1 Samwil 12 - Hanunuu

Ti manga Uryan pag Bilin ni Samwil

¹ Magkun si Samwil sa tanan Israilita, “Tinupad yi duy niku ti tanan niyu paghagadun sa kangku; pinakan-an niku kamu hari imaw ti pumanguna sa kanyu.

² Taynguna inda yi siya, kanyu manuggiya. Aku di bay gurangun yi ag ubanin yi. Kang manga anak bay kaibahan waya niyu. Aku yi waydi ti naggiya sa kanyu ginan kaybi sa kang kasupangan hanggan taynguna tugka.

³ Atay aku taynguna sa kanyu atubangan. Nu may nabwat aku daut sa kanyu, sabiha lang niyu sa kangku sa atubangan Panginuun hanggan sa kay pinili pag hari. May inapu aw aku baka ngatay asnu? May dinaya aw aku ngatay ginipit? Nagtanggap aw aku suhul hampay bul-an halaga ti kasalanan nabwat usa ka tawu? Nu mapatutuuhanan niyu nabwat niku inda pag manga bagay, iuli di niku inda.”

⁴ Sinmagut ti manga tawu, “Balaw duy kawu nandaya sa kanmi, unman diman nakagipit sa kanmi, unman diman waydi nakaapu kawu una kantapu pag kasiyunan.”

⁵ Bag-u sinabi ni Samwil sa kanda magkun, “Ti Panginuun maghiling di hanggan kay pinili pag hari, alam diman niya taynguna pag sirang balaw kamu may nakitan daut sa kangku.” Sinmagut ti manga tawu, “Maghiling di ti Panginuun.”

⁶ Bag-u sinabi ni Samwil sa manga tawu magkun, “Ti Panginuun ti nagpili kaybi sa kan Muysis hanggan sa kan Aarun. Siya diman ti nagpalwas sa kanyu manga ginurang ginan sa daga Ihiptu.

⁷ Nakan taynguna, pagpasrangu kamu sa atubangan Panginuun dahil ipaalaala niku sa kanyu ti tungkul sa tanan manga mayad pag buwat Panginuun sa kanyu hanggan sa kanyu manga ginurang.

⁸ “Katpung ati di waya sa Ihiptu kay linahi ni Hakub, nanhagad sida awat sa Panginuun. Nakan sinugu yi ngani Panginuun si Muysis hanggan si Aarun. Sida ti nagpalwas sa kanyu ginurang ginan sa Ihiptu, bag-u ipinatahan nida sida sa inda pag daga.

⁹ Dapat kinalimtan nida ti Panginuun nida Diyus, nakan ngani pagka ti manga Israilita linabanan ni Sisara, imaw ti kumandir manga sundalu Hasur, hanggan manga Pilistiyu ag hari Muab, pinabay-anan sida Panginuun. Tinalu lang ti manga Israilita.

¹⁰ Bag-u nagdangup maan sida sa Panginuun magkun, ‘Kami duy nagkasala dahil pinatlikudan nimi kawu, ti Panginuun. Nagsamba kami sa kanda ni Baal hanggan ni Astarut. Dapat taynguna ribrihan nimu kami sa kamang nimi manga kalaban, bag-u sumunud kami sa kanmu.’

¹¹ Nakan sinugu Panginuun sida ni Gidyun, ni Barak, ni Hipti hanggan aku; ag irinibri nimi kamu sa kanyu manga kalaban sa tanan rugar. Nakan nangulian kamu udyi may pagkadalaan.

¹² Dapat pagka nakitan niyu salakayun yi kamu ni Hari Nahas taga Amun, nanhagad kamu hari sa kangku hampay manguna sa kanyu, una ngani ti Panginuun yi niyu Diyus kanyu pinagkahari.

¹³ Taynguna inda yi ngani ti hari kanyu pinili hanggan kanyu hinagad, ag ipinakaun inda Panginuun sa kanyu.

¹⁴ Kailangan kamu paggalang sa Panginuun, pagsirbi sa kanya ag pagpatingi kamu sa kay pagsabihun. Danga maglapastangan sa kay bilin Panginuun. Mayad nu katunda kamu hanggan kanyu hari pagmasurundun sa Panginuun niyu Diyus, hampay unman may kadautan rumas-ug sa kanyu.

¹⁵ Dapat nu unman patingihan niyu kay pagsabihun Panginuun, ag nu maglapastangan sa kay manga bilin, bumaliw kalaban niyu siya parihu sa kaybi sa kanyu manga ginurang.

¹⁶ “Taynguna, danga yi kamu magpablag sa Panginuun. Bantayi niyu inda pag makadululaw pag tanda kay buwatun Panginuun sa kanyu atubangan.

¹⁷ Unman aw taynguna udas yi tig-arani ag unman mag-uran? Dapat dumarangin aku sa Panginuun hampay pumadara siya linti hanggan uran. Bag-u masalman niyu nu kabitay kay ka daut kanyu binwat sa magbantay Panginuun sa kanyu magpakahagad hari.”

¹⁸ Nandarangin ngani si Samwil sa Panginuun. Tunda diman pag sirang nagpadara yi ngani linti hanggan uran ti Panginuun. Bag-u ti buu nasyun nadala gid ungud sa Panginuun hanggan sa kan Samwil.

¹⁹ Sinabi tanan tawu sa kan Samwil magkun, “Kailangan duy idarangin nimu kami kanmu manga suruguun sa Panginuun nimu Diyus. Hampay kami balaw mamatay, dahil dinugangan nimi kanmi manga kasalanan katpung maghagad kami hari.”

²⁰ Sinabi ni Samwil sa manga tawu magkun, “Danga kamu magkadala, tutuu yi gid inda kanyu binwat pag kadautan. Dapat kamu danga magbul-iw sa Panginuun. Ilubus niyu kanyu buu tagipusuun sa kanyu pagsirbi sa kanya.

²¹ Danga yi kamu magsunud sa manga diyus-diyusan unman makaawat, unman diman makaparibri sa kanyu dahil unman ngani may pulus.

²² Balaw gid kamu pabay-anan Panginuun, dahil balaw niya gustu mangay-a kay ngaran. Pag-ikabaya gid niya kamu buwatun nasakupan niya.

²³ “Balaw gid duy aku umapas sa kang magdarangin sa kanyu, dahil nu abi kang apasan tunda ngap kasalanan niku laban sa Panginuun. Bagkus ngap itudlu di niku sa kanyu ti mayad hanggan matadlung pag-ugali.

²⁴ Pagmaginalangun yi gid kamu sa Panginuun, ag pagsirbi sa kanya may katapatan sa buu niyu tagipusuun. Isip-isipa gid niyu nu kabitay kay kadaka kay binwat sa kanyu.

²⁵ Dapat nu kamu magparargu sa kanyu buwat kadautan, rurisun kamu hanggan kanyu hari.”