1 Samwil 17 - Hanunuu

Si Dabid ag si Gulyat

¹ Taynguna, tinipun manga Pilistiyu kanda manga sundalu ati sa Suku sakup Huda hampay man-gira. Nagkampu sida ati sa Ipis Damim, sa tab-anan Suku ag Asika.

² Tinipun diman ni Saul ti manga Israilita, ag nagkampu sida arani sa karatagan Ila. Nag-alistu gid sida sa paggira laban sa manga Pilistiyu.

³ Ti manga Pilistiyu ati sa usa ka bantud ag ti manga Israilita waydi ati sa baliw pag bantud, sa kanda karaw-an ti ratag.

⁴ Kainda, may usa ka anad ag maisug pag manuggira taga Gat kay ngaran si Gulyat. Linmuwas siya sa kampu manga Pilistiyu, bag-u napakarani sa kampu manga Israilita. Kay abwat, may 6 ka luk-an siku.

⁵ Galang kay kalu hanggan galang diman kay panangga sa dubdub, kay buyat 60 ka kilu.

⁶ Galang diman ti mahaklupan sa kay kapusgan hanggan balangbang, bag-u may galang pag bangkaw masuribayan sa kay labay.

⁷ Kay maghiyaptan bangkaw mabuyat ag madamul; kay suru may pitu ka kilu kay buyat. Ati sa kay unahan ti tagadara niya panangga.

⁸ Pinmat-ung si Gulyat ag nanringgit sa manga Israilita, “Kailangan aw waya niyu ti buu gurupu hampay man-gira? Usa lang aku ka Pilistiyu dapat kamu manga suruguun ni Saul. Pagpili yi lang kamu usa ka tawu kanyu ipalaban sa kangku.

⁹ Nu mamatay niya aku, pumasakup kami sa kanyu; dapat nu mamatay niku siya, pumasirung kamu ag sumirbi sa kanmi.

¹⁰ Taynguna, pag akatun niku kamu! Paataytagan niyu ti manlaban sa kangku.”

¹¹ Igu nasaydan inda ni Saul hanggan manga Israilita, nadala gid sida.

¹² Taynguna, may anak si Isai kay ngaran si Dabid. Taga Bitlihim si Isai, ginan sa lahi ni Ipraim sa daga Huda. Gurangun yi si Isai tunda katpung. May walu siya ka anak lalaki.

¹³ Ti tulu ka anak kinmuyug sa kan Saul sa girahan — kay panganay si Ilyab, kay sunud si Abinadab, si Sama kay ikatlu.

¹⁴ Si Dabid kap-usan sa magtar-arian. Mintaras kaibahan ni Saul sa girahan ti tulu,

¹⁵ si Dabid pabalik-balik sa Bitlihim ginan sa kampu ni Saul hampay alagaan ti manga karanidu niya ama.

¹⁶ Sa sulud 40 ka sirang, imaw-imaw diman kada sirang kan Gulyat pagkumnun sa manga Israilita.

¹⁷ Pagka sa usa ka sirang, sinabi ni Isai sa kan Dabid, “Anak, daraha nimu tunda tunga saku pag pinabuti tirigu ag sampulu kabilug tinapay atag sa manga patar-ari nimu sa kampu.

¹⁸ Daraha diman nimu tunda pag sampulu ka bilug kisu sa kumandir manga sundalu. Kamustaha nimu kanda kahamtangan kanmu manga patar-ari ati. Sa pagbalik nimu sitay, pagdara kawu patunay mayad kanda kahamtangan.

¹⁹ Ati sida taynguna sa karatagan Ila, maglaban sa manga Pilistiyu kaibahan ni Saul hanggan ti iba waya manga Israilita.”

²⁰ Pagka aldaw surip binmangun si Dabid ihinanda ti manga pagkaun dararahun niya. Tinayakan niya kay manga karanidu sa usa ka manugbantay karanidu bag-u siya inmalis angay sa kay sugu ni Isai. Pagka siya ati yi sa kampu manga Israilita, magluwas ti manga sundalu maghuruyawan hampay manlaban.

²¹ Pagka lagat-lagat, magkaatubang yi ngani ti manga Israilita ag manga Pilistiyu handa yi sa girahan.

²² Tinayakan ni Dabid kay manga dara sa taga asikasu manga kailangan manga sundalu, ag nalagiw siya atag sa rugar labanan kay kinamusta kay manga patar-ari.

²³ Mintaras sida magharampangan, linmuwang si Gulyat, ti anad pag manuggira taga Gat, tinmindug sa unahan manga Pilistiyu, pag akatun maan niya ti manga Israilita. Nadnugan tunda ni Dabid.

²⁴ Pagka nakitan manga Israilita si Gulyat, nagpinalagiw sida sa subra kadalaan.

²⁵ Nanharampangan sida, “Nakitan aw niyu tunda pag lalaki magdalada hampay akatun ti Israil? Pakan-an hari daka pag pirimyu una si unu ti makamatay sa kanya. Balaw lang tunda, nu unman ipaasawa waya niya kay anak sa kanya, ag balaw yi pabayadun buhis sa Israil kay magtal-anakan.”

²⁶ Namaingana si Dabid sa manga tawu matindugan sa kay arani, “Si unu pag Pilistiyu tida, unman magsarig sa Diyus, mag-akat sa manga sundalu buhi pag Diyus? Unu ti matanggap tawu makamatay sa kanya para mapigil kay magpakay-a niya sa Israil?”

²⁷ Kay sagut manga tawu, “Parihu sa nadnugan nimu, imaw ngani kay pirimyu sa makamatay sa kan Gulyat.”

²⁸ Pagka nadnugan ni Ilyab (kay aka ni Dabid) maghampang si Dabid sa manga tawu, nangisug gid siya. Sinabi niya sa kan Dabid, “Hayga kawu nagsitaytag? Si unu kanmu ipinabantay sa kanta manga karanidu sa pangawakawaan pira-pira wadi ngani ka bilug? Kanmu isip ga si unu yi gid kawu. Alam niku nu kabitay kawu kayabang. Nagsitaytag lang kawu hampay manuud labanan.”

²⁹ Sinabi ni Dabid, “Unu duy kang binwat? Magpaingana lang duy aku.”

³⁰ Pinatlikudan ni Dabid si Ilyab bag-u nagpaingana waya sa iba hampay linawun kay manga magkaalaman, dapat katida diman pag manga sagut kay nadnugan.

³¹ Nakaaput sa kan Saul ti manga paingana ni Dabid. Nakan ipinatawag niya tunda.

³² Pagka rinmas-ug si Dabid, sinabi niya sa kan Saul, “Ti kada usa sa kanta danga magpanlubay dahil lang sa tunda pag Pilistiyu. Aku duy, kanmu suruguun, ti lumaban sa kanya.”

³³ Sinmagut si Saul, “Balaw nimu kaya lumaban sa kanya. Anak waya kawu, dapat siya anad maggira ginan waya sa kay pagkaanak.”

³⁴ Dapat sinmagut si Dabid, “Aku duy, kanmu suruguun, dugay yi manug-alaga karanidu niku ama. Nu may liyun ngatay usu may tangag manga karanidu,

³⁵ pag-usigun niku tunda, pagbakulun, bag-u pagbul-un niku ti karanidu. Nu maglaban tunda, pagdakpun niku tunda sa liug, pagbakulun tugka sa mamatay.

³⁶ Imaw tunda kang pagbuwatun sa liyun ag usu, katunda diman kang buwatun sa tunda pag Pilistiyu unman magsarig sa Diyus, dahil kay pag akatun ti manga sundalu buhi pag Diyus.

³⁷ Ti Panginuun ti nagribri sa kangku ginan sa liyun ag usu, siya diman ti magribri sa kangku ginan sa tunda pag Pilistiyu.” Sinabi ni Saul sa kan Dabid, “Sigi, lakaw yi kawu. Pagsa kanmu di ti Panginuun.”

³⁸ Ipinakaun niya sa kan Dabid ti panulung pan-gira — ti tansu pag hilmit hanggan ti panangga sa dubdub.

³⁹ Bag-u itinalakud ni Dabid ti baladaw ni Saul ag nanpaabi-abi linmakaw. Dapat, dahil unman siya anad maggamit tunda, sinabi niya sa kan Saul, “Unman niku kaya lumaban nu may sulung inda. Unman aku anad.” Nakan linukas niya tunda tanan.

⁴⁰ Pagkatapus, bin-ul niya kay sugkud, nagpunpun lima ka bilug batu sa bululusan danum bag-u ipinauli sa paknul pag sukadan. Dara niya kay lampitaw, pinmakarani sa kan Gulyat.

⁴¹ Magpakarani diman sa kanya si Gulyat pagpangunahan tagadara niya armas.

⁴² Pagka nakitan niya hanukud kan-akan si Dabid, marinu pag lalaki ag marara waya kay pingi, pinuyaan niya tunda.

⁴³ Sinabi niya sa kan Dabid magkun, “Idu aw aku nakan sugkud lang kanmu dara?” Bag-u sinaadan niya si Dabid sa ngaran niya manga diyus.

⁴⁴ Sinabi waya niya, “Pakarani kawu sitay tag, ipakaun niku sa manga manuk hanggan sa manga maisug pag hayup kanmu bangkay!”

⁴⁵ Sinmagut si Dabid, “Lumaban kawu sa kangku dara kanmu baladaw hanggan manga bangkaw, dapat labanan niku kawu sa ngaran Panginuun Makamaskihan, ti Diyus manga sundalu Israil ti pagpuyaan nimu.

⁴⁶ Taynguna pag sirang ipakaun kawu Panginuun sa kangku. Matyun ag puldun niku kanmu liug. Taynguna diman pag sirang, ti manga bangkay nimu manga kaibahan Pilistiyu ipakaun niku sa manga manuk hanggan sa maraisug pag hayup, bag-u maalaman sa buu kalibutan may Diyus ti Israil.

⁴⁷ Ti tanan atay umalam kuntay pag-iribri Panginuun kay nasakupan una unman may baladaw ngatay bangkaw, dahil ti Panginuun gid ngap ti maglaban, ipahintulut niya kamu tanan sa kanmi.”

⁴⁸ Pagka magpakarani si Gulyat sa kanya, palagiw waydi niya sinulang si Gulyat.

⁴⁹ Binmuul si Dabid usa ka batu sa kay paulian ag linampitaw sa bangas si Gulyat. Pantuk gid nilubung sa bangas ni Gulyat, nagpu siya nislukub atag sa daga.

⁵⁰ Nakan tinalu ni Dabid si Gulyat sa panab-anan lang paglampitaw usa ka batu. Namatay niya si Gulyat una unman may dara baladaw.

⁵¹ Palagiw siya atag sa kan Gulyat, ginabut kay baladaw ag pinlud niya kay liug. Pagka nakitan manga Pilistiyu namatay yi kanda mahusay maggira, nagpinalagiw sida atag sa arayu.

⁵² Sinmugud magpagrit ti manga sundalu Israil hanggan Huda, kanda linagas ti manga Pilistiyu tugka sa Gat ag Ikrun. Nanayaktayak ti manga bangkay manga Pilistiyu sa dalan Saaraim tugka sa Gat ag Ikrun.

⁵³ Pagkatapus nida binukad ti manga Pilistiyu, binmalik sida bin-ul ti manga natayak sa kampu manga Pilistiyu.

⁵⁴ Dinara ni Dabid ti ulu ni Gulyat sa Hirusalim, ti manga armas tunda ipinauli sa kay turda.

⁵⁵ Ati katpung pagka nakitan ni Saul si Dabid magpakarani sa kan Gulyat hampay lumaban, pinaingana ni Saul si Abnir imaw ti kumandir manga sundalu, “Kantapu duy pag anak kan-akan tunda?” Sinmagut si Abnir, “Unman niku alam, Mahal Hari.”

⁵⁶ Sinabi ni Saul, “Alama nimu nu kantapu siya pag-anak.”

⁵⁷ Pagka binmalik si Dabid sa kampu nida ginan sa kay nakamatay sa kan Gulyat, tinaban siya ni Abnir sa kan Saul. Bitbit di ti ulu ni Gulyat.

⁵⁸ Pinaingana siya ni Saul, “Kantapu kawu pag anak?” Nagsagut si Dabid, “Anak duy aku nimu suruguun ni Isai taga Bitlihim.”