabid sa tanan niya pagbuwatun dahil kaibahan niya ti Panginuun.

¹⁵ Pagka naalaman ni Saul nu kabitay magpanalu si Dabid, lalu di siya pagkulbaan.

¹⁶ Dapat lalu di ngap pagbayaun buu Israil hanggan Huda si Dabid, dahil pagpangunahan niya sida sa manga labanan.

¹⁷ Sa usa ka sirang, sinabi ni Saul sa kan Dabid, “Handa niku ipakaun sa kanmu kang panganay pag anak si Mirab bilang asawa nimu, dapat kailangan mapatutuuhanan niku kawu maisug pag manugdugma para sa Panginuun.” Magkun si Saul sa kay sadili, “Sa panab-anan tunda matyun si Dabid manga Pilistiyu balaw aku kailangan ti makamatay sa kanya.”

¹⁸ Dapat magkun si Dabid sa kan Saul, “Si unu gid aku hanggan kang magtal-anakan hampay umagadun aku hari?”

¹⁹ Pagka udas yi ipaasawa si Mirab sa kan Dabid, ipinaasawa ni Saul si Mirab sa kan Adriyil taga Mihula.

²⁰ May usa waya ka anak babayi si Saul si Mikul magkaibug gid sa kan Dabid. Pagka naalaman inda ni Saul, magbaya siya.

²¹ Magkun si Saul sa kay sadili, “Ipaasawa niku si Mikul sa kan Dabid, buwatun niku siya paun hampay mamatay manga Pilistiyu si Dabid.” Nakan kay sinabi sa kan Dabid, “May paraan waya kawu hampay maumagad niku.”

²² Hinampang sa lihus ni Saul kay manga suruguun hampay sabihun ti kaindaay sa kan Dabid: “Pagbayaun gid kawu hari hanggan niya tanan manga suruguun. Nakan pagpasnu yi kawu umagad niya.”

²³ Pagka sinabi nida inda sa kan Dabid, nagsagut siya, “Unman niku kaya bumayad sa hari agud maasawa niku kay anak. Makuri lang aku, ginan sa unman kilala pag magtal-anakan.”

²⁴ Pagka ibinarita nida sa kan Saul kay sinabi ni Dabid,

²⁵ sinabi ni Saul, “Sabiha niyu sa kan Dabid ti pag hagadun lang niku bayad sa pagpakasal sa kang anak 100 lukub pinagturian manga Pilistiyu bilang balus sa kang manga kalaban.” Dapat ti gayak ni Saul midamhak si Dabid sa kamang manga Pilistiyu.

²⁶ Pagka sinabi inda manga suruguun ni Saul sa kan Dabid, nakabaya siya dahil gustu niya mamanugang ti hari. Nakan bag-u rumas-ug ti itinagka pag sirang,

²⁷ ginira ni Dabid hanggan niya manga tawuhan ti manga Pilistiyu, nakamatay sida 200. Bag-u bin-ul nida ti lukub pinagturian manga Pilistiyu, ag dinara nida tabug sa hari. Nakan ipinakaun ni Saul si Mikul sa kan Dabid hampay kay maasawa.

²⁸ Pagka naalaman ni Saul paggiyahan Panginuun si Dabid ag pagmahalun gid siya ni Mikul,

²⁹ lalu di gid siya magkadala sa kan Dabid. Kalaban di gid ni Saul si Dabid habang buhi siya.

³⁰ Parargu ti maggirirahan manga Pilistiyu hanggan Israilita. Kada girahan, magpanalu si Dabid higit sa iba manga may kangaranan ni Saul. Nakan nibantug gid si Dabid.