1 Samwil 14 - Hanunuu

Ginira ni Hunatan ti manga Pilistiyu

¹ Pagka sa usa ka sirang, magkun si Hunatan sa kan-akan tagadara niya armas, “Abala, atag kita sa kampu manga Pilistiyu.” Dapat balaw niya inda sinabi sa kay ama.

² Tunda katpung si Saul ati sa sirung kayu pumigranata sa Migrun, sa luwas Gibiya. Kaibahan niya kay 600 ka tawuhan.

³ Ati diman hanggan ti manughandug si Ahiyas may sulung ipud manughandug. Si Ahiyas kay anak ni Ahitub kay patar-ari ni Ikabud. Si Ahitub kay anak ni Piniis anak ni Ili manughandug magsirbi kaybi sa Silu. Unman may nakaalam sa kay ginminan ni Hunatan.

⁴ May yangpas sa baliw-baliw saruy sa kay paglakawan ni Hunatan atabug sa kampu manga Pilistiyu; kay usa pag-ingarnan Busis ag kay usa pag-ingarnan Sini.

⁵ Kay usa sa may salatan masranguhan sa Mikmas, kay usa sa may kanaway waydi masranguhan sa Gibiya.

⁶ Magkun si Hunatan sa tagadara niya armas, “Atagun nita ti kampu manga tawu balaw magsarig sa Diyus. Barang awatan kita Panginuun, dahil unman may umampara nu kagustuhan niya manalu kita, una mayamu ngatay pira-pira kita.”

⁷ Magkun sa kanya kay tagadara niya armas, “Buwata duy nimu una hintay kanmu pagkaibgan. Kaibahan nimu aku una hintay ti mangyari.”

⁸ Magkun si Hunatan, “Abala, atag kita, manpakakit kita sa kanda.

⁹ Nu sabihun nida kuntay sida ti pumakarani sa kanta hampay manlaban, balaw yi kita tumukad tag sa kanda, alagdun yi lang nita sida.

¹⁰ Dapat nu sabihun nida, kita ti pagpakarani, tumukad kita dahil tunda ti tanda ipatalu sida Panginuun sa kanta.”

¹¹ Pagka nakitan sida duwa ati sa kampuhan manga Pilistiyu, rinminggit ti manga Pilistiyu, “Bantayi niyu ti manga Hibriyu! Magpabulwat yi sida ginan sa kanda paratag-an.”

¹² Ag rininggitan nida si Hunatan hanggan kay tagadara niya armas, “Pagpakarani kamu sitaay, hampay tudluan nimi kamu.” Magkun si Hunatan sa tagadara niya armas, “Abala, pagdasun sa kangku dahil awatan kita Panginuun taluhun sida Israil.”

¹³ Nakan yinmapang si Hunatan, ag dinmasun ti tagadara niya armas. Pinanmatay ni Hunatan ti manga Pilistiyu, katunda diman ti binwat niya tagadara armas.

¹⁴ Sa inda pag un-an dugma, minatay nida ti 20 ka Pilistiyu, manga tunga iktarya pag daga kanda naglabanan ati.

¹⁵ Dinurnan dala ti manga Pilistiyu ati sa kampu, sa tanman, sa balay bantayan hanggan ti manga magdugma pag sundalu nida. Bag-u linminug diman nakan lalu ngap sida nadala.

¹⁶ Ati sa Gibiya, sa daga Binhamin, nakitan manga manugbantay ni Saul ti manga sundalu Pilistiyu magpalalagiwan una naan tag baliwa.

¹⁷ Magkun si Saul sa kay manga tawuhan, “Tipuna niyu ti manga sundalu ag bantayi nu si unu ti unman lagan.” Ag naalaman nida unman lagan si Hunatan hanggan kay tagadara armas.

¹⁸ Magkun si Saul sa kan Ahiyas, “Daraha ataytag ti Kaban Diyus.” (Tunda katpung, ti Kaban Kasunduan ati sa manga Israilita.)

¹⁹ Habang maghampang si Saul sa manughandug, lalu waya gid inmamat ti riringgitan ag kalaguluhan sa kampu manga Pilistiyu nakan magkun si Saul sa kan Ahiyas, “Pabay-ani yi nimu. Danga yi pagpararguhan ti pagpaingana sa Diyus.”

²⁰ Bag-u tinipun ni Saul kay manga tawuhan ag linmusub sa girahan. Nakitan nida ti manga Pilistiyu magkalaguluhan ag sida-sida magmaratyan.

²¹ Una hanggan ti manga Hibriyu daan kakampi manga Pilistiyu inmati sa kampu manga Israilita ag napakampi sa kanda ni Saul ag ni Hunatan.

²² Ti kada mataguan sa kabantudan Ipraim pag manga Israilita pagka nakadnug sida magpalalagiwan ti manga Pilistiyu, inmawat yi waydi sida linmagas.

²³ Tugka waya sa unahan Bit Abin pag nakaaput ti girahan. Ag sa ati katpung pag udas, irinibri Panginuun ti Israil.

Isinumpa ni Saul ti manga Sundalu Nagkaun

²⁴ Tunda katpung, nanlubay sa lun-us ti manga Israilita dahil pinasumpa sida ni Saul, magkun, “Saadan una si unu ti kumaun karan-unun bag-u yumabi, tugka sa unman waya aku makaganti sa kang manga kalaban.” Nakan unman may nangaun una di usa sa kanda.

^25-26 Nag-ati sa katalunan ti tanan sundalu, nu naan may nakitan sida daykut magtiktik sa daga. Unman gid nida inda sinamitan dahil magkadala sida sa saad.

²⁷ Dapat unman nakadnug si Hunatan katpung pinasumpa niya ama ti manga tawu, nakan itinulsuk niya kay pudpud sugkud sa daykut ag kinmaun siya, bag-u nagmayad gid kay mag-asaydan.

²⁸ Nakitan siya usa sa manga tawuhan ag magkun tag sa kanya, “Pinasumpa nimu ama ti buu gurupu sundalu danga magkaun taynguna pag sirang nakan magpanlubay yi gid kami.”

²⁹ Magkun si Hunatan, “Balaw hustu kay pagbuwatun niya sa kanta banwa. Malu, ga kabitay yi ati kang mag-asaydan pagka sinamitan niku ti daykut.

³⁰ Lalu waya nu pinasnuan sida kumaun manga naaghas nita ginan sa kanta manga kalaban, pihu mayamu waya kanta minatay pag manga Pilistiyu.”

³¹ Sa tunda pag sirang, pagka tinalu manga Israilita ti manga Pilistiyu ginan sa Mikmas tugka sa Ayalun, ginasa ag linun-us gid sida masyadu.

³² Nakan nagdaldali sida nagdakup karanidu hanggan baka ginan sa kanda inaghas, ag ati yi ngap nida pag iniyaw tunda bag-u kinaun ti taguban may dugu di.

³³ May nagtultul sa kan Saul magkun, “Bantayi niyu, nagkasala sa Panginuun ti manga tawuhan niyu dahil nagkaun sida taguban may dugu waya.” Magkun si Saul, “Usa inda ka daka pag kasalanan! Paghanap kamu usa ka daka pag batu, ligidan ataytabug.

³⁴ Bag-u atihi niyu kang manga tawuhan ag sabihi sida tanan daraha ataytabug ti manga baka, karanidu hanggan kambing. Sitay nida pag-iyawa ag pagkan-a tunda. Sabihi diman niyu sida danga magkasala sa Panginuun sa panab-anan pagkaun taguban may dugu waya.” Nakan sa tunda pag yabi, dinara manga tawuhan ni Saul atabug sa kanya ti manga baka, karanidu hanggan kambing ag ati pag iniyaw.

³⁵ Nagbuwat si Saul harandugan para sa Panginuun. Inda ti un-an niya binwat pag harandugan.

³⁶ Magkun si Saul, “Girahun nita taynguna pag yabi ti manga Pilistiyu. Matyun nita sida tanan, bag-u bul-un nita kanda manga kasiyunan tugka surip. Unman kita may sawadan buhi.” Sinmagut ti manga tawu, “Buwata duy niyu nu hintay ti mayad sa kanyu magbantay.” Dapat magkun ti manughandug, “Paingan-un dapu nita ti Diyus tungkul sa inda pag bagay.”

³⁷ Nakan nagpaingana si Saul sa Diyus, “Girahun aw duy nimi ti manga Pilistiyu? Ipatalu aw niyu sida sa kanmi?” Dapat unman nagsagut ti Diyus sa tunda pag sirang.

³⁸ Nakan sinabi ni Saul sa manga takinan nasakupan Israil, “Pagtipun sitaay kamu tanan, kailangan maalaman nita nu hintay pag salan kanta nabwat kainda pag sirang.

³⁹ Magsumpa aku sa buhi pag Panginuun imaw ti nagribri sa manga Israilita, mamatay ti nagkasala una waya siya kang anak si Hunatan.” Dapat unman una di usa ti nangingay sa manga Israilita.

⁴⁰ Dapat magkun waya si Saul sa tanan Israilita, “Pagtindug kamu siyun ag tumindug diman kami magtal-anak ni Hunatan.” Pinmasnu diman ti manga tawu.

⁴¹ Bag-u nandarangin si Saul, “Panginuun, Diyus Israil, paalaman duy niyu sa kanmi nu si unu ti nagkasala.” Sa panab-anan lunggungan, sida ni Saul ni Hunatan ti napili nagkasala ag balaw ti manga tawu.

⁴² Magkun si Saul, “Manlunggungan waydi kita taynguna hampay maalaman nu si unu sa kanmi duwa ti nagkasala.” Ag si Hunatan ti nabunut.

⁴³ Pinaingana ni Saul si Hunatan, “Hintay kanmu binwat?” Sinmagut si Hunatan, “Itinulsuk duy niku ti pudpud niku sugkud sa daykut ag kinmaun aku diit. Kailangan gid aw aku mamatay?”

⁴⁴ Sinabi ni Saul, “Hu, kailangan kawu mamatay. Parusahan gid aku Diyus nu unman niku kawu maipamatay.”

⁴⁵ Dapat magkun ti manga tawu sa kan Saul, “Si Hunatan duy ti nagpanalu sa kanta, dapat taynguna, matyun nita siya? Balaw duy mahimu! Magsumpa kami sa Panginuun buhi, unman gid una di usa kay buhuk niya ti maragdag sa daga, dahil Diyus duy ti nag-awat sa kanya sa kay binwat taynguna pag sirang.” Nakan balaw ngani minatay si Hunatan dahil irinibri siya manga Israilita.

⁴⁶ Pinaapas ni Saul ti paglagas sa manga Pilistiyu, ag binmalik yi ti manga Pilistiyu sa kanda rugar.

⁴⁷ Pagka maghari si Saul sa Israil, nanlaban siya sa manga kalaban nida sa kanda palibut. Kay manga kalaban ti manga Muabita, Amunita, Idumita, manga hari Suba, hanggan ti manga Pilistiyu. Magkatalu niya una si unu kay makalaban.

⁴⁸ Buu kabisugan siya nanlaban ag natalu niya ti manga Amalikita. Sa panab-anan tunda, irinibri niya ti manga Israilita sa kamang manga maggira sa kanda hanggan sa manga magbuul sa kanda manga kasiyunan.

Ti Magtal-anakan ni Saul

⁴⁹ Kay manga anak lalaki ni Saul sida ni Hunatan, Isbi, ag Malkisuwa; si Mirab waydi kay anak panganay pag babayi, ag si Mikul kay arian.

⁵⁰ Kay asawa ni Saul si Ahinuam kay anak ni Ahimaas. Ti kumandir niya manga sundalu kay pinsan, si Abnir, anak niya bapa ni Nir.

⁵¹ Kay ama ni Saul si Kis ag kay ama ni Abnir si Nir magtar-ari, sida kay manga anak ni Abyil.

⁵² Sa buu panahun maghari ni Saul, masyadu gid ti labanan manga Israilita hanggan manga Pilistiyu. Nu may mag-akitan si Saul mabaskug ag maisug pag lalaki, pagbuwatun niya inda sundalu niya.