1 Samwil 11 - Hanunuu

Irinibri ni Saul ti Banwa Habis Gilyad

¹ Tunda katpung, pinalibutan ni Hari Nahas taga Amun hanggan niya manga kaibahan sundalu ti banwa Habis Gilyad. Sinabi manga taga Habis Gilyad sa kan Nahas magkun, “Pagbuwat duy kawu kasunduan sa kanmi, bag-u kami pumasakup sa kanmu.”

² Sinmagut si Nahas magkun, “Hu, magpasnu aku. Dapat kaindaay kang buwatun sa kanyu, tanan-tanan niyu sikun mata kang luwatun hampay puyaan ti buu Israil.”

³ Sinabi maan manga manugpamahala taga Habis sa kan Nahas magkun, “Pakan-i waya nimu kami rugar pitu ka sirang hampay pumasugu waya kami sa buu daga Israil. Nu udyi may rumibri sa kanmi, pasakup yi lang kami sa kanyu.”

⁴ Rinmas-ug ti manga manugbarita sa Gibiya, nu naan pag mag-uli si Saul. Pagka sinabi nida sa tanan tawu ati sa banwa ti sinabi ni Nahas, nanwarawawan yi lang ti manga tawu.

⁵ Tunda katpung mag-uli yi si Saul ginan sa kay tanman kaibahan kay manga baka. Pagka nadnugan niya ti warawawan, nagpaingana siya magkun, “Hayga magwarawawan ti manga tawu?” Nakan kinmumun ti manga tawu sa kanya ti itinultul manga taga Habis.

⁶ Pagka nadnugan ni Saul tunda, inudyukan siya Ispiritu Diyus ag masyadu gid siya nangisug.

⁷ Nagbuul siya duwa ka baka, kay iniyaw ag pinahat-pahat. Bag-u kay itinunghul sa manga manugbarita hampay darahun atag sa buu daga Israil. Sinabi niya sa kanda magkun, “Kaindaay kanyu sabihun, ‘Katunda ngani ti mangyari sa kay baka nu ti tawu balaw kumuyug sa kanda ni Saul ag ni Samwil atabug sa girahan.’ ” Pinadala gid Panginuun ti manga Israilita sa kan Saul, nakan kinmuyug ngani sida sa kanya.

⁸ Pagka binilang ni Saul sida ati sa Bisik; 300,000 ti ginan sa Israil ag 30,000 ti ginan sa Huda.

⁹ Sinabi nida sa manga manugbarita taga Habis Gilyad magkun, “Sabiha niyu sa kanyu manga kasimanwa, aldaw karaw-an sirang maribri kamu.” Pagka sinabi inda manga manugbarita sa kanda manga kasimanwa, magbarayaan gid sida.

¹⁰ Magkun sida sa manga Amunita, “Aldaw duy kami pumasakup yi sa kanyu, bag-u buwata yi lang niyu sa kanmi kanyu gustu.”

¹¹ Pagka madlum di waya surip tinulu ka gurupu ni Saul kay manga sundalu. Pagka surip yi sinlud nida ti kampu manga Amunita ag pinanmatay nida tugka karaw-an sirang. Ti manga nasawad buhi nagpinalalagiw.

¹² Pagkatapus girahan, magkun ti manga Israilita sa kan Samwil, “Naan yi ti manga magsabi balaw nita dapat maging hari si Saul? Daran-a niyu sida sa kanmi hampay kanmi matyun.”

¹³ Dapat magkun si Saul, “Unman kailangan may matyun taynguna pag sirang, dahil taynguna irinibri Panginuun ti Israil.”

¹⁴ Bag-u kay sinabi ni Samwil sa manga taga Israil magkun, “Kita duy atag yi sa Gilgal. Kanta parig-unun ati kay paghari ni Saul.”

¹⁵ Nag-atag ngani sida tanan sa Gilgal, bag-u kanda ibinantala si Saul bilang hari sa atubangan Panginuun. Ati sida naghandug manga hayup para sa mayad pag pakiusa, ag nagkaimaw sida daka pag handaan.