1 Samwil 13 - Hanunuu

Sinungyaw ni Samwil si Saul

¹ Tatlumpulu ka timpu si Saul kay idad katpung siya nag-umpisa maghari. Naghari siya sa Israil sa sulud upatpulu may duwa ka timpu.

² Nagpili si Saul tulu ka libu lalaki sa Israil hampay manlaban sa manga Pilistiyu. Kay duwa ka libu kaibahan niya sa Mikmas ag kabantudan Bitil. Bag-u kay usa ka libu kaibahan waydi niya anak ni Hunatan sa daga Gibiya sakup manga Binhaminita. Kay sinmubra pag manga tawu ipinauli ni Saul tag sa kanda manga ulian.

³ Ginira ni Hunatan ti kampu manga Pilistiyu sa Giba ag nabaritaan inda iba manga Pilistiyu. Nakan magkun si Saul patunugan ti budyung sa buu daga Israil bilang pag-alistu manga Israilita sa girahan.

⁴ Nabaritaan manga Israilita kuntay magkagalit gid ti manga Pilistiyu sa kanda dahil ginira ni Saul kanda kampu. Nakan nagtipun ti manga Israilita sa Gilgal kaibahan ni Saul.

⁵ Nagtipun hanggan ti manga Pilistiyu hampay manlaban sa manga Israilita. May 3,000 kalisa pan-gira, 6,000 manugkabayu hanggan manga sundalu ga baras dagat kay kayamu. Bag-u nag-atag sida nagpatindug kanda kampu sa Mikmas baliwa sa butlakan init Bit Abin.

⁶ Pagka nakitan manga Israilita alangan kanda kahamtangan, napatagu sida sa lukib, sa manga basad mailamnun, sa manga batuhan, sa manga ukang hanggan sa tiripunan danum.

⁷ Ti manga iba nagdipay ngapu sa sapa Hurdan, nag-atag sa daga Gad ag Gilyad. Dapat si Saul ati di sa Gilgal. Kay manga kaibahan niya manga sundalu dinurnan diman dala.

⁸ Sa sulud pitu ka sirang nag-alagad si Saul sa kan Samwil, angay sa kay sinabi ni Samwil. Dapat ay si Samwil unman waya nagras-ug ati sa Gilgal. Bag-u kay manga kaibahan ni Saul pag manga sundalu kay iba namululagan yi waydi.

⁹ Nakan sinabi ni Saul magkun, “Daran-a sitay tag sa kangku ti manga hayup sunugun handug sa Panginuun hanggan ti manga handug sa Panginuun para sa mayad pag pakiusa.” Bag-u sinunug ngani kay ihinandug ni Saul sa Panginuun ti manga hayup.

¹⁰ Pagka lang natapus kan Saul handug, rinmas-ug si Samwil. Sinulang niya inda hampay kay batiun, dapat nagpaingana si Samwil,

¹¹ “Hintay duy kanmu binwat asan?” Sinmagut si Saul, “Namululagan yi duy ti manga sundalu ginan sa kangku ag unman kawu rinmas-ug sa kanmu taning pag udas. Mirinsanan yi paman ti manga Pilistiyu sa Mikmas.

¹² Nakan ngani magkun aku, barang labanan kami manga Pilistiyu sitay sa Gilgal ag udwaya paman hinagad niku ti panalu ginan sa Panginuun. Nakan napilitan yi lang aku nansagda manga handug pagsunugun.”

¹³ Sinabi ni Samwil sa kan Saul magkun, “Balaw mayad kanmu binwat! Unman inisip nimu mayad sa kanmu sadili nakan ngani kawu sinmalan. Unman nimu tinupad ti pagsabihun Panginuun nimu Diyus sa kanmu. Nu abi kawu nagsunud lang mana, parig-unun di Panginuun kanmu maghari sa Israil hanggan kanmu manga lahi hanggan waya aban.

¹⁴ Dapat taynguna unman rumargu kanmu paghari. Unman nimu tinupad kay ibinilin Panginuun sa kanmu. Nakan hinmanap siya usa ka lalaki hampay tumupad sa kanya angay sa kagustuhan Panginuun. Iinalistu siya Panginuun hampay maghari sa kay nasyun.”

¹⁵ Bag-u nuli yi maan si Samwil ginan sa Gilgal ag inmati siya sa Gibiya sakup manga Binhamin. Binilang ni Saul ti manga nasawad niya pag manga tawuhan — 600 tanan.

Unman may Armas ti manga Israilita

¹⁶ Kinmampu si Saul hanggan kay anak si Hunatan, kaibahan diman hanggan ti manga nasawad pag manga sundalu, sa Giba sakup Binhamin, habang ti manga Pilistiyu waydi makampuhan sa Mikmas.

¹⁷ Tulu ka gurupu ti manga Pilistiyu sa kanda maggira. Kay usa ka gurupu inmatag sa Upra, sa daga Suwal.

¹⁸ Kay usa waya ka gurupu sa Bit Hurun, ag kay usa inmatag sa katugkaan nu naan pag magkaalantaw ti Karatagan Sibuyim atabug sa pangawakawaan.

¹⁹ Tunda katpung, unman may manugpanday baul sa buu Israil. Unman sida pinasnuan manga Pilistiyu dahil magkun sida, “Barang mamuwat manga baladaw ag bangkaw ti manga Hibriyu.”

²⁰ Nakan kailangan waya manga Israilita umati sa manga Pilistiyu hampay mangasa sida kanda manga tarum aradu, piku, wasay ag karit.

²¹ Mahal tunda kay bayad sa kanda. Kay bayad magpaasa aradu hanggan piku halaga duwa ka bilug pilak ag ti magpaasa wasay hanggan pamugaw may tarum halaga usa ka bilug pilak.

²² Nakan igu girahan yi, unman gid una di usa ka sundalu Israil ti may baladaw hanggan bangkaw purya lang sa kanda ni Saul ni Hunatan.

²³ Ti manga Pilistiyu waydi nagpadara kanda manga sundalu hampay bantayan ti dalan atabug sa Mikmas.