1 Samwil 16 - Hanunuu

Pinili Hari si Dabid

¹ Ati katpung, magkun ti Panginuun sa kan Samwil, “Tugka kapira kawu pag manrukuan para sa kan Saul? Binugyahan yi niku siya bilang hari Israil. Taynguna, pun-a lana ulibu kanmu sungay pag sukadan, bag-u pag ati kawu sa kan Isai sa Bitlihim. Pinili niku ti usa sa kay manga anak hampay humari.”

² Dapat magkun si Samwil, “Kabitay aku umatag? Nu maalaman inda ni Saul, pihu gid matyun niya aku.” Magkun ti Panginuun, “Pagdara kawu usa ka dumaraga baka atag sa Bitlihim, bag-u sabihun nimu sa manga tawu kuntay atabug kawu hampay manhandug sa Panginuun.

³ Ban-awan nimu si Isai hampay kumuyug sa kanmu sa paghandug ag tudluan niku kawu nu unu kanmu buwatun. Itudlu niku sa kanmu kang pinili pag anak niya hampay maghari. Bag-u payidan nimu lana ulibu kay ulu.”

⁴ Sinunud ni Samwil ti pag-isugu Panginuun. Pagka rinmas-ug siya sa Bitlihim, sinulang siya manga manugpamahala banwa dinurnan kadalaan. Nagpaingana sida, “Kahusayan aw kanmu turunu nakan kawu nagsitay?”

⁵ Sinmagut si Samwil, “Hu, nag-ataytag aku hampay manhandug sa Panginuun. Lumpiyuha niyu kanyu sadili hampay umatubang sa kanya ag pagkuyug kamu sa kangku hampay minsan kita manhandug sa Panginuun.” Bag-u binwat ni Samwil ti buruwatun para sa paglumpiyu sa kan Isai kaibahan kay manga anak ag kinmuyug diman sida sa paghandug.

⁶ Pagka rinmas-ug sida sa harandugan, nakitan ni Samwil si Ilyab kay anak ni Isai ag naghantup siya, “Pihu gid siya yi ngani ti pinili Panginuun pag hari.”

⁷ Dapat magkun ti Panginuun sa kan Samwil, “Danga kawu magbantay sa kay abwat ngatay sa kay rinu dahil balaw siya kang pinili. Kangku pag pamantay balaw parihu sa pamantay tawu. Ti tawu kay pagbantayan kay lang panluwas pag rinu, dapat aku sa tagipusuun di gid tawu pag magbantay.”

⁸ Tinawagan ni Isai kay anak si Abinadab bag-u ipinaati niya sa kan Samwil. Dapat magkun si Samwil, “Balaw siya ti pinili Panginuun.”

⁹ Bag-u ipinaatag diman ni Isai si Sama sa kan Samwil, dapat sinabi ni Samwil, “Balaw diman siya ti pinili Panginuun.”

¹⁰ Pinaatag ni Isai kay pitu ka anak lalaki sa kan Samwil, dapat magkun si Samwil, “Unman gid may napili una di usa sa kanda ti Panginuun.”

¹¹ Nagpaingana si Samwil sa kan Isai magkun, “Sida lang aw duy tanan kanmu anak?” Sinmagut si Isai, “May imaw waya duy, kay arian, dapat mag-alaga di siya manga karanidu.” Magkun si Samwil, “Pabul-an duy nimu siya. Balaw kita makaparargu sa kanta buruwatun tugka sa unman siya magras-ug.”

¹² Nakan ipinabuul ni Isai si Dabid ag ipinaati sa kanda. Marinu siya pag lalaki, maragang-ragang kay uyahun ag marinu kay mata. Bag-u magkun ti Panginuun, “Payidi yi siya lana ulibu dahil siya yi ngani kang pinili pag hari.”

¹³ Nakan bin-ul ni Samwil ti lana ulibu ag pinayidan niya sa ulu si Dabid sa atubangan niya manga patar-ari. Tunda ginan pag sirang, pag-ulianan yi banal Ispiritu Panginuun si Dabid. Bag-u nuli waydi sa Rama si Samwil.

Nagsirbi si Dabid sa kan Saul

¹⁴ Nighit ginan sa kan Saul ti Ispiritu Panginuun, ag pinakurianan siya daut ispiritu ipinadara Panginuun.

¹⁵ Magkun kay manga suruguun ni Saul sa kanya, “Pihu gid pagpakurianan kawu daut ispiritu pag ipadara Diyus.

¹⁶ Nakan nu pumasnu duy kawu, manhanap kami madunung magpatunug alpa. Kada pakurianan kawu daut ispiritu ti pag-ipadara Diyus sa kanmu, patunugan duy niya kawu alpa ag ruminu maan kanmu mag-asaydan.”

¹⁷ Magkun si Saul sa kay manga suruguun, “Hu, paghanap kamu tawu madunung magpatunug alpa ag daraha niyu siya sa kangku.”

¹⁸ Sinmagut ti usa sa kay manga suruguun, “Nakitan duy niku ti usa sa manga anak ni Isai taga Bitlihim, madunung gid siya magtugtug alpa. Bukud waya siti, maisug duy siya ag madunung sa labanan, marinu pag lalaki, madunung siya nu magbagaw, ag pag-awatan siya Panginuun.”

¹⁹ Nakan nagsugu si Saul manga manugbarita atabug sa kan Isai hampay abisuhan pag-atag sa kanya kay anak si Dabid, ti manug-alaga karanidu.

²⁰ Nakan pinaati ngani ni Isai si Dabid sa kan Saul, may manga dara siya manga pamakaun: usa ka asnu may karga tinapay, usa ka paknul punu irinmun, ag usa ka anak kambing.

²¹ Pagka ati yi si Dabid sa kan Saul, nagsirbi siya sa kanya. Naibugan gid siya ni Saul, binwat siya ni Saul tagadara niya armas.

²² Bag-u nagpadara tultulanun si Saul sa kan Isai magkun, “Pabay-ani dap sitaay sa kangku si Dabid hampay mansirbi sa kangku dahil pagbayaun gid niku siya.”

²³ Kada magras-ug sa kan Saul ti daut ispiritu ginan sa Diyus, pag-ipatunug ni Dabid kay alpa. Bag-u mag-ighit ginan sa kan Saul ti daut pag ispiritu ag mag-ayad kay mag-asaydan niya.