1 Samwil 15 - Hanunuu

Dinayu Panginuun si Saul bilang Hari

¹ Sinabi ni Samwil sa kan Saul, “Sinugu aku kaybi Panginuun payidan kawu lana ulibu hampay ipakakit sa nasakupan Israil kawu kay pinili hari. Pakidnugi nimu ti pagsabihun Panginuun.

² ‘Aku, ti Panginuun Makamaskihan, parusahan niku ti manga Amalikita sa kanda magdugma sa manga Israilita katpung kang nagpalwas sa kanda ginan sa Ihiptu.

³ Nakan taynguna, giraha niyu ti manga Amalikita. Rurisa niyu lubus ti tanan ati. Matyun niyu sida tanan, manga lalaki, babayi, anak ag manga lapsag, hanggan yi kanda manga baka, karanidu, kambing, kamilyu ag manga asnu.’ ”

⁴ Nakan tinipun ni Saul ti manga sundalu sa Tilaim. May 200,000 sundalu ti natipun, tuhay waya ti 10,000 ginan sa Huda.

⁵ Pinanguluhan sida ni Saul atabug sa banwa Amalik ag nag-alagad sida ati sa luung hampay mandugma.

⁶ Namadara si Saul kaindaay pag barita sa manga Kiniyu: “Pagpakarayu kamu sa manga Amalikita hampay balaw kamu mamatay kaibahan nida, dahil mayad kamu sa manga Israilita katpung nagluwas sida sa Ihiptu.” Nakan nagpakarayu ngani ti manga Kiniyu ginan sa manga Amalikita.

⁷ Ginira nida ni Saul ti manga Amalikita ginan sa Habila tugka sa Sur, ati sa butlakan baliwa Ihiptu.

⁸ Rinuris nida lubus ti tanan Amalikita, dapat si Agag ti hari manga Amalikita unman nida minatay kanda lang binihag.

⁹ Balaw diman nida minatay ti pinakamarinu pag manga karanidu hanggan manga baka kaibahan kay manga anak inda. Ti tanan mayad balaw nida minatay, dapat kay unman mapakinabangan kanda gid minatay.

¹⁰ Magkun ti Panginuun sa kan Samwil,

¹¹ “Magsisi gid aku binwat niku hari si Saul, dahil nagpatlikud siya sa kangku ag balaw nagsunud sa kang sugu.” Pagka nasaydan inda ni Samwil, nangisug gid siya, ag nandarangin siya buu yabi sa Panginuun.

¹² Igu sa sunud pag sirang, surip waya gid binmangun si Samwil, bag-u linmakaw hampay mankabta sa kan Saul. Dapat may nagkumun sa kanya, “Nag-ati si Saul sa Karmilu hampay manpatindug ati tulduk batu para sa kay kadayawan, bag-u nag-ati siya sa Gilgal.”

¹³ Inati ni Samwil si Saul. Pagka nagsampak sida, sinabihan siya ni Saul magkun, “Papaladan kawu Panginuun! Sinunud niku ti manga sugu Panginuun.”

¹⁴ Dapat magkun si Samwil, “Hayga bati may mag-asaydan aku inga manga karanidu hanggan manga baka?”

¹⁵ Sinmagut si Saul, “Tunda tanan ti pinakamarinu pag manga karanidu hanggan manga baka, dara manga sundalu ginan sa manga Amalikita. Balaw nida minatay dahil ihandug nida sa Panginuun nimu Diyus ati sa harandugan, dapat kay iba lubus yi nimi minatay.”

¹⁶ Magkun si Samwil, “Kang-ud yi! Patingihi nimu ti pagsabihun Panginuun sa kangku kis-ab yabi.” Nagpaingana si Saul, “Hintay kunu?”

¹⁷ Magkun si Samwil, “Una diit kanmu pamantay sa kam sadili kaybi, pinili di gid kawu Panginuun humari sa tanan linahi Israil.

¹⁸ Ag ipinadara niya kawu sa usa ka buruwatun. Magkun siya, ‘Rurisa lubus ti manga Amalikita, ti daut pag nasakupan. Lumaban kawu sa kanda tugka sa matabu sida mamatay.’

¹⁹ Dapat malu, hayga unman kawu nagsunud sa Panginuun? Hayga daldali niyu bin-ul kanda manga kasiyunan? Hayga nimu binwat inda pag daut pag bagay sa Panginuun?”

²⁰ Nagsagut si Saul, “Dapat sinunud niku ti Panginuun. Binwat niku ti isinugu niya sa kangku. Binihag niku si Agag, ti hari manga Amalikita, ag minatay niku ti tanan niya nasakupan.

²¹ Bag-u bin-ul manga sundalu niku ti pinakamarinu pag manga karanidu hanggan manga baka ginan sa inaghas sa girahan, ti nakatagka wasakun lubus. Dinara nida inda atay sa Gilgal hampay ihandug sa Panginuun nimu Diyus.”

²² Dapat nagsagut si Samwil, “Magbaya aw lugud ti Panginuun sa manga handug niyu kaysa pagsunud sa kanya? Ti pagsunud sa Panginuun mas mayad man kaysa manga handug. Ti pagpatingi sa kanya mas mayad man kaysa paghandug manga taba karanidu.

²³ Ti paglapastangan sa Panginuun ga maghiri kay ka daut ag ti kaganitan ulu ga magsamba sa diyus-diyusan kay ka daut. Dahil sa kanmu pagbugya sa bagaw Panginuun, binugyahan diman niya kawu bilang hari.”

²⁴ Magkun si Saul sa kan Samwil, “Nagkasala aku; balaw niku sinunud kanmu manga itinudlu sa kangku hanggan ti sugu Panginuun. Nadala aku sa manga tawu, nakan sinunud niku kanda pagkaibgan.

²⁵ Kaawai duy nimu aku, patawada aku sa kang manga kasalanan ag ibahi aku sa pagsamba sa Panginuun.”

²⁶ Dapat magkun si Samwil, “Balaw aku mangiba sa kanmu. Dahil sa kanmu paglapastangan sa Panginuun, pagbugyahan yi niya kawu bilang hari Israil.”

²⁷ Pagka magpatlikud yi si Samwil hampay guminan, hiniyaptan ni Saul kay sidsid rutay ag nagitas inda.

²⁸ Magkun si Samwil sa kanya, “Kainda diman ti mangyari sa kanmu: Bul-un yi Panginuun taynguna pag sirang ginan sa kanmu ti kaharian Israil, bag-u ipakaun sa kanmu kaparihu Israilita mas mayad man kaysa kanmu.

²⁹ Ti Makamaskihan pag Diyus Israil unman magpudil ag balaw ga tawu pabag-u bag-u isip.”

³⁰ Nagsagut si Saul, “Nagkasala aku! Nakan taynguna magpakihampang aku, kilalan-a nimu aku sa atubangan manga manugpamahala niku banwa ag buu Israil sa panab-anan pag-iba sa kangku sa pagsamba sa Panginuun nimu Diyus.”

³¹ Nakan nagkuyug ngani si Samwil sa kan Saul ag nagsamba si Saul sa Panginuun.

³² Magkun si Samwil, “Daraha nimu sa kangku si Agag, ti hari manga Amalikita.” Nagpakarani may kahusayan si Agag sa kan Samwil. Mag-isip siya balaw yi siya matyun.

³³ Dapat magkun si Samwil, “Nu kabitay ti kayamuan ina naduraan anak dahil sa pagmatay nimu, taynguna, maduraan diman anak kanmu ina.” Bag-u tinigbas ni Samwil si Agag sa atubangan Panginuun sa Gilgal.

³⁴ Pagkatapus, nagbalik si Samwil sa Rama, ag si Saul nuli sa Gibiya.

³⁵ Siyun ginan, unman yi napakabta si Samwil sa kan Saul tugka sa namatay si Samwil. Dapat nanruku siya para sa kan Saul. Naruku ti Panginuun sa pagpili niya hari Israil si Saul.